ប្រមុខការទូតអាមេរិកនឹងទៅព្យុងយ៉ាងនៅខែក្រោយដើម្បីរៀបចំជំនួបកំពូល ត្រាំ-គីម
នៅថ្ងៃពុធម្សិលមិញ រដ្ឋមន្ត្រីការបរទេសអាមេរិក លោក ម៉ាយ ប៉ុមប៉េអូ បានជួបពិភាក្សាជាមួយរដ្ឋមន្ត្រីការបរទេសកូរ៉េខាងជើង លោក រី យ៉ុងហូ Ri Yong Ho នៅអង្គការសហប្រជាជាតិ។ ជាជំនួបដ៏វិជ្ជមាន ! នេះបើតាមប្រសាសន៍របស់លោក ប៉ុមប៉េអូ ដោយប្រកាសបញ្ជាក់ថា លោកនឹងអញ្ជើញទៅព្យុងយ៉ាងជាថ្មី នៅខែតុលាខាងមុខ ដើម្បីរៀបចំជំនួបកំពូល លើកទីពីរ រវាង លោក ដូណាល់ ត្រាំ និងលោក គីម ជុងអ៊ុន។
ចុះផ្សាយនៅថ្ងៃ៖ កែប្រែថ្ងៃទី៖
ក្រសួងការបរទេសអាមេរិក បានគូសបញ្ជាក់ថា លោកប្រមុខការទូត ប៉ុមប៉េអូ បានជួបជជែកជាមួយសមភាគីកូរ៉េខាងជើង នៅញូវយ៉ក និងព្រមធ្វើដំណើរទៅក្រុងព្យុងយ៉ាង (ជាលើកទីបួនក្នុងរយៈពេលតែមួយឆ្នាំ) នៅខែតុលា តាមការអញ្ជើញរបស់លោក គីម ជុងអ៊ុន ដើម្បីរៀបចំជំនួបកំពូល ត្រាំ-គីម ជាលើកទីពីរ។
ជំនួបលើកទីមួយរវាងលោកដូណាល់ ត្រាំនិងលោកគីមជុងអ៊ុន បានប្រព្រឹត្តទៅកាលពីថ្ងៃទី ១២ មិថុនានៅសិង្ហបុរី។ នាពេលនោះ ប្រមុខដឹកនាំកូរ៉េខាងជើង បានប្រកាសប្រឹងលុបបំបាត់នុយក្លេអ៊ែរឱ្យអស់ពីឧបទ្វីបកូរ៉េ តែមិនបានសន្យាធ្វើបញ្ជីរាយឈ្មោះអាវុធនុយក្លេអ៊ែររបស់ខ្លួន និងក៏មិនសន្យាលុបរំសាយដោយគ្មានថ្ងៃត្រលប់វិញមកផលិតគ្រាប់បែកបរមាណូ ដូចការទាមទាររបស់វ៉ាស៊ីនតោនឡើយ។
ប៉ុន្តែការនេះប្រើពេលវេលា ! ថ្វីបើផ្លូវនៅវែងឆ្ងាយ តែយើងបន្តដើរទៅមុខ ! ការរំសាយកម្មវិធីនុយក្លេអ៊ែរកូរ៉េខាងជើង បានបោះជំហានថ្មីទៅមុខមួយជំហានទៀត ! នេះបើតាមសារទ្វីតរបស់លោកប៉ុមប៉េអូ។
លោកដូណាល់ត្រាំ បានប្រកាសទៅកាន់អ្នកសារព័ត៌មានពីអង្គការសហប្រជាជាតិថា អាមេរិកនិងកូរ៉េខាងជើងមានទំនាក់ទំនងល្អប្រសើរណាស់ ហើយលោកនឹងប្រកាសអំពីទីកន្លែង និងថ្ងៃខែនៃជំនួបជាលើកទីពីរជាមួយលោកគីម ជុងអ៊ុន ក្នុងពេលឆាប់ៗខាងមុខ។
ចុះតើអាមេរិកមានលក្ខខណ្ឌអ្វីដាក់ឱ្យកូរ៉េខាងជើងអនុវត្តមុននឹងមានជំនួបដែរឬទេ ?! ព្យុងយ៉ាងនិងវ៉ាស៊ីនតោន បានសម្រេចការទៅមុខច្រើន តាំងពីឆ្នាំមុនមក ! កូរ៉េខាងជើងកំពុងរំសាយកម្មវិធីនុយក្លេអ៊ែរហើយ ! នេះជាចម្លើយរបស់លោកដូណាល់ ត្រាំ ដោយអះអាងទៀត លោកមិនត្រូវការដាក់កំហិតពេលវេលាដាច់ខាតត្រូវរំសាយនុយក្លេអ៊ែរឡើយ ពីរឆ្នាំ -បីឆ្នាំ ឬ៥ខែ មិនសំខាន់ទេ ! ព្រោះនេះមិនមែនជាការរត់ប្រណាំងឡើយ !
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ