អាមេរិកចង់លុបជំនួយ៣០០លានដុល្លារពីប៉ាគីស្ថាន
ក្រសួងការពារជាតិអាមេរិក ចង់លុបចោលទៅវិញ ជំនួយ៣០០លានដុល្លារ ដែលអាមេរិកធ្លាប់បានសន្យាជួយប៉ាគីស្ថាន ពីមុន។ មូលហេតុមកពីប៉ាគីស្ថាន មិនបានបញ្ចេញសកម្មភាពជាក់លាក់ ស្របតាមយុទ្ធសាស្ត្រអាមេរិក ក្នុងការប្រយុទ្ធប្រឆាំងនឹងការគំរាមកំហែងរបស់ពួកអ៊ីស្លាមជ្រុលនិយម នៅក្នុងតំបន់។
ចុះផ្សាយនៅថ្ងៃ៖
ដោយហេតុតែប៉ាគីស្ថាន គ្មានបញ្ចេញសកម្មភាពច្បាស់លាស់ បន្ថែមពីលើយុទ្ធសាស្ត្រអាមេរិកសម្រាប់អាស៊ីខាងត្បូង ទឹកប្រាក់ជំនួយ ៣០០លានដុល្លារ បូកថែមទាំងមូលនិធិមិនមែនសម្រាប់ប៉ាគីស្ថានផង នឹងត្រូវបង្វែរយកទៅប្រើនៅក្នុងកម្មវិធីផ្សេងដែលបន្ទាន់ជាង កាលពីខែមិថុនានិងកក្កដា២០១៨វិញ។
អាមេរិកផ្តល់ជំនួយឱ្យប៉ាគីស្ថាន ដើម្បីឱ្យអាជ្ញាធរប៉ាគីស្ថានប្រយុទ្ធកម្ចាត់ក្រុមប្រដាប់អាវុធអ៊ីស្លាមជ្រុលនិយមនៅតាមតំបន់ជាប់ព្រំប្រទល់ជាមួយអាហ្វហ្កានីស្ថាន ប៉ុន្តែក្រុងអ៊ីស្លាមាបាតបែរជាបណ្តែតបណ្តោយ មិនដឹងមិនឮ ឬថែមទាំងបានសហការជាមួយពួកអ៊ីស្លាមជ្រុលនិយម និងពួកតាលីបង់។ នេះបើតាមសារចោទប្រកាន់របស់ក្រសួងការពារជាតិអាមេរិកផ្ញើមកកាន់ភ្នាក់ងារសារព័ត៌មានបារាំង។
កាលពីដើមឆ្នាំ អាមេរិកបានព្យួរជំនួយសន្តិសុខរាប់រយលានដុល្លារ ពីប៉ាគីស្ថានរួចម្តងហើយ និងបានព្រមានបង្កកជំនួយរហូត២ពាន់ដុល្លារទៀតផង។ សេចក្តីសម្រេចនេះ ធ្វើឡើងក្រោយសារទ្វីតរបស់លោក ត្រាំ ថាអាមេរិកចំណាយថវិកាអត់ប្រយោជន៍ជួយប៉ាគីស្ថានអស់៣៣ពាន់លានដុល្លារ ក្នុងរយៈ១៥ឆ្នាំ ដោយគ្មានបានអ្វីត្រលប់មកវិញទេ ក្រៅពីការភូតភរ ការម៉ាក់ងាយមេដឹកនាំអាមេរិកថាល្ងីល្ងើទេ។ ប៉ាគីស្ថានផ្តល់ជម្រកឱ្យពួកភេរវជន ដែលអាមេរិកបណ្តេញពីអាហ្វហ្កានីស្ថាន !”
តាមការពិត ប៉ាគីស្ថានបានបើកយុទ្ធនាការយ៉ាងសន្ធាប់ប្រឆាំងនឹងក្រុមប្រដាប់អាវុធអ៊ីស្លាមជ្រុលនិយមមួយចំនួន ដែលគំរាមកំហែងសន្តិសុខជាតិ ប៉ុន្តែមិនគ្រប់គ្រាន់សម្រាប់ក្រសែភ្នែកអាមេរិកឡើយ។ កាលពីខែមីនា អ្នកទទួលខុសត្រូវអាមេរិកម្នាក់បានព្រលយថា ប៉ាគីស្ថានធ្វើសកម្មភាពតិចតួចបំផុត ដើម្បីកុំឱ្យមិនធ្វើតាមសំណើអាមេរិកតែប៉ុណ្ណោះ គឺមិនបានប្រើអស់កម្លាំងនិងសមត្ថភាពរបស់ពួកគេឡើយ។ មានពួកអ៊ីស្លាមជ្រុលនិយមជាច្រើនក្រុមផ្សេង ដែលប៉ងវាយប្រហាររដ្ឋាភិបាល និងវាយប្រហារលើទាហានអាមេរិកនៅអាហ្វហ្កានីស្ថាន ឱ្យស្លាប់អស់ជាច្រើននាក់។ ហេតុដូច្នេះហើយបានជាអាមេរិកត្រូវតែបន្តដាក់គំនាប ដើម្បីឱ្យប៉ាគីស្ថានវាយដៅលើគ្រប់ក្រុមភេរវនិយមដោយគ្មានការអើសអើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ