តៃវ៉ាន់ ៖ បាតុកម្មទាមទាររៀបចំប្រជាមតិសុំផ្តាច់ខ្លួនជាផ្លូវការពីចិន
ប្រជាពលរដ្ឋតៃវ៉ាន់ ប្រមាណជាមួយសែននាក់ បាននាំគ្នាចុះថ្នល់ធ្វើបាតុកម្ម នៅថ្ងៃ សៅរ៍ទី ២០ តុលានេះ នៅក្រុងតៃប៉ិ ដើម្បីទាមទារឱ្យរដ្ឋាភិបាលតៃវ៉ាន់ រៀបចំប្រជាមតិសុំឯករាជ្យឱ្យកោះ។ ជាការប្រមូលផ្តុំដ៏ធំបំផុត ដែលមិនធ្លាប់មានពីមុនមកទេ និងដែលប្រាកដជាធ្វើឱ្យប៉េកាំង ដែលកំពុងប្រើគ្រប់មធ្យោបាយផ្តាច់តៃវ៉ាន់ពីឆាកអន្តរជាតិ ក្តៅក្រហាយខ្លាំងជាក់ជាពុំខាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៧
នេះជាលើកទីមួយហើយ គិតចាប់តាំងពីតៃវ៉ាន់បានក្លាយជាកោះប្រជាធិបតេយ្យមក ដែលមានការប្រមូលផ្តុំធ្វើបាតុកម្ម ទ្រង់ទ្រាយធំខ្លាំង សុំរៀបចំធ្វើប្រជាមតិ ដើម្បីប្រកាសទាមទារឯករាជ្យកោះជាផ្លូវការយ៉ាងដូច្នេះ។
ផ្តួចផ្តើមដោយសម្ព័ន្ធFormose និងគាំទ្រដោយអតីប្រធានាធិបតីកោះតៃវ៉ាន់ លោក លី តេហុយ Lee Teng-hui និងលោក ឆេង ស្ហ៊ុយបៀន Cheng Shui-bian បាតុករជាអ្នកឯករាជនិយមជាងមួយសែននាក់ ដែលភាគច្រើនជាមនុស្សវ័យចំណាស់ ព្រមទាំងអង្គការសមាគមសាសនា អ្នកគាំទ្រឯករាជ្យផង បានមកប្រមូលផ្តុំគ្នានៅមុខទីស្នាក់ការបក្សប្រជាធិបតេយ្យដែលបក្សកាន់អំណាច លើកបដា គ្រវីទង់ជាតិ ស្រែកសុំធ្វើប្រជាមតិទាមទារ ឯករាជ្យ ប្រឆាំងការវាតទីចង់មកក្រសោបគ្រប់គ្រងរបស់ចិន។
សម្រាប់ក្រុមបាតុករ មានតែការធ្វើប្រជាមតិទេ ទើបប្រពលរដ្ឋតៃវ៉ាន់អាចបង្ហាញសហគមន៍អន្តរជាតិទាំងមូល អំពីសិទ្ធនៃការស្ថាបនាប្រទេសមួយឯករាជ្យ ! ហើយដល់វេលាដែលតៃវ៉ាន់ ត្រូវហ៊ានបញ្ចេញសកម្មភាព ធ្វើជាម្ចាស់លើខ្លួនឯង ក្លាយជាប្រទេសមួយដ៏ពេញលេញ និងមិនលេបត្របាក់បាត់ដោយចិនដីគោក។
ចិនតៃវ៉ាន់ និងចិនដីគោក (ប៉េកាំង) ត្រូវបែកខ្ញែកជាពីរ ដឹកនាំដោយរបបពីរប្រឈមគ្នាតាំងពីឆ្នាំ១៩៤៩មក។ ឆ្នាំដែលមានសង្គ្រាមស៊ីវិលរវាងពួកកុម្មុយនិស្តបង្កើតឡើងនៅប៉េកាំង និងក្រុមជាតិនិយមចិនគួមីនតាង និរទេសខ្លួនមកតៃប៉ិ។ តៃវ៉ាន់តែងចាត់ទុកខ្លួនឯងជារដ្ឋ តែមិនដែលបានសុំទាមទារឯករាជ្យទាល់តែសោះ។ ចំណែកប៉េកាំង តែងចាត់ទុកកោះតៃវ៉ាន់ ជាដែនដីភាគមួយរបស់ចិន និងបានថែមទាំងគំរាមប្រើកម្លាំងយោធាក្រសោបយកកោះតែម្តងផង ប្រសិនបើតៃវ៉ាន់ហ៊ានប្រកាសសុំផ្តាច់ខ្លួនជាផ្លូវការ។
បាតុកម្មនេះត្រូវបានរៀបចំឡើងក្នុងខណៈដែលប៉េកាំងកំពុងបង្កើនសកម្មភាពដាក់តៃវ៉ាន់ឱ្យឯកា លើឆាកអន្តរជាតិ ឆក់យកសម្ព័ន្ធមិត្តមួយម្តងៗពីតៃវ៉ាន់ និងដាក់គំនាបលើក្រុមហ៊ុនបរទេសឱ្សសរសេរថាតៃវ៉ាន់ជាខេត្តមួយរបស់ចិន …
បាតុកម្មនេះក៏កំពុងរុញច្រានឱ្យលោកស្រីប្រធានាធិបតីតៃវ៉ាន់ ឆៃ អ៊ីងវេន Tsai Ing-wen កំពុងស្ថិតក្នុងជំហរដ៏លំបាក ណាត្រូវទ្រាំនឹងព្រនង់របស់មហាយក្សចិន ណាត្រូវទប់ទល់នឹងរលកឯករាជ្យផ្ទៃក្នុង។ លោកស្រី ឆៃ អ៊ីងវេន ក៏មានប្រវត្តិនិងប្រពៃណីជាអ្នកឯករាជនិយមដែរ ប៉ុន្តែប្រកាន់ជំហររក្សាStatut quo ជាមួយប៉េកាំង។ ម្យ៉ាងវិញទៀត ដើម្បីអាចរៀបចំប្រជាមតិបាន គេត្រូវធ្វើវិសោធនកម្មច្បាប់រដ្ឋធម្មនុញ្ញដែលហាមឃាត់មិនឱ្យមានបោះឆ្នោតណាប៉ះពាល់ប្តូរច្បាប់និងអធិបតេយភាពទេ។
បើតាមអ្នកវិភាគលោកស្រី ឆៃ អ៊ីងវេន ទំនងជាគ្មានថ្ងៃធ្វើវិសោធកម្មច្បាប់ ដែលដូចជាទៅដាស់យក្សចិនឱ្យមកក្រញេញតៃវ៉ាន់ឡើយ។ លោកស្រីប្រធានាធិបតីបានហាមឃាត់សកម្មជនបក្សទាំងអស់មិនឱ្យចូលរួមជាមួយចលនាបាតុកម្មពលរដ្ឋនេះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ