មូលនិធិរូបិយវត្ថុកាត់បន្ថយអត្រាកំណើនសេដ្ឋកិច្ចពិភពលោកសម្រាប់ឆ្នាំ ២០១៥ និងឆ្នាំ ២០១៦
ចុះផ្សាយនៅថ្ងៃ៖
ស្តាប់ - ០៥:៤៥
មូលនិធិរូបិយវត្ថុអន្តរជាតិ ហៅកាត់ថា FMIគ្មានសុទិដ្ឋិនិយមទៅលើកំណើនសេដ្ឋកិច្ចពិភពលោក សម្រាប់ឆ្នាំនេះ និងឆ្នាំក្រោយ។ នៅថ្ងៃអង្គារនេះ នៅក្នុងរបាយការណ៍ដ៏ខ្លីរបស់ខ្លួន មូលនិធិរូបិយវត្ថុបានកាត់បន្ថយអត្រាកំណើនសេដ្ឋកិច្ចពិភពលោក មកនៅត្រឹម៣,៥ភាគរយ សម្រាប់ឆ្នាំ២០១៥ គឺថយចុះបន្តិច ប្រមាណ ០,៣ភាគរយ បើប្រៀបធៀបនឹងអត្រាដែល FMIបានព្យាករទុក កាលពីខែតុលា ឆ្នាំមុន។ នៅក្នុងការព្យាករណ៍របស់ FMI មានតែមហាអំណាចអាមេរិកទេដែលមានកំណើនសេដ្ឋកិច្ចកើនឡើងជាវិជ្ជមាន។ ចំណែកប្រទេសអភិវឌ្ឍ និងប្រទេសមានសេដ្ឋកិច្ចទើបរីកលូតលាសដទៃទៀត ដូចជាចិនជាដើម នឹងមានPIB ឬផលិតផលក្នុងស្រុកសរុបធ្លាក់ចុះ នៅពីរឆ្នាំខាងមុខ។
តាមរបាយការណ៍របស់មូលនិធិរូបិយវត្ថុអន្តរជាតិ ក្នុងរយៈពេលពីរឆ្នាំទៅមុខ គេមិនសង្ឃឹមថា ពិភពលោកនឹងជួបកំណើនសេដ្ឋកិច្ចជាវិជ្ជមាននោះទេ។ មូលនិធិរូបិយវត្ថុអន្តរជាតិត្រូវកាត់បន្ថយអត្រាកំណើនសេដ្ឋកិច្ចពិភពលោក សម្រាប់ឆ្នាំ២០១៥ និងឆ្នាំ២០១៦ដោយផ្អែកទៅលើការធ្លាក់ថយចុះនៃកំណើនសេដ្ឋកិច្ចចិន តួលេខមិនល្អរបស់សេដ្ឋកិច្ចរុស្ស៊ី និងកំណើនសេដ្ឋកិច្ចធ្លាក់ចុះ នៅក្នុងប្រទេសដែលនាំចេញ ផលិតផលប្រើប្រាស់ជាមូលដ្ឋាន។
ប្រទេសចិន នៅថ្ងៃអង្គារនេះ ក៏ទើបបានចុះផ្សាយតួលេខដែលបង្ហាញថា សេដ្ឋកិច្ចរបស់ចិនសម្រាប់ឆ្នាំ ២០១៤ កន្លងទៅ បានថយចុះ ពី៧,៧ភាគរយ ឆ្នាំ២០១៣ មកនៅត្រឹម៧,៤ភាគរយ។ កង្វះការវិនិយោគ ជាពិសេស នៅក្នុងផ្នែកអចលនទ្រព្យ ជាមូលហេតុចំបងដែលទាញឲ្យកំណើនសេដ្ឋកិច្ចរបស់ចិនធ្លាក់ចុះ។ នៅក្នុងពេលដែលរដ្ឋាភិបាលចិន សន្យាជំរុញកំណើនសេដ្ឋកិច្ចចិនឲ្យនៅ៧ភាគរយ សម្រាប់ឆ្នាំ នេះ មូលនិធិរូបិយវត្ថុអន្តរជាតិបានប៉ាន់ស្មានថា កំណើនសេដ្ឋកិច្ចរបស់ចិននឹងថយចុះ ក្រោម ៧ភាគរយ សម្រាប់ឆ្នាំនេះ និងឆ្នាំក្រោយ។ អ្នកសេដ្ឋកិច្ចជាច្រើន វាយតម្លៃថា កំណើនសេដ្ឋកិច្ចរបស់ចិនធ្លាក់ចុះនឹងប៉ះពាល់យ៉ាងខ្លាំងដល់សេដ្ឋកិច្ចពិភពលោកទាំងមូល ដោយសារតែចិនជាទីផ្សារដ៏មានសក្តានុពលរបស់អឺរ៉ុប និងរបស់ប្រទេសអភិវឌ្ឍដទៃទៀត។
ការធ្លាក់ថយចុះនៃកំណើនសេដ្ឋកិច្ចរបស់ចិន នឹងរឹតតែមិនអំណោយផលដល់ ប្រទេសអឺរុប និងរបស់ជប៉ុន។ តាមតួលេខរបស់ FMI កំណើនសេដ្ឋកិច្ចរបស់ប្រទេសចាយប្រាក់អឺរ៉ូ ហើយនិងជប៉ុន នឹងកើនឡើងយឺតជាង ការព្យាករណ៍ទុក កាលពីតុលា។
តាម FMI នៅក្នុងរយៈពេល២ឆ្នាំទៅមុខ កំណើនសេដ្ឋកិច្ចនឹងធ្លាក់ថយចុះ ទាំងនៅក្នុងប្រទេសអភិវឌ្ឍ និងក្នុងប្រទេសកំពុងមានសេដ្ឋកិច្ចទើបលូតលាស់ថ្មី។ រុស្ស៊ីដែលគេចាត់ថ្នាក់ ជាប្រទេសទើបមានសេដ្ឋកិច្ចរីកលូតលាស់ដូចជាចិន ឥណ្ឌា និងប្រេស៊ីល នឹងមានកំណើនសេដ្ឋកិច្ច ធ្លាក់ចុះខ្លាំង ដោយសារតែ រុស្ស៊ីកំពុងរងការដាក់ទណ្ឌកម្មសេដ្ឋកិច្ចពីអាមេរិក និងពីសហភាពអឺរ៉ុប នៅក្នុងវិបត្តិអ៊ុយក្រែន។ លុយរូប្លរបស់រុស្ស៊ីក៏ធ្លាក់ចុះខ្លាំង ចំណែកប្រេងដែលរុស្ស៊ីពឹងផ្អែកខ្លាំងសម្រាប់ទ្រទ្រង់សេដ្ឋកិច្ច ក៏កំពុងធ្លាក់ចុះថ្លៃ យ៉ាងគំហុក នៅក្នុងទីផ្សារអន្តរជាតិ។
តម្លៃប្រេងធ្លាក់ចុះជាដំណឹងល្អ ប៉ុន្តែ វាមិនគ្រប់គ្រាន់
តម្លៃប្រេងឆៅ នៅក្នុងទីផ្សារពិភពលោកបានធ្លាក់ចុះ ៥៥ភាគរយ ចាប់តាំងពីខែកញ្ញាឆ្នាំមុន។ តម្លៃប្រេងឆៅ ធ្លាក់ចុះដោយសារតែតម្រូវការជាទូទៅ បានធ្លាក់ចុះ និងដោយសារតែអង្គការប្រទេសនាំចេញប្រេង Opec បដិសេធមិនព្រមកាត់បន្ថយការផលិតរបស់ខ្លួន។ នេះនៅមិនទាន់និយាយពីអាមេរិក ដែលមិនមែនជាសមាជិករបស់Opec ប៉ុន្តែ ដែលនៅតែបន្តបង្កើនការផលិត និងនាំចេញប្រេងរបស់ខ្លួន។
មូលនិធិ FMI ទទួលស្គាល់ថា ការធ្លាក់ចុះតម្លៃប្រេងជាដំណឹងល្អមួយ សម្រាប់សេដ្ឋកិច្ចរបស់ប្រទេសនៅក្នុងពិភពលោក គឺលើកលែងតែសម្រាប់ អាមេរិកជាប្រទេសដែលនាំចេញប្រេងនោះ។ ជាទូទៅ ប្រទេសដែលត្រូវនាំចូលប្រេង ច្រើន ដូចជាចិន ឬជប៉ុននឹងអាចយកចំណេញពីប្រេងចុះថ្លៃខ្លាំង ដើម្បីជំរុញការផលិតរបស់ខ្លួន។ ប៉ុន្តែ តាមFMI ប្រេងធ្លាក់ចុះថ្លៃខ្លាំងនៅតែមិនគ្រប់គ្រាន់ នោះទេ ព្រោះថា កត្តាសំខាន់សម្រាប់ជំរុញកំណើនសេដ្ឋកិច្ចពិភពលោក គឺការវិនិយោគនោះបានធ្លាក់ចុះ ខ្លាំង នៅទូទំាងពិភពលោក នៅក្នុងរយៈពេលប៉ុន្មានឆ្នាំចុងក្រោយនេះ។
វិបត្តិសេដ្ឋកិច្ចកើតមាន នៅគ្រប់ទិសទី មិនថា នៅអឺរ៉ុប នៅអាមេរិកឡាទីន ឬនៅ អាស៊ី ដែលតាមពិតជាទីផ្សារអន្តរជាតិយ៉ាងសំខាន់។ អ្នកវិនិយោគជាច្រើនបានបាក់ទឹកចិត្តមិនចង់ ប្រថុយប្រថាន ខ្ចីទុន ទៅវិនិយោគ ដោយសារតែតម្រូវការធ្លាក់ចុះ នៅទីផ្សារអន្តរជាតិ ជាពិសេស នៅតំបន់ចាយប្រាក់អឺរ៉ូ។ នៅប្រទេសចិន អត្រាការប្រាក់ខ្ពស់មិនលើកទឹកចិត្តឲ្យមនុស្សបោះទុនវិនិយោគនោះទេ។
សេដ្ឋវិទូជាច្រើនបារម្ភថា ការធ្លាក់ចុះនៃកំណើនសេដ្ឋកិច្ចរបស់ប្រទេសកំពុងមានសេដ្ឋកិច្ចទើបរីកលូតលាស់ថ្មី និងរបស់ប្រទេសចាយប្រាក់អឺរ៉ូ នៅឆ្នាំខាងមុខ នឹងអាចប៉ះពាល់ដល់កំណើនសេដ្ឋកិច្ចរបស់ប្រទេសដទៃទៀត ដូចជានៅអាស៊ី ជាដើម។
FMIបានអំពាវនាវឲ្យប្រទេសអភិវឌ្ឍ ឬប្រទេសកំពុងមានសេដ្ឋកិច្ចរីកលូតលាស់ថ្មី រៀបចំ ធ្វើកំណែទម្រង់ រចនាសម្ព័ន្ធ ជាពិសេសនៅក្នុងនយោបាយរូបិយវត្ថុរបស់ខ្លួន។ ប្រទេសដែលជាប់ប្រាក់បំណុលច្រើនត្រូវពិនិត្យយ៉ាងប្រយ័ត្នប្រយែងបំផុតចំពោះនយោបាយសេដ្ឋកិច្ចរបស់ខ្លួន គឺធ្វើយ៉ាងណាដើម្បីកុំឲ្យអត្រាការប្រាក់ដែលខ្លួនជំពាក់នោះ កើនឡើង។ និយាយឲ្យស្រួលស្តាប់គឺត្រូវព្យាយាមធានាម្ចាស់បំណុលឲ្យជឿទុកចិត្តលើនយោបាយសេដ្ឋកិច្ចរបស់ខ្លួន។
និយាយពីចិន វិញអាចពិចារណាបញ្ចុះអត្រាការប្រាក់ សម្រាប់ដើម្បីជំរុញការវិនិយោគ និងត្រូវបំពាក់បច្ចេកវិទ្យា ដូចដែលប្រទេសអភិវឌ្ឍបានធ្វើរួចមកហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ