ប្រធានាធិបតីថ្មីនៃប្រទេសអាហ្វហ្កានីស្ថានបំពេញទស្សនកិច្ចជាលើកទីមួយនៅប៉ាគីស្ថាន
លោក Ashraf Ghani ប្រធានាធិបតីថ្មីរបស់ប្រទេសអាហ្វហ្កានីស្ថាន បានអញ្ជើញទៅបំពេញទស្សនៈកិច្ចជាលើកទីមួយនៅថ្ងៃសុក្រទី១៤វិច្ឆិកានេះនៅប្រទេសប៉ាគីស្ថាន។ជាដំណើរទស្សនៈកិច្ច២ថ្ងៃដែលប្រធានាធិបតីអាហ្វហ្កានីស្ថាន ត្រូវជួបប្រាស្រ័យជាមួយ នាយករដ្ឋមន្ត្រីប៉ាគីស្ថានលោក Nawaz Sharif។ ជំនួបប្រាស្រ័យគ្នានេះ ក៏ជាឱកាសល្អមួយសំរាប់ឥស្សរជននយោបាយទាំងពីរប្រទេសក្នុងការរៀបចំទំនាក់ទំនងមួយដែលឈរនៅលើការយោគយល់គ្នា ដើម្បីសំរាលភាពតានតឹងជាយូរយារមកហើយរវាងទាំងពីរប្រទេស។ អស់រយៈពេលជាច្រើនឆ្នាំកន្លងមកហើយដែលប៉ាគីស្ថាននិងអាហ្វហ្កានីស្ថាន តែងតែចោទដាក់គ្នាទៅវិញទៅមក « ថាបានជួយគាំទ្រពួកឧទ្ទាមតាលីបង់ ដោយឲ្យទឹកដីខ្លួនសំរាប់ធ្វើជាជំរក ដើម្បីធ្វើការវាយប្រហារប្រទេសជិតខាង៕
ចុះផ្សាយនៅថ្ងៃ៖
ស្តាប់ - ០២:០០
ទីក្រុងកាប៊ូលពុំដែលភ្លេចសោះឡើយកាលពីឆ្នាំ១៩៩៧នៅពេលដែលប៉ាគីស្ថានជាប្រទេសតែមួយគត់នៅលើលោក បានប្រកាសទទួលស្គាល់របបតាលីបង់ដែលកំពុងកាន់អំណាចនៅលើប្រទេសអាហ្វហ្កានីស្ថាន ជាពិសេនៅជំនាន់នោះលោក Nawaz Sharif មានតួនាទីជានាយករដ្ឋមន្ត្រីប៉ាគីស្ថានទៅហើយ។
ក៏ប៉ុន្តែកាលពីប៉ុន្មានសប្តាហ៍កន្លងមកនេះ ឥស្សរជននយោបាយប៉ាគីស្ថានមួយចំនួន បានធ្វើដំណើរជាបន្តបន្ទាប់គ្នាទៅកាន់ទីក្រុងកាប៊ូលប្រទេសអាហ្វហ្កានីស្ថាន។
ក្នុងចំណោមឥស្សរជននយោបាយប៉ាគីស្ថាន មានទីប្រឹក្សាផ្ទាល់លោក Sharif ទទួលបន្ទុកផ្នែកសន្តិសុខជាតិ រដ្ឋមន្ត្រីក្រសួងការបរទេស រហូតដល់ប្រមុខកងទ័ពជាតិ ក៏ព្រមទាំងមេដឹកនាំក្រសួងស៊ើបការសម្ងាត់ប៉ាគីស្ថាន។ គួររំលឹកថា ក្រសួងស៊ើបការសម្ងាត់ប៉ាគីស្ថានដែលជាញឹកញាប់ ត្រូវបានគេចោទ ថាបានឃុបឃិតជាមួយពួកឧទ្ទាមតាលីបង់។
ម្យ៉ាងទៀត ទាំងយោធានិងទាំងអ្នកដឹកនាំនយោបាយប៉ាគីស្ថាន សុទ្ធតែមានបំណងតែមួយគត់ គឺចង់ឲ្យអាហ្វហ្កានីស្ថានកា្លយជាប្រទេសដែលមានស្ថិរភាពរឹងមាំ។ ហើយនៅតែប៉ុន្មានសប្តាហ៍ទៀតប៉ុណ្ណោះ កងទ័ពបរទេសមួយចំនួនធំនឹងត្រូវចាកចេញពីអាហ្វហ្កានីស្ថាន។
ចំណែកលោកប្រធានាធិបតីអាហ្វហ្កានីស្ថានវិញតាំងពីពេលដែលលោកនៅជាបេក្ខជនប្រធានាធិបតីនៅឡើយ ធ្លាប់បានមានប្រសាសន៍លើកឡើងថា » លោកមានបំណងចង់ឲ្យ អាហ្វហ្កានីស្ថាននិងប៉ាគីស្ថាន មានទំនាក់ទំនងដ៏ល្អពិសេសមួយប្រៀបដូចនឹងទំនាក់ទំនងដ៏ល្អប្រពៃរ៍រវាងបារាំងនិងអាល្លឺម៉ង់ក្រោយពីសង្គ្រាមលោកលើកទីពីរ។
គួរបញ្ជាក់ថានៅក្នុងរបៀបវារៈនៃកិច្ចចរចាពីរថ្ងៃរវាងប្រធានាធិបតីអាហ្វហ្កានីស្ថាននិងនាយករដ្ឋមន្ត្រីប៉ាគីស្ថាននោះ មានដូចជាបញ្ហាសន្តិភាព-សន្តិសុខ ការផ្តោះប្តូរពាណិជ្ចកម្មជាពិសេសបញ្ហាដ៏សំខាន់បំផុតជាងគេ គឺបញ្ហាព្រំដែនរវាងប្រទេសទាំងពីរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ