អតីតកីឡាករគ្រីតកេត ឈ្នះឆ្នោតនៅប៉ាគីស្ថាន
ចុះផ្សាយនៅថ្ងៃ៖
ស្តាប់ - ០៥:៣៣
អតីតកីឡាករគ្រីកេត ដែលជាមេដឹកនាំបក្សប្រឆាំង ប្រកាសថាខ្លួនជាអ្នកឈ្នះក្នុងការបោះឆ្នោតជាតិប៉ាគីស្ថាន បើទោះជាគណបក្សកាន់អំណាចផុតអាណត្តិធ្វើការតវ៉ាប្រឆាំងនឹងលទ្ធផលបោះឆ្នោតក៏ដោយ។ បើតាមលទ្ធផលបណ្តោះអាសន្ន នៅព្រឹកថ្ងៃសុក្រទី ២៧កក្កដានេះ គណបក្សចលនាដើម្បីយុត្តិធម៌របស់លោក អ៊ីមរ៉ាន ខាន់ បានទទួលជោគជ័យ ប៉ុន្តែពុំទទួលបានសំឡេងភាគច្រើនដាច់ខាត សម្រាប់បង្កើតរដ្ឋាភិបាលម្នាក់ឯងបានទេ។
ការរាប់សន្លឹកឆ្នោតនៅមិនទាន់ចប់សព្វគ្រប់ទេ ! បើលទ្ធផលបណ្តោះអាសន្នមួយភាគ ដែលគេអាចឆែកមើលបាន តាមវិបសៃត៍អ៊ីនធ័រនែត គណបក្ស Tehreek –e Insaf (PTI) របស់លោក អ៊ីមរ៉ាន ខាន់ កំពុងនាំមុខគេ ដោយនឹងអាចទទួលបានអាសនៈចំនួន ១១៤ លើអាសនៈសរុបទាំង២៧២។ ជាការឈ្នះនាំមុខគណបក្សកាន់អំណាច (៦៣អាសនៈ) ជាគូប្រជែងឆ្ងាយខ្លាំងណាស់។ គណបក្សប្រជាជនប៉ាគីស្ថាន បានទទួលសំឡេងប្រមាណតែ៤៣អាសនៈ។
វិញ្ញាសាប្រឈម
ប៉ុន្តែ ដើម្បីអាចដឹកនាំប្រទេស និងបង្កើតរដ្ឋាភិបាលតែម្នាក់ឯង គេត្រូវការមានសំឡេងគាំទ្រដាច់ខាត ដល់ទៅ ១៣៧ឯណោះ។ គណបក្សចលនាដើម្បីយុត្តិធម៌បានក្លាយជាបក្សដ៏ធំជាងគេសម្រាប់រដ្ឋាភិបាលអាណត្តិថ្មី តែលោក អ៊ីមរ៉ាន ខាន់ ចាំបាច់ត្រូវតែបង្កើតរដ្ឋាភិបាលចម្រុះ។ គេនៅមិនទាន់ដឹងនៅឡើយទេ មិនថា លោក អ៊ីមរ៉ាន ខាន់ នឹងធ្វើការជាមួយ គណបក្សឯករាជ្យតូចៗ ឬក៏ងាកទៅសហការជាមួយក្រុមអ្នកផ្តាច់ខ្លួនចេញពីបក្សធំៗ ពោលគឺពីបក្សសម្ព័ន្ធមូស្លីមកំពុងកាន់អំណាច ឬជាមួយបក្សប្រជាជនប៉ាគីស្ថាន។
តាំងពីល្ងាចមិញ លោក អ៊ីមរ៉ាន ខាន់ បានបង្ហាញភាពជឿជាក់នឹងជោគជ័យ ដោយបានថ្លែងសុន្ទរកថា យ៉ាងវែង រយៈពេលកន្លះម៉ោង តាមកញ្ចក់ទូរទស្សន៍ជាតិ លម្អិតអំពីទិសដៅដឹកនាំប្រទេស និងអាទិភាពរបស់រដ្ឋាភិបាលបាគីស្ថានថ្មី ធ្វើដូចជាលោកនឹងបានក្លាយជាអ្នកដឹកនាំប៉ាគីស្ថានថ្មី យ៉ាងពិតៗ។ នាឱកាសនោះលោកបានច្រានចោលរាល់គ្រប់ពាក្យចោទប្រកាន់របស់នយោបាយផ្សេងទៀត ជុំវិញភាពមិនប្រក្រតីនៃការបោះឆ្នោត។
បក្សកាន់អំណាចប្រឆាំងនឹងលទ្ធផល តាំងពីដំបូងភ្លាម។ បក្សផ្សេងទៀតបរិហារអំពីភាពប្រក្រតីនៃក្នុងពេលបោះឆ្នោត។ ឮសូរថាមានគណបក្សមួយត្រៀមរៀបចំធ្វើបាតុកម្មប្រឆាំងនឹងលទ្ធផលឆ្នោតផង បរិបទបែបនេះចង់មិនចង់ ត្រូវតែបង្កឱ្យមានភាពសង្ស័យលើលទ្ធផលឆ្នោតហើយ និងរុញច្រានប្រទេសឱ្យធ្លាក់ក្នុងអស្ថិរភាពនយោបាយ។ ដូច្នេះមិនថាលោក អ៊ីមរ៉ាន ខាន់ ឬនរណាផ្សេងទេ ក៏មិនអាចឡើងមកដឹកនាំប្រទេសប្រកបដោយប្រសិទ្ធិភាពបានដែរ បើពាក់កណ្តាលប្រទេសជឿថាមានយោធានៅពីក្រោយ ជួយឱ្យបានឈ្នះ មិនដោយសារសំឡេងពលរដ្ឋពិតនោះ។
ទស្សនៈវិស័យនយោបាយរបស់លោក អ៊ីមរ៉ាន ខាន់
ថ្វីបើលោកត្រូវបានគេចាត់ទុកជាមនុស្សចូលចិត្តចែចង់ក្រុមលោកខាងលិចមែន ប៉ុន្តែលោកក៏ជាមនុស្សអភិរក្ស និងជឿស៊ប់លើប៉ាគីស្ថាន លោក អ៊ីមរ៉ាន ខាន់ បានផ្តល់អាទិភាពដឹកនាំប្រទេសរបស់ដំបូង ទៅលើសេដ្ឋកិច្ច ស្រោចស្រង់ប៉ាគីស្ថានចេញពីបញ្ជីខ្មៅប្រទេសគាំទ្រភេរវនិយម ប្រយុទ្ធប្រឆាំងនឹងអំពើពុករលួយ។ លើវិស័យការបរទេសវិញ លោកបានសន្យានឹងធ្វើឱ្យមានទំនាក់ទំនងស្មើភាពជាមួយសហរដ្ឋអាមេរិក និងត្រៀមខ្លួនចរចាដោះស្រាយជម្លោះកាស្មៀដ៏រសើបជាមួយឥណ្ឌាផង។
ទស្សនៈវិស័យនយោបាយរបស់លោក អ៊ីមរ៉ាន ខាន់ ផ្តោតខ្លាំងទៅលើការអភិវឌ្ឍធនធានមនុស្ស ដោយសន្យាផ្តល់ការសិក្សាដល់កុមារប៉ាគីស្ថានគ្រប់រូប (ព្រោះពេលនេះកុមារប៉ាគីស្ថាន២៥%មិនបានចូលសាលាទេ) និងប្រឹងសាកល្បងលើកស្ទួយប្រជាពលរដ្ឋ ឱ្យចេញពីភាពក្រីក្រខ្លាំង ដែលបាគីស្ថានរាប់ឃើញមានដល់ទៅប្រមាណ៤៥%។
លោក អ៊ីមរ៉ាម ខាន់ គ្រោងចាត់ចែងដឹកនាំប្រទេសឡើងវិញ តែក្នុងរយៈពេល ១០០ថ្ងៃ។ លោកមានគម្រោងសន្យានឹងស្វែងរកទីផ្សារការងារ ជូនពលរដ្ឋឱ្យបាន១០លាននាក់ និងសាងសង់លំនៅដ្ឋានថ្មី៥លានខ្នង។ ប៉ុន្តែគ្មានអ្នកវិភាគ ណាម្នាក់ គិតថាសំណើនិងទស្សនៈវិស័យនយោបាយលោក ខាន់ អាចធ្វើទៅកើតដោយជាក់ស្តែងឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ