បារាំង-ចិន៖លោកអេម៉ានុយអែល ម៉ាក្រុង និងលោកស៊ី ជីនពីងរួមដៃគ្នាការពារប្រព័ន្ធពហុភាគី
ថ្ងៃអង្គារ ទី២៦ មីនាជាថ្ងៃទី៣ និងជាថ្ងៃចុងក្រោយនៃទស្សនកិច្ចផ្លូវរដ្ឋរបស់ប្រធានាធិបតីចិនលោកស៊ី ជីនពីងក្នុងប្រទេសបារាំង។ បន្ទាប់ពីបានជួបសន្ទនាជាមួយសមភាគីបារាំងលោកម៉ាក្រុងនាថ្ងៃចន្ទ ទី២៥ មីនា លោកស៊ីចូលរួមនៅក្នុងជំនួបចតុភាគីជាមួយសមភាគីបារាំងលោកម៉ាក្រុង នាយករដ្ឋមន្រ្តីអាល្លឺម៉ង់លោកស្រីមែរកិល និងប្រធានគណៈកម្មការអឺរ៉ុបលោកហ្សង់ខ្លូត យុងក័រ។ នៅក្នុងជំនួបទ្វេភាគីរវាងលោកម៉ាក្រុង និងលោកស៊ី ប៉ារីស និងប៉េកាំងបានចុះហត្ថលេខាលើកិច្ចព្រៀងជាច្រើនដែលមានទឹកប្រាក់ជាច្រើនពាន់លានអឺរ៉ុប ពិសេសចិនបានកម្ម៉ង់ទិញយន្តហោះ Airbus ចំនួន ៣០០គ្រឿង។ ទន្ទឹមនឹងកិច្ចព្រមព្រៀងពាណិជ្ជកម្ម បារាំង និងចិនក៏បានពង្រឹងកិច្ចសហប្រតិបត្តិការរវាងគ្នានៅក្នុងវិស័យវប្បធម៌ ឬយុទ្ធនាការប្រឆាំងនឹងការឡើងកម្តៅនៅក្នុងបរិយាកាស។ បន្ទាប់មកនៅក្នុងសន្និសីទកាសែតរួមគ្នានាល្ងាចថ្ងៃចន្ទ ទី២៥ មីនា លោកម៉ាក្រុង និងលោកស៊ីបានរួមដៃគ្នាការពារប្រព័ន្ធពហុភាគី។ « បើប្រព័ន្ធពហុភាគីបែកខ្ញែក នឹងគ្មានប្រទេសណាមួយចេញរួចតែម្នាក់ឯងបានទេ ទោះខ្លាំងប៉ុនណាក៏ដោយ » នេះជាការរម្លឹករបស់លោកម៉ាក្រុង។ ចំណែកលោកស៊ីបានបន្ថែមដោយធានាថា ចិនប្តេជ្ញាការពារម៉ឺងម៉ាត់លើប្រព័ន្ធពហុភាគី។
ចុះផ្សាយនៅថ្ងៃ៖
ស្តាប់ - ០១:៣៧
« យើងបានសម្រេចពង្រឹង និងពង្រីកទំហំយុទ្ធសាស្រ្តនៃទំនាក់ទំនងបារាំង ចិន។ យើងនឹងបង្កើនការដោះដូរក្នុងកម្រិតខ្ពស់ បង្កើនជំនឿទុកចិត្តផ្នែកនយោបាយទៅវិញ ទៅមក គោរព ហើយគិតគូរលើក្តីកង្វល់ធំៗ និងលើផលប្រយោជន៍សំខាន់ៗរវាងគ្នា។ យើងនឹងពង្រឹងការប្រាស្រ័យទាក់ទង និងការសម្របសម្រួលជាយុទ្ធសាស្រ្តនៅក្នុងកិច្ចការពិភពលោក ហើយការពាររួមគ្នានូវបទដ្ឋានជាមូលដ្ឋាននៃទំនាក់ទំនងអន្តរជាតិដែលផ្អែកលើគោលដៅ និងគោលការណ៍ច្បាប់ដែលមានចែងនៅក្នុងធម្មនុញ្ញអង្គការសហប្រជាជាតិ។
បន្ទាប់មក ការពាររួមគ្នាលើប្រព័ន្ធពាណិជ្ជកម្មពហុភាគីដោយផ្អែកលើច្បាប់អន្តរជាតិ ហើយយើងរក្សាជំហរម៉ឺងម៉ាត់ចំពោះប្រយោជន៍ពហុភាគី ធ្វើការរួមគ្នាដើម្បីកែលម្អអភិបាលកិច្ចពិភពលោក និងចូលរួមប្រឆាំងទប់នឹងបម្រែបម្រួលអាកាសធាតុ ព្រមទាំងបញ្ហាប្រឈមជាច្រើនទៀត។ ខ្ញុំបានអញ្ជើញប្រធានាធិបតីអេម៉ានុយអែល ម៉ាក្រុងឲ្យទៅទស្សនកិច្ចក្នុងប្រទេសចិននៅឆមាសទី២ ឆ្នាំនេះ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ