អាជ្ញាធរប៉ាពូអាស៊ីនូវែលហ្គីណេរុះរើជំរំជនភៀសខ្លួនរបស់អូស្រ្តាលីនៅកោះម៉ានុស
នៅថ្ងៃសុក្រ ទី១០ វិច្ឆិកា អាជ្ញាធរនៃប្រទេសប៉ាពូអាស៊ីនូវែលហ្គីណេបានកម្ទេចជំរំជនភៀសខ្លួនរបស់អូស្រ្តាលីនៅកោះម៉ានុស (Manus) ព្រមទាំងកាត់ផ្តាច់ប្រព័ន្ធទឹក និងភ្លើងអគ្គិសនី។ ប្រតិបត្តិការវាយកម្ទេចនេះបានធ្វើឡើងតែប៉ុន្មានម៉ោង មុននឹងឱសានវាទជម្លៀសជនភៀសខ្លួនចេញពីជំរំនោះឈានដល់ទីបញ្ចប់។ គួររម្លឹកជូនថា ជំរំជនភៀសខ្លួនមួយនេះរបស់អូស្រ្តាលីនៅលើទឹកដីប៉ាពូអាស៊ីនូវែលហ្គីណេត្រូវបានអូស្រ្តាលីសម្រចបិទទ្វារជាផ្លូវការកាលពីថ្ងៃទី៣១ តុលា។
ចុះផ្សាយនៅថ្ងៃ៖
ស្តាប់ - ០២:២២
តាមគម្រោង អាជ្ញាធរប៉ាពូអាស៊ីនូវែលហ្គីណេបានទុកពេលរហូតដល់ថ្ងៃសៅរ៍ ទី១១ វិច្ឆិកាដើម្បីឲ្យជនភៀសខ្លួនប្រមាណជា ៦០០នាក់ចាកចេញពីជំរំជនភៀសខ្លួនម៉ានុសដោយស្ម័គ្រចិត្ត ហើយកម្លាំងប៉ូលិសនឹងចេញប្រតិបត្តិការជម្លៀសពួកគេ បើពួកគេមិនព្រមចាកចេញទេនោះ។ តែសាក្សីផ្តល់ដោយជនភៀសខ្លួនបានឲ្យដឹងនៅថ្ងៃសុក្រ ទី១០ វិច្ឆិកានេះថា កម្លាំងប៉ូលិសបានផ្តើមកម្ទេចជម្រក និងកាត់ផ្តាច់បណ្តាញទឹកស្អាត ព្រមទាំងបណ្តាញអគ្គិសនី។
ជនភៀសខ្លួនអ៊ីរ៉ង់លោកបូឆានីបានថ្លែងថា កម្លាំងប៉ូលិសរួមសហការណ៍ជាមួយកម្លាំងអន្តោប្រវេសន៍បានរុះរើជម្រករបស់ជនភៀសខ្លួន ព្រមទាំងវាយបំបែកធុងសម្រាមដែលជនភៀសខ្លួនប្រើដើម្បីត្រងទឹកភ្លៀង។ តាមរូបលោកបូឆានីដដែល របាំងសន្តិសុខដែលព័ទ្ធជុំវិញជំរំក៏ត្រូវបានកម្លាំងប៉ូលិសផ្តើមរុះរើដកចេញតាំងពីថ្ងៃព្រហស្បតិ៍ ទី៩ វិច្ឆិកាមកម្ល៉េះ។ ជនភៀសខ្លួនម្នាក់ទៀតជាជនជាតិស៊ូដង់បានបង្ហាញរូបថតបុរសម្នាក់ដែលកំពុងកម្ទេចជម្រកជំរំ និងធុងសម្រាមជាច្រើនដែលទទេស្អាតគ្មានទឹកមួយដំណក់សោះ។
ទន្ទឹមនឹងសាក្សីរបស់ជនភៀសខ្លួន សមាគមសិទ្ធិមនុស្សអូស្រ្តាលីឈ្មោះ GetUp ក៏បានផ្សព្វផ្សាយនៅថ្ងៃសុក្រ ទី១០ វិច្ឆិកានេះនូវខ្សែអាត់វីដេអូមួយដែលបង្ហាញពីលក្ខខណ្ឌជីវិតលំបាកលំបិនរបស់ជនភៀសខ្លួន ពិសេសរូបភាពជនភៀសខ្លួនដេកលើតុ និងរណ្តៅដែលពួកគេជីកដើម្បីរកប្រភពទឹក។ល។ និង។ល។ លោកស្រី Shen Narayanasamy សហប្រធានសមាគម GetUp បានថ្លែងថា សេចក្តីស្លាប់ និងជម្ងឺធ្ងន់ធ្ងរនឹងកើតមានលើជនភៀសខ្លួនដោយចៀសមិនរួចនៅពេលខាងមុខ។
សូមរម្លឹកជូនថា អូស្រ្តាលីបានសាងសង់ជំរំជនភៀសខ្លួននៅកោះម៉ានុសក្នុងទឹកដីប៉ាពូអាស៊ីនូវែលហ្គីណេដើម្បីដាក់ជនភៀសខ្លួនដែលកំពុងសុំសិទ្ធិជ្រកកោណនៅអូស្រ្តាលី។ តែក្រោយពីអង្គការសិទ្ធិមនុស្ស និងអង្គការក្រៅរដ្ឋាភិបាលបានបរិហារលើលក្ខខណ្ឌរស់នៅរបស់ជនភៀសខ្លួនមក អូស្រ្តាលីក៏បានសម្រេចបិទជំរំនៅម៉ានុសជាស្ថាពរកាលពីថ្ងៃទី៣១ តុលាដោយបញ្ជូនជនភៀសខ្លួនទាំង ៦០០នាក់ទៅដាក់នៅជំរំជនភៀសខ្លួន ៣ផ្សេងវិញ។ តែជនភៀសខ្លួនភាគច្រើនមិនព្រមចាកចេញដោយបារម្ភពីសន្តិសុខប្រឈមនឹងភាពស្អប់របស់ពលរដ្ឋប៉ាពូអាស៊ីនូវែលហ្គីណេមួយចំនួន។ ចំណែកតុលាការកំពូលប៉ាពូអាស៊ីនូវែលហ្គីណេក៏យល់ឃើញថា ជំរំជនភៀសខ្លួនម៉ានុសបានបង្កើតឡើងខុសនឹងច្បាប់រដ្ឋធម្មនុញ្ញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ