IMF៖កំណើនសេដ្ឋកិច្ចពិភពលោកធ្លាក់ចុះបន្តិចសម្រាប់ឆ្នំា ២០១៤ និង២០១៥
អង្គការមូលនិធិរូបិយវត្ថុអន្តរជាតិ (IMF) បានចេញផ្សាយរបាយការណ៍មួយនៅថ្ងៃអង្គារ ទី៧ តុលាស្តីពីអត្រាកំណើនសេដ្ឋកិច្ចក្នុងពិភពលោកសម្រាប់ឆ្នំា ២០១៤ និង ២០១៥។ បើតាមប្រមើលមើលរបស់ IMF កំណើនសេដ្ឋកិច្ចពិភពលោកសម្រាប់ឆ្នំា ២០១៤ និង ២០១៥ មានការធ្លាក់ចុះបន្តិច។ ទន្ទឹមគ្នានេះ IMF ក៏បានលើកឡើងពីការគ្មានកំណើនសេដ្ឋកិច្ចនៅក្នុងក្រុមប្រទេសអ្នកមាន និងស្ថានការណ៍តានតឹងកាន់តែខ្លំាងនៅក្នុងប្រទេសអ៊ុយក្រែន ឬនៅក្នុងតំបន់មជ្ឈិមបូព៌ា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៦
គឺនៅក្នុងមហាសន្និបាតរបស់ខ្លួនក្នុងទីក្រុងវ៉ាស៊ីតោន សហរដ្ឋអាមេរិកដែលអង្គការមូលនិធិរូបិយវត្ថុអន្តរជាតិបានចេញផ្សាយរបាយការណ៍របស់ខ្លួនស្តីពីស្ថានភាពសេដ្ឋកិច្ចពិភពលោកសម្រាប់ឆ្នំា ២០១៤ និង ២០១៥។ យោងតាមរបាយការណ៍ កំណើនសេដ្ឋកិច្ចពិភពលោកសម្រាប់ឆ្នំា ២០១៤ ក៏មិនមានអ្វីខុសគ្នាឆ្ងាយពីឆ្នំា ២០១៣ ដែរ ពោលមានអត្រាមិនលើសពី ៣,៣% ទេ។ គឺជាអត្រាមួយដែលបានធ្លាក់ចុះ ០,១% បើធៀបនឹងការប្រមើលមើលកាលពីខែកក្កដាកន្លងទៅថ្មីៗនេះ។ សម្រាប់ឆ្នំា ២០១៥ វិញ IMF បានវាយតម្លៃថានឹងអាចមានកំណើនតិចតួច ពោលអាចនឹងមានកំណើន ៣,៨% តែនៅតែតិចជាងការទាយទុកកាលពី ៣ខែមុនចំនួន ០,២ពិន្ទុ។
របាយការណ៍របស់ IMF ដដែលបានបញ្ជាក់ពីកំណើនសេដ្ឋកិច្ចពិភពលោកដែលនៅបន្តផុយស្រួយ និងមិនស្មើភាពគ្នាទេពីប្រទេសមួយទៅប្រទេសមួយ។ កំណើនចំនួនអ្នកអត់ការងារធ្វើ និងកំណើនបំណុលសាធារណៈ និងឯកជននៅក្នុងបណ្តាប្រទេសអភិវឌ្ឍន៍មួយចំនួន គឺជាកត្តាដែលបានជម្រុញឲ្យមានប្រទេសខ្លះទទួលបានកំណើនសេដ្ឋកិច្ចតិចតួច ឬមួយក៏ធ្លាក់ចុះជាងការគ្រោងទុក ដូចយ៉ាងប្រទេសបារំាងបានធ្លាក់ចុះ ០,៤ពិន្ទុដោយទទួលបានប្រមាណតែ ០,៤% និងប្រទេសអាល្លឺម៉ង់ដែលបានធ្លាក់ចុះ ០,៥ពិន្ទុដោយទទួលបានកំណើន ១,៤%។ យោងតាម IMF សហរដ្ឋអាមេរិកនៅតែដើរតួនាទីជាប្រទេសគំរូយ៉ាងសំខាន់សម្រាប់សុខភាពសេដ្ឋកិច្ចពិភពលោកដោយទទួលបានសេដ្ឋកិច្ចជាមធ្យម ២,២% នៅក្នុងឆ្នំា ២០១៤ នេះ។
ដោយឡែក ក្រុមប្រទេសដែលកំពុងមានសេដ្ឋកិច្ចលូតលាស់កំពុងទទួលបានផលសេដ្ឋកិច្ចល្អដដែល នោះបើទោះបីជាអត្រាកំណើនសេដ្ឋកិច្ចមានកម្រិតខុសគ្នាពីប្រទេសមួយទៅប្រទេសមួយក៏ដោយ។ ចិនទទួលបាន ៧,៤% សម្រាប់ឆ្នំា ២០១៤ និងយ៉ាងហោចណាស់ ៧,១% សម្រាប់ឆ្នំា ២០១៥។ នៅឥណ្ឌា កំណើនសេដ្ឋកិច្ចសម្រាប់ឆ្នំា ២០១៤ មាន ៥,៦% ពោលមានការកើនឡើងបន្តិច។ ផ្ទុយទៅវិញនៅប្រទេសប្រេស៊ីល ស្ថានការណ៍ហាក់ដូចជាបានធ្លាក់ចុះខ្លំាងដោយទទួលបានតែ ០,៣% ប៉ុណ្ណោះសម្រាប់ឆ្នំា ២០១៤ នេះ។ ស្ថានការណ៍យ៉ាប់យឺនក៏មាននៅក្នុងប្រទេសរុស្ស៊ីដែរ ដោយសារតែត្រូវបានញំាញីដោយជម្លោះនៅក្នុងប្រទេសអ៊ុយក្រែន និងរឿងប្រទាញប្រទង់គ្នាជុំវិញបញ្ហាឧស្ម័ន។ នៅតំបន់ដើមបូព៌ាឯណោះ IMF បារម្ភពីការឡើងថ្លៃតម្លៃប្រេងឆៅដោយសារស្ថានភាពវឹកវរនៅក្នុងតំបន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ