ចិន៖មហាសន្និបាតបានចារឈ្មោះ និងលទ្ធិរបស់លោកស៊ី ជីនពីងទៅក្នុងធម្មនុញ្ញរបស់គណបក្សកុម្មុយនិស្ត
ចុះផ្សាយនៅថ្ងៃ៖
ស្តាប់ - ០៤:៤៧
នៅក្នុងប្រទេសចិន មហាសន្និបាតគណបក្សកុម្មុយនិស្តលើកទី១៩ បានបិទបញ្ចប់សម័យប្រជុំរបស់ខ្លួននាថ្ងៃអង្គារ ទី២៤ តុលានេះ។ នៅក្នុងបរិយាកាសនៃការបិទបញ្ចប់ជាឱឡារិក គណៈប្រតិភូទាំងជាង ២ ៣០០នាក់បានអនុម័តជាឯកច្ឆ័ន្ទចារឈ្មោះ និងលទ្ធិរបស់លោកប្រធានាធិបតីស៊ី ជីនពីងទៅក្នុងធម្មនុញ្ញរបស់គណបក្សកុម្មុយនិស្ត។ កិត្តិយសដែលលោកស៊ី ជីនពីងទទួលបានពេលនេះ គឺស្មើនឹងកិត្តិយសដែលបក្សបានផ្តល់ឲ្យលោកម៉ៅ សេទុងដែលជាស្ថាបនិកនៃសាធារណរដ្ឋប្រជាមានិតចិន។ មានអាយុ ៦៤ឆ្នាំ លោកស៊ី ជីនពីងនឹងត្រូវកាន់តំណែងជាអគ្គលេខាធិការមជ្ឈិមបក្សសម្រាប់ ៥ឆ្នាំបន្ថែមទៀត។
គណៈប្រតិភូចិនទាំងជាង ២ ៣០០នាក់ដែលបានចូលរួមនៅក្នុងមហាសន្និបាតបក្សលើកទី១៩ តាំងពីថ្ងៃទី១៨ តុលាបានយល់ព្រមនៅថ្ងៃបិទបញ្ចប់សម័យប្រជុំថ្ងៃទី២៤ តុលាដោយចារឈ្មោះ ព្រមទាំងលទ្ធិ ឬទ្រឹស្តីរបស់លោកប្រធានាធិបតីចិនសព្វថ្ងៃស៊ី ជីនពីងទៅក្នុងធម្មនុញ្ញរបស់គណបក្សកុម្មុយនិស្ត។ ការចារឈ្មោះ និងលទ្ធិរបស់លោកស៊ី ជីនពីងទៅក្នុងធម្មនុញ្ញរបស់គណបក្សកុម្មុយនិស្ត គឺជាការផ្តល់ និងការពង្រឹងអំណាចបន្ថែមឲ្យលោកស៊ី ជីនពីងក្នុងតំណែងជាអគ្គលេខាធិការបក្ស និងជាប្រធានាធិបតី។
សូមជម្រាបជូនថា នីតិវិធីមួយនេះត្រូវបានគណបក្សកុម្មុយនិស្តផ្តើមអនុវត្តន៍តាំងពីជំនាន់លោកម៉ៅ សេទុងដែលជាស្ថានិកនៃសាធារណរដ្ឋប្រជាមានិតចិនក្នុងឆ្នាំ ១៩៤៩ និងបានធ្វើឡើងក្នុងពេលដែលលោកម៉ៅ សេទុងកំពុងកាន់អំណាច។ ដូច្នេះកិតិ្តយសដែលលោកគណបក្សកុម្មុយនិស្តបានផ្តល់ឲ្យលោកស៊ី ជីនពីងពេលនេះ គឺស្មើនឹងកិត្តិយសដែលលោកម៉ៅ សេទុងបានទទួលក្នុងពេលដែលលោកកំពុងកាន់អំណាច។
គួររម្លឹកជូនថា អតីតប្រធានាធិបតីចិនមុនលោកស៊ី ជីនពីងចំនួនពីររូប គឺលោក Jiang Zemin និងលោកហ៊ូ ជីនតាវត្រូវបានគណបក្សកុម្មុយនិស្តយកត្រឹមទ្រឹស្តីនយោបាយ ឬសេដ្ឋកិច្ចទៅចារក្នុងធម្មនុញ្ញរបស់បក្ស ក្រោយពីឥស្សរជនទាំងពីរចូលនិវត្តន៍ដោយមិនបានភ្ជាប់ឈ្មោះទៅជាមួយទេ។
តាំងពីក្រោយលោកម៉ៅ សេទុងមក គេឃើញមានតែលោកប្រធានាធិបតី Deng Xiaoping ម្នាក់គត់ដែលជាបិតាកំណែទម្រង់សេដ្ឋកិច្ចចិននាដំណាច់ទសវត្សឆ្នាំ ៧០ ត្រូវបានគណបក្សបញ្ជូលឈ្មោះទៅក្នុងធម្មនុញ្ញរបស់បក្ស តែបានធ្វើឡើងនៅក្រោយមរណៈភាពរបស់លោកក្នុងឆ្នាំ ១៩៩៧ ប៉ុណ្ណោះ ពោលមិនមែនក្នុងពេលកាន់អំណាចដូចលោកម៉ៅ សេទុង និងលោកស៊ី ជីនពីងឡើយ។
លោកស៊ី ជីនពីងទទួលបានអំណាចទាំងស្រុង
ការចារឈ្មោះនៅក្នុងធម្មនុញ្ញរបស់គណបក្សកុម្មុយនិស្តពេលនេះនឹងធ្វើឲ្យលោកស៊ី ជីនពីងក្លាយជាថ្នាក់ដឹកនាំចិនដ៏មានមហិទ្ធិឫទ្ធិជាងគេ គិតតាំងពី ៤០ឆ្នាំកន្លងទៅ។ នៅក្នុងសុន្ទរកថាជាង ៣ម៉ោងដែលបានថ្លែងនៅក្នុងមហាសន្និបាតបក្សកុម្មយនិស្តលើកទី១៩ លោកស៊ី ជីនពីងបានបញ្ជាក់ជាថ្មីម្តងទៀតអំពីមហាអំណាចចិនរុងរឿង និងទទួលបានការគោរព កោតខ្លាច បន្ទាប់ពីបានបាក់មុខខ្លាំងអស់ ១សតវត្សកន្លះ។ នៅក្នុងន័យនេះ លោកស៊ី ជីនពីងបានសន្យាកសាងកម្លាំងទ័ពមួយនៅជួរមុខក្នុងពិភពលោកពីពេលនេះដល់ឆ្នាំ ២០៥០ និងបង្កើនការ ការពារសង្គម និងវេជ្ជសាស្រ្ត។
បន្ទាប់មក លោកស៊ី ជីនពីងបាននិយាយពីនីតិរដ្ឋសង្គមនិយម ឬមួយក៏ធានាពីការរួមរស់ ចុះសម្រុងគ្នារវាងមនុស្ស និងធម្មជាតិ។ លោកស៊ី ជីនពីងបានយល់ឃើញថា ដើម្បីអាចសម្រេចកម្មវត្ថុទាំងនេះបាន គេត្រូវតែពង្រឹងអំណាចនយោបាយ មានន័យថា ការគ្រប់គ្រងការងាររបស់បក្ស រដ្ឋាភិបាល កងទ័ព និងសង្គមស៊ីវិលនឹងត្រូវស្ថិតក្រោមដំបូលរបស់ស្ថាប័នតែមួយ គឺថ្នាក់ដឹកនាំរបស់គណបក្សកុម្មុយនិស្ត។ អ្វីដែលលោកស៊ី ជីនពីងចង់និយាយគឺថា លោកជាអ្នកកាច់ចង្កូតប្រទេសនៅលើគ្រប់វិស័យទាំងអស់។ អំណាចធំធេងរបស់លោកស៊ី ជីនពីងនឹងត្រូវបញ្ជាក់ជាផ្លូវការនៅថ្ងៃពុធ ទី២៥ តុលាតាមរយៈការផ្លាស់ប្តូរសមាជិកទាំង ៧នាក់នៃគណៈកម្មាធិការអចិន្រ្តៃយ៍បក្សកុម្មុយនិស្ត។
នៅក្នុងចំណោមសមាជិកទាំង ៧នាក់នៃគណៈកម្មាធិការអចិន្រ្តៃយ៍បក្សកុម្មុយនិស្ត គឺមានលោកប្រធានាធិបតីស៊ី ជីនពីង និងលោកនាយករដ្ឋមន្រ្តីលី ខឺជាំងដែលនឹងនៅដដែល ចំណែកសមាជិក ៥នាក់ផ្សេងទៀតត្រូវប្តូរចេញដោយដល់អាយុចូលនិវត្តន៍។ តើឥស្សរជនដែលត្រូវចូលជំនួសជានរណា? តើជាមនុស្សជំនិតរបស់លោកស៊ី ជីនពីងដូចដែលគ្រប់គ្នាបានគិតឬ?។ បើដូច្នេះមែន លោកស៊ី ជីនពីងនឹងក្តោបក្តាប់អំណាចពេញដៃ រួមទាំងអំណាចលើគណៈកម្មាធិការអចិន្រ្តៃយ៍នៃការិយាល័យមជ្ឈិមបក្សកុម្មុយនិស្តផង។
ចាប់ពីពេលនេះតទៅ និងដោយមានឈ្មោះចារក្នុងធម្មនុញ្ញរបស់គណបក្ស លោកស៊ី ជីនពីងដែលមានអាយុ ៦៤ឆ្នាំ និងបានកាន់តំណែងប្រធានាធិបតីក្នុងឆ្នាំ ២០១៣ អាចកាន់តំណែងប្រមុខរដ្ឋដដែលនេះអស់មួយជីវិត ដរាបណាលោកនៅមានដង្ហើម និងមានកម្លាំងកំហែងមាំមួនដោយលែងបារម្ភពីការស្វែងរកអ្នកស្នងតំណែងពីលោកទៀតឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ