កូរ៉េខាងជើងចង់យកគំរូសេដ្ឋកិច្ចតាមវៀតណាម ?
ចុះផ្សាយនៅថ្ងៃ៖
ស្តាប់ - ០៧:៤៧
បន្ទាប់ពីធ្វើដំណើរ ឆ្លងកាត់ប្រទេសចិន អស់រយៈពេលជាងពីរថ្ងៃ រថភ្លើងរបស់ប្រមុខដឹកនាំកូរ៉េខាងជើង គីម ជុងអ៊ុន បានមកដល់និងចូលចត ក្នុងស្ថានីយ៍ដ៏តូចមួយរបស់វៀតណាមហើយ នៅព្រឹកមិញ។ មុនចាប់ផ្តើមជំនួបកំពូលជាលើកទីពីរជាមួយប្រធានាធិបតីអាមេរិក លោក ដូណាល់ ត្រាំ ពីថ្ងៃទី ២៧-២៨កុម្ភៈ នៅថ្ងៃនេះប្រមុខដឹកនាំរបបកុម្មុយនិស្តព្យុងយ៉ាង បានឆ្លៀតបំពេញទស្សនកិច្ចផ្លូវរដ្ឋនៅវៀតណាម ប្រទេសដែលមានរបបឯកបក្សដូចគ្នា ដោយបានជួបសន្ទនាជាផ្លូវការជាមួយប្រធានាធិបតី វៀតណាម និងថ្នាក់ដឹកនាំមួយចំនួនផ្សេងទៀត។
ស្ថានីយ៍ដុងដង់វៀតណាម ជាប់ព្រំប្រទល់ជាមួយចិន ដែលធ្លាប់តែស្ងប់ស្ងាត់ បានក្លាយជាទីប្រមូលផ្តុំមនុស្សម្នា ទាហាន ប៉ូលិស ទាំងកងៗ អ្នកសារព័ត៌មានជាតិ-អន្តរជាតិ យ៉ាងច្រើនកុះករ តាំងពីយប់មិញ ទោះបីជាមានភ្លៀងធ្លាក់យ៉ាងជោគជាំក្តី។
ចុះពីរថភ្លើង ក្នុងទឹកមុខញញឹមពព្រាយ និងកាយវិការស្វាគមន៍ លោក គីមជុងអ៊ុន បានឡើងរថយន្ត ដើម្បីបន្តដំណើរទៅកាន់ក្រុងហាណូយ ដោយបើកកញ្ចក់លើកដៃស្វាគមន៍មហាជន និងក្រុមសិស្សានុសិស្សដែលឈរធ្វើជារបងមកទទួលលោក គ្រវីទង់ជាតិវៀតណាមនិងកូរ៉េខាងជើង។
ក្បួនរថយន្តជាង២០គ្រឿង នាំមុខដោយម៉ូតូប៉ូលិស និងយានយន្តសុវត្ថិភាព ត្រូវធ្វើដំណើរចម្ងាយ១៧០គីឡូម៉ែត្រទៀត ឆ្ពោះទៅរដ្ឋធានី ដែលក៏មានការទទួលស្វាគមន៍យ៉ាងអធិកអធមខ្លាំង។
មុននឹងផ្តើមជំនួបកំពូលជាមួយលោក ដូណាល់ ត្រាំ នៅថ្ងៃនេះ លោក គីម ជុងអ៊ុន កំពុងស្ថិតនៅក្រុងហាណូយ ក្នុងក្របខ័ណ្ឌនៃទស្សនកិច្ចផ្លូវរដ្ឋនៅវៀតណាម។
សម្ព័ន្ធភាពវៀតណាម-កូរ៉េខាងជើង
វៀតណាមនិងកូរ៉េខាងជើង មានទំនាក់ទំនងការទូតនឹងគ្នាតាំងពីឆ្នាំ១៩៥០មក។ វៀតណាម ជាប្រទេសនៅតំបន់អាស៊ីអាគ្នេយ៍ ដែលមានតម្លៃជានិម្មិត្តរូបបំផុតសម្រាប់ព្យុងយ៉ាង ព្រោះវៀតណាមក៏ជាប្រទេសមានរបបដឹកនាំឯកបក្ស និងធ្លាប់ពុះចែកជាពីរ ជាវៀតណាមខាងជើងនិងខាងត្បូង អស់រយៈពេល២០ឆ្នាំ ក្នុងអំឡុងសម័យសង្គ្រាមត្រជាក់ ដូចឧបទ្វីបកូរ៉េសព្វថ្ងៃនេះអញ្ចឹង។ កូរ៉េខាងជើងធ្លាប់ទាំងបានជួយគាំទ្រកុម្មុយនិស្តភាគខាងជើងវៀតណាម ក្នុងសម័យសង្គ្រាមវៀតណាមទៀតដោយបានបញ្ជូនកងទ័ពអាកាសមកធ្វើជាកម្លាំងជំនួយថែមទៀតផង។
តែទោះបីមានគោលនយោបាយស្របគ្នាយ៉ាងណាក៏ដោយ ក៏គេកម្រឃើញប្រមុខដឹកនាំ កូរ៉េខាងធ្វើដំណើរមកប្រទេសវៀតណាមណាស់។ ប្រមុខដឹកនាំកូរ៉េខាងជើង ដំបូងគេនិងចុងក្រោយដែលបានមកដល់ហាណូយ គឺលោក គីម អ៊ីលស៊ុង ជាជីតា កាលពីឆ្នាំ១៩៦១។
ហេតុដូច្នេះហើយបានគ្នាមើលឃើញ ដំណើរទស្សនកិច្ចផ្លូវរដ្ឋជាលើកទីមួយរបស់ប្រមុខ គីម ជុងអ៊ុន ថ្ងៃនេះ មិនមែនមានតម្លៃត្រឹមតែជាការបង្អួតបង្អាញប្រជាពលរដ្ឋកូរ៉េខាងជើងថា ចៅ កំពុងដើរតាមគន្លងរបស់ជីតាទេ តែគឺជាឱកាសរឹតចំណង និងពង្រឹងទំនាក់ទំនងរវាងគ្នា ឱ្យកាន់តែស្អិតល្មួតផង និងជាឱកាសសម្រាប់សិក្សាអំពីបម្រែបម្រួលដ៏វិជ្ជមាននៃសេដ្ឋកិច្ចនៅវៀតណាមផង។
ក្នុងវិស័យសេដ្ឋកិច្ចនេះ ការផ្តោះប្តូរសេដ្ឋកិច្ចទ្វេភាគី វៀតណាម-កូរ៉េខាងជើង បានចាប់ចុះថយ តាំងពីអង្គការសហប្រជាជាតិបានចេញសេចក្តីសម្រេចដាក់ទណ្ឌកម្មសេដ្ឋកិច្ចលើរបបព្យុងយ៉ាងមក។ ប្រទេសទាំងពីរ វិវឌ្ឍបញ្ច្រាសទិសគ្នា កូរ៉េខាងជើងក្លាយជាប្រទេសដ៏ក្រីក្របំផុតមួយ ឯវៀតណាមក្លាយជាប្រទេសមានស្វាហាប់ជាងគេបំផុតនៅក្នុងតំបន់។
កូរ៉េខាងជើងកំពុងសំលឹងឃើញគំរូសេដ្ឋកិច្ចវៀតណាម ?
សេដ្ឋកិច្ចស្វាហាប់ដែលកូរ៉េខាងជើងមិនបានមើលរំលងទេ។ ក្រោយពី បានប្រកាសសម្រេចជោគជ័យ តាំងខ្លួនជាមហាអំណាចនុយក្លេអ៊ែរ លោក គីមជុងអ៊ុន បានងាកមកផ្តល់អាទិភាពចំបងដល់វិស័យសេដ្ឋកិច្ចម្តង ដោយចង់យកគំរូតាមវៀតណាមផង។ នេះបើតាមគំនិតយល់ឃើញរបស់អ្នកវិភាគស្ថានការណ៍ជាច្រើនរូប។
ក្រោយសង្គ្រាមនៅកូរ៉េ (១៩៥០-៥៣) កូរ៉េខាងជើងជាប្រទេសមានបាន និងមានជាងកូរ៉េខាងត្បូងទៀត ដោយសារតែពេលនោះកូរ៉េខាងជើងមានជំនួយនិងការគាំទ្រពីសហភាពសូវៀត និងដោយសារសេចក្តីសម្រេចរបស់ជប៉ុន ផ្តុំការធ្វើអាណានិគមលើឧស្សាហកម្មដើម្បីប្រមូលធនធានរ៉ែនិងសក្កានុពលប្រព័ន្ធវារីអគ្គិសនី។ ប៉ុន្តែស្ថានភាព បានប្រែក្រលាស់។ សេដ្ឋកិច្ចកូរ៉េខាងជើង ដែលស្ថិតក្រោមការត្រួតត្រាបំផុតមួយតាំងពីយូរយារមកហើយនោះ មានចំណាត់ការមិនល្អ និងចាប់ត្រដរខ្យល់ កាន់តែខ្លាំងនៅពេលសហភាពសូវៀតដួលរលំទៅ។ បើតាមទិន្នន័យរបស់សេអ៊ូល កំរិតជីវភាពរបស់ពលរដ្ឋកូរ៉េខាងជើង បានធ្លាក់ទាបជាងកូរ៉េខាងត្បូងដល់ទៅជាង២០ដង។ ប៉េកាំងដែលជាបងធំ និងជាអ្នកការពាររបបព្យុងយ៉ាងលើផ្នែកការទូតនិងសេដ្ឋកិច្ចតែរហូតមកដែរនោះ បានជំរុញឱ្យប្អូនក្រោមបង្គាប់មួយនេះ យកគំរូសេដ្ឋកិច្ចរបស់ខ្លួន។
ប៉ុន្តែ កូរ៉េខាងជើងមិនចង់ទេ ! កូរ៉េខាងជើងចង់តែធ្វើយ៉ាងណាកាត់បន្ថយភាពរំពឹងលើចិនឱ្យបានច្រើនតាមតែអាចធ្វើទៅបានប៉ុណ្ណោះ ព្រោះចង់ឬមិនចង់ដោយសារទីតាំងភូមិសាស្ត្រ សេដ្ឋកិច្ចកូរ៉េខាងជើងត្រូវចងភ្ជាប់ដោយឯកឯងនឹងសេដ្ឋកិច្ចចិនស្រាប់ទៅហើយ (ការផ្តោះប្តូរពាណិជ្ជកម្មជាមួយចិនមានកំរិតដល់ទៅជាង៩០%ឯណោះ)។
ចង់ដកខ្លួនឱ្យបានឆ្ងាយពីចិន ហើយមិនចង់ខិតទៅជិតសហរដ្ឋអាមេរិក ទោះបីលោកដូណាល់ ត្រាំ បានប្រកាសសន្យាលើកស្ទួយសេដ្ឋកិច្ចកូរ៉េខាងជើងបានស្គាល់ភាពរុងរឿងយ៉ាងណាជាថ្នូរនឹងរំសាយកម្មវិធីនុយក្លេអ៊ែរក៏ដោយ។ ដូច្នេះគឺមានតែ វៀតណាម !
វៀតណាមប្រទេសកុម្មុយនិស្តឯកបក្ស ដែលបានចាប់បញ្ចូលទំនើបកម្មនយោបាយសេដ្ឋកិច្ច នៅឆ្នាំ១៩៨៦ បានលើកស្ទួយប្រទេសឱ្យខិតទៅរករបបមូលធននិយម តែរក្សាការពាររបបកុម្មុយនិស្តបានយ៉ាងល្អ ៖ តូចជាងចិន រដ្ឋាភិបាលកុម្មុយនិស្តអាចគ្រប់គ្រងអំណាចយ៉ាងពេញដៃ និងទទួលផលយ៉ាងប្រពៃពីសេដ្ឋកិច្ចទីផ្សារទៀត។ ហេតុដូច្នេះហើយបានជាកូរ៉េខាងជើងទំនងជាចាប់អារម្មណ៍នឹងគំរូសេដ្ឋកិច្ចវៀតណាមខ្លាំងជាងចិន និងកំពុងចង់រិះគិត ស្រង់ជាគំរូសម្រាប់ជំរុញការអភិវឌ្ឍកូរ៉េខាងជើង។
កាលពីខែវិច្ឆិកា កូរ៉េខាងជើងបានបញ្ជូនរដ្ឋមន្ត្រីការបរទេសខ្លួនមកវៀតណាមម្តងហើយ ហើយនៅលើកនេះលោកគីម ជុងអ៊ុនអញ្ជើញមកបំពេញទស្សនកិច្ចផ្លូវរដ្ឋដោយផ្ទាល់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ