គ្រូទាយថៃ ក៏ត្រូវចាប់ខ្លួន ដោយសារបទចោទប្រកាន់ជេរប្រមាថព្រះមហាក្សត្រ
បន្ទាប់ពីក្រុមអ្នកប្រឆាំង និស្សិត អ្នកនយោបាយ និងសិល្បករ ដល់វេន គ្រូទាយថៃ ដែលត្រូវជាប់ក្នុងសំណាញ់បង្រ្កាបរបស់របបសឹក។ កាលពីថ្ងៃពុធម្សិលមិញ គ្រូទាយដ៏ល្បីឈ្មោះម្នាក់នៅប្រទេសថៃ ត្រូវបានទាហានចាប់ដាក់ខ្នោះ បញ្ជូនទៅតុលាការយោធា ទៅតាមបទចោទប្រកាន់ជេរប្រមាថព្រះមហាក្សត្រ។ ការនិយាយប៉ះពាល់ដល់ស្ថាប័នព្រះមហាក្សត្រត្រូវចាត់ទុកជាបទឧក្រិដ្ឋ តាមមាត្រាទី ១១២ នៃច្បាប់ជេរប្រមាថព្រះមហាក្សត្រ ដែលនៅក្នុងនោះ ជនល្មើសត្រូវផន្តាទោសឲ្យជាប់ពន្ធនាគាររយៈពេល១៥ឆ្នាំ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
មនុស្សបីនាក់ ដែលនៅក្នុងមានគ្រូទាយ និងជំនួយការ រួមទាំងមន្រ្តីប៉ូលិសជាន់ខ្ពស់ម្នាក់ ត្រូវបានយោធាថៃ ចាប់ឃាត់ខ្លួន តាំងពីថ្ងៃទី ១៨ តុលា ក្នុងបទសង្ស័យ រំលោភច្បាប់ជេរប្រមាថព្រះមហាក្សត្រថៃ។ នៅថ្ងៃពុធ តុលាការយោធា បានសម្រេចចោទប្រកាន់ពួកគេជាផ្លូវការ និងបានផ្តល់សិទ្ធិឲ្យប៉ូលិសឃុំខ្លួនពួកគេ រយៈពេល១២ថ្ងៃទៀត សម្រាប់ដំណើរការស៊ើបអង្កេត។
សុតស៉ាយេ ស៊ូរីយ៉ង់ ស៊ូចារីផុលវ៉ង់ ហៅក្រៅម៉ យ៉ុង គឺជាគ្រូទាយដ៏ល្បីឈ្មោះម្នាក់ ដែលធ្លាប់ចូលនិយាយក្នុងទូរទស្សន៍ ជាញឹកញយ និងធ្វើជាប្រឹក្សាឲ្យក្រុមតារាជាច្រើន នៅប្រទេសថៃ។ គ្រូទាយវ័យ ៥៥ឆ្នាំរូបនេះ ព្រមទាំងជំនួយការផ្ទាល់ខ្លួន ត្រូវបានលោកប្រាយុទ្ធ ចាន់ អូចា បញ្ជាឲ្យចាប់ខ្លួន បន្ទាប់ពីគេរកឃើញថា ពួកគេទាំងពីរនាក់ឧស្សាហ៍និយាយប្រាប់ទៅ អតិថិជនថា ពួកគេមានទំនាក់ទំនងជិតស្និទ្ធជាមួយស្ថាប័នដ៏ខ្ពស់បំផុតនៅប្រទេសថៃ។ ស្ថាប័នខ្ពស់បំផុត គឺព្រះរាជបល្ល័ង្កថៃ ដែលគ្រប់គ្នា មិនហ៊ាននិយាយចំៗឡើយ ដោយសារខ្លាចច្បាប់ជេរប្រមាថព្រះមហាក្សត្រ។ សម្រាប់លោកប្រាយុទ្ធ ចាន់អូចារ ក្រុមគ្រូទាយបានយកឈ្មោះព្រះមហាក្សត្រ ទៅកេងយកជាប្រយោជន៍ផ្ទាល់ខ្លួន។
ទោះមិនបានជេរ ឬនិយាយប៉ះពាល់ព្រះកិត្តិនាម ប៉ុន្តែ គ្រាន់តែ យកឈ្មោះព្រះមហាក្សត្រ ទៅប្រើក៏ធ្វើឲ្យគ្រូទាយថៃរងគ្រោះ ជាប់ក្នុងសំណាញ់បង្រ្កាបរបស់របបសឹកថៃ។ តាមប៉ូលិសថៃ គ្រូទាយផ្ទាល់ខ្លួនបានទទួលសារភាព ប៉ុន្តែ ជនសង្ស័យពីរនាក់ទៀត ជាពិសេស មន្រ្តីប៉ូលិស ដែលតុលាការចោទពីបទប្រើប្រាស់អាវុធខុសច្បាប់ នៅតែបដិសេធការចោទប្រកាន់។ បើសិនជនសង្ស័យត្រូវគេរកឃើញថា បានប្រព្រឹត្តបទល្មើសមែន ពួកគេនឹងប្រឈមនឹងទោសជាប់ពន្ធនាគារ១៥ឆ្នាំ ទៅតាមច្បាប់ ស្តីពីការជេរប្រមាថព្រះមហាក្សត្រ។
តាំងពីធ្វើរដ្ឋប្រហារ ទម្លាក់នាយករដ្ឋមន្រ្តីស្របច្បាប់ចេញពីតំណែង នៅខែឧសភា ឆ្នាំ ២០១៤ របបសឹកថៃ ដឹកនាំដោយលោកប្រាយុទ្ធ ចាន់អូចា ដែលប្រកាសជាអ្នកការពារព្រះរាជបល្ល័ង្កថៃ មិនខ្លាចនឹងចាត់វិធានបង្ក្រាបរាល់អ្នកដែលហ៊ាននិយាយប៉ះពាល់ដល់ព្រះមហាក្សត្រ ឬ សមាជិកព្រះរាជវង្ស។ ក្រុមគ្រួសាររបស់ម្ចាស់ក្សត្រី ស្រ៊ីរស្មី ដែលជាអតីតមហេសី របស់ព្រះរាជបុត្រត្រូវស្នងរាជ្យ មហា វិជ្ជរ៉ាឡុងកន ក៏ត្រូវយោធាថៃ ចាប់ឃាត់ខ្លួន និងបញ្ជូនទៅតុលាការដែរ ក្នុងបទដែលហ៊ានអាង យកឈ្មោះស្ថាប័នជាន់ខ្ពស់បំផុត ទៅប្រើ ដើម្បីប្រយោជន៍ផ្ទាល់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ