តៃវ៉ាន់អំពាវនាវសុំឱ្យពលរដ្ឋកុំចាញ់សម្លុតចិន
ប្រធានាធិបតីតៃវ៉ាន់ លោកស្រី ឆៃ អ៊ីងវេន Tsai Ing-wen បានប្រកាស នៅថ្ងៃនេះ ឱ្យតៃវ៉ាន់រួបរួមគ្នា កុំចាញ់សម្លុតប៉េកាំងឱ្យសោះ។ ជាសេចក្តីអំពាវនាវ លើកទឹកចិត្តឱ្យតៃវ៉ាន់ ដែលធ្វើឡើងក្នុងថ្ងៃខួប៦០ឆ្នាំនៃការចូលលុកលុយទម្លាក់គ្រាប់បែកលើកោះគីនម៉េន របស់តៃវ៉ាន់ ពីសំណាក់យោធាប្រជាមានិតចិន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៩
ខួប៦០ឆ្នាំនៃបើកយុទ្ធនាការវាយប្រហារលើកោះ គីនម៉េន ដែលតៃវ៉ាន់ហៅថា “ការទម្លាក់គ្រាប់បែក៨២៣” ប្រព្រឹត្តទៅក្នុងខណៈដែលចិនប្រជាមានិតកំពុងខ្នះខ្នែង ផ្តាច់តៃវ៉ាន់ ឱ្យនៅកាន់តែឯកាលើឆាកអន្តរជាតិ។ ប៉ុន្តែទិវានេះ គឺឱកាសរំលឹកដាស់ តៃវ៉ាន់កុំឱ្យភ្លេចស្មារតីនៃការរួបរួមគ្នា និងចងចាំថាតើតៃវ៉ាន់ខ្លាំងប៉ុណ្ណានៅពេលរួបរួមគ្នា! នេះជាសេចក្តីប្រកាសរបស់លោកស្រីប្រធានាធិបតីនៅក្នុងទំព័រហ្វេសប៊ូក ដោយអះអាងបន្ថែមទៀតថាតៃវ៉ាន់ជ្រើសរើសសន្តិភាព តែតៃវ៉ាន់មិនទាន់មានសន្តិសុខជាតិពេញលេញទេ។
សូមបញ្ជាក់ថា កាលពីឆ្នាំ១៩៥៨ យោធាចិនប្រជាមានិតបានបើកយុទ្ធនាការបាញ់កាំភ្លើងធំ ៤៧០០០០គ្រាប់ មកលើកោះគីនម៉េន និងកូនកោះជាប់ៗនោះ ដែលជារបស់តៃវ៉ាន់ តែនៅចម្ងាយប្រមាណតែ ២គីឡូម៉ែត្រពីកោះហ្សាមែនរបស់ចិន។ យុទ្ធនាការយោធានោះ រយៈពេល៤៤ថ្ងៃ បានសម្លាប់ជីវិតជនតៃវ៉ាន់អស់៦១៨នាក់។
នៅក្នុងការប្រារព្ធពិធីរំលឹកវិញ្ញាណក្ខន្តជនរងគ្រោះនៅកោះគីនម៉េន រដ្ឋមន្ត្រីក្រសួងការពារជាតិ យល់ថាកងទ័ពតៃវ៉ាន់ពេលនេះ ត្រូវតែត្រៀម “ប្រយុទ្ធ” ឱ្យបានជាស្រេច ព្រោះការគំរាមកំហែងចិនមានកាន់តែធំៗឡើងជានិច្ច។
តាំងពីសង្គ្រាមស៊ីវិលឆ្នាំ១៩៤៩មក ចិនដីគោកស្ថិតក្រោមការដឹកនាំកុម្មុយនិស្ត ឯក្រុមអ្នកជាតិនិយមចិន រស់ភៀសខ្លួនទៅដឹកនាំតៃវ៉ាន់។ តៃវ៉ាន់តាំងខ្លួនជាប្រទេសមួយ តែមិនដែលបានប្រកាសទាមទារឯករាជ្យ និងមិនត្រូវបានទទួលស្គាល់ដោយអង្គការសហប្រជាជាតិទេ។ ទំនាក់ទំនងរវាងចិននិងតៃវ៉ាន់ បានធ្លាក់ដុនដាបកាន់តែខ្លាំង ចាប់ពីឆ្នាំ២០១៦មក នៅពេលបក្សជាតិនិយមរបស់លោកស្រី ឆៃ អ៊ីនវិន បានឈ្នះឆ្នោត។
ប៉ុន្តែសម្រាប់ប៉េកាំង កោះតៃវ៉ាន់ជាខេត្តមួយរបស់ចិន ! ក្រោមផ្លាកនយោបាយចិនតែមួយ ប៉េកាំងមិនដែលលាក់បាំងមហិច្ឆតា ចង់ក្រសោបយកតៃវ៉ាន់ ដោយប្រើកម្លាំងទេ និងបានបង្កើនសកម្មភាពការទូតកាន់តែខ្លាំងឡើងៗ ដើម្បីដាក់តៃវ៉ាន់ឱ្យកាន់តែឯកាលើឆាកអន្តរជាតិ។ ជាក់ស្តែងកាលពីថ្ងៃអង្គារ ចិនបានទាក់ប្រទេសអេលសាល់វ៉ាដរ ឱ្យផ្តាច់ទំនាក់ទំនងជាមួយក្រុងតៃប៉ិ។ គិតមកត្រឹមថ្ងៃនេះ មានប្រទេសចំនួនតែ១៧នាក់ប៉ុណ្ណោះ ទទួលស្គាល់តៃវ៉ាន់ រួមមានវ៉ាទីកង់ ប្រទេសមួយនៅអាហ្វ្រិក ហើយបួនដប់ទៀតនៅតំបន់ប៉ាស៊ីហ្វិក និងអាមេរិកឡាទីន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ