បារាំងនិងឥណ្ឌា ធ្វើសមយុទ្ធរួមគ្នាក្នុងដែនទឹកយុទ្ធសាស្ត្រ
មហាសមុទ្ទឥណ្ឌាដែលបានក្លាយដែនទឹកយុទ្ធសាស្ត្រនៃការប្រកួតប្រជែងរបស់ក្រុមមហាអំណាចក្នុងតំបន់កាន់ខ្លាំងឡើងៗនោះ ត្រូវបានបារាំងនិងឥណ្ឌាប្រើជាទីតាំងធ្វើសមយុទ្ធជើងទឹករួមគ្នា នៅក្នុងខែនេះ។ លំហាត់យោធាជាគម្រប់លើកទី១៧ ដែលគេប្រសិទ្ធនាមថា សមយុទ្ធវ៉ារុណា បានការចូលរួមជាពិសេស ពីសំណាក់នាវាផ្ទុកយន្តហោះចម្បាំងបារាំង Charles de Gaulle ជាលើកទីមួយ។
ចុះផ្សាយនៅថ្ងៃ៖ កែប្រែថ្ងៃទី៖
បារាំងនិងឥណ្ឌាបានបើកធ្វើសមយុទ្ធរួមគ្នា តាំងពីឆ្នាំ២០០១មក។ ប៉ុន្តែ សម្រាប់អាជ្ញាធរបារាំង សមយុទ្ធឆ្នាំ២០១៩ នៅតាមបណ្តោយឆ្នេរ Goa (ខាងលិច) របស់មហាយក្សឥណ្ឌានេះ ជាតំណាងមហិច្ឆតាធំបំផុត ដោយមាននាវាចម្បាំងរបស់កងយោធាជើងទឹកនៃប្រទេសទាំងពីរ ចំនួន១២គ្រឿង ចូលរួមធ្វើលំហាត់សឹក។
វត្តមានជាលើកទីមួយនៃនាវាផ្ទុកយន្តហោះចម្បាំង Charles De Gaulle ក្នុងមហាសមុទ្ទឥណ្ឌា តំបន់ដែលនឹងអាចក្លាយជាទីតាំងប្រកួតប្រជែងគ្នារបស់ក្រុមមហាអំណាច រឹតតែធ្វើឱ្យសមយុទ្ធឆ្នាំនេះកាន់តែមានតម្លៃជានិម្មិត្តរូបខ្លាំងបន្ថែមទៀត។ នាវាផ្ទុកយន្តហោះចម្បាំង តែមួយគត់របស់បារាំង មិនមែនត្រឹមតែជាមានសមត្ថភាពយោធាដ៏ខ្លាំងក្លាទេ តែផ្លាស់ទីរបស់នាវាថ្ងៃនេះ មានបង្កប់អត្ថន័យនយោបាយបំផុត។
លើនាវាដែលមានផ្លូវយន្តហោះប្រវែង២៦១ម៉ែត្រ ផ្ទុកយន្តហោះចម្បាំងរ៉ាហ្វាល់បីគ្រឿង អាចហោះចេញបានជារៀងរាល់ថ្ងៃ ឡើងកងរំពងរង្គើមេឃ មានផ្ទុកយោធា២ពាន់នាក់ វត្តមានរបស់ហ្សាលដឺហ្គោល អាចនឹងធ្វើឱ្យតំបន់ ដែលមានលក្ខណៈយុទ្ធសាស្ត្រ កាន់តែខ្លាំងឡើងៗ ទាំងខាងពាណិជ្ជកម្មអន្តរជាតិ និងយោធាផង ឱ្យរឹតតែមានស្ថិរភាព។ នេះបើតាមការអះអាងរបស់មេបញ្ជាការនាវា។
លាតសន្ធឹងពីអាស៊ីខាងត្បូង ទល់នឹងមហាសមុទ្ទអង់តាកទិក ឆ្លងកាត់ទ្វីបអាហ្វ្រិកនិងទ្វីបអូសេអានី មហាសមុទ្ទឥណ្ឌា មានទម្ងន់ផ្នែកភូមិសាស្ត្រនយោបាយកាន់ធ្ងន់ៗឡើង នៅសតវត្សរ៍ទី២១ដែលស្នូលទំនាញសេដ្ឋកិច្ចពិភពលោកស្ថិតនៅអាស៊ី។ ដោយសារទីតាំងភូមិសាស្ត្រ ឥណ្ឌាហាក់គ្រប់គ្រងតំបន់នេះស្ទើរតែម្នាក់ឯង ប៉ុន្តែអំណោយផលនេះ ត្រូវបានរួញបន្តិចម្តងៗដោយចិនបានបង្ហាញវត្តមានកាន់តែច្រើនឡើងៗ ដើម្បីប្រយោជន៍ពាណិជ្ជកម្ម ធនធានធម្មជាតិ និងក្នុងបំណងយោធាទៀត តាមរយៈ ពង្រាយនាវាយោធា នាវាមុជទឹក ពង្រីកបណ្តាញពាណិជ្ជកម្ម ហេដ្ឋារចនាសម្ព័ន្ធ នៅស្រីលង្កា ជាមួយនឹងគម្រោងផ្លូវមួយខ្សែក្រវ៉ាត់មួយ។ ទៅថ្ងៃអនាគត នៅរវាងពី១០ទៅ១៥ឆ្នាំទៀត ភាពតានតឹងអាចនឹងកើតមាននៅមហាសមុទ្ទឥណ្ឌា ដូចអ្វីដែលកើតមាននៅសមុទ្ទចិនខាងត្បូងនាពេលនេះផង។
ប៉ុន្តែកិច្ចសហប្រតិបត្តិការបារាំងនិងឥណ្ឌា ក្នុងសមុទ្ទមហាសមុទ្ទឥណ្ឌា មិនមែនជាការចាប់ដៃគូដើម្បីប្រឆាំងនឹងប្រទេស ឬតំបន់ ឬមហាអំណាចមួយឡើយ។ នេះជាការពន្យល់របស់ឯកអគ្គរដ្ឋទូតបារាំងប្រចាំប្រទេសឥណ្ឌាដែលអះអាងថា នាវាCharles de Gaulle បានចូលរួមជាបឋមក្នុងប្រតិបត្តិការយោធាប្រឆាំងនឹងពួកអង្គការរដ្ឋអ៊ីស្លាមនៅក្នុងសមុទ្ទមេឌីទែរ៉ាណេ ឥលូវមកដល់ឥណ្ឌា រួចនឹងធ្វើដំណើរបន្តទៅប្រទេសសិង្ហបុរី ទីដែលមានជំនួបកំពូលសន្តិសុខ មុននឹងត្រលប់មកប្រទេសបារាំងវិញនៅដើមខែកក្កដា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ