ជាប់គុកត្បិតសរសេរពីព្រះមហាក្សត្រថៃ នៅក្នុងបន្ទប់បង្គន់
នៅប្រទេសថៃ បុរសវ័យចំណាស់ម្នាក់ត្រូវបានតុលាការយោធាកាត់ទោសនៅថ្ងៃសុក្រទី ២០ មីនា ឲ្យជាប់គុក ១៨ឆ្នាំ ពីបទគូរ សរសេរអក្សរ ដែលមានន័យ ជេរប្រមាថព្រះចេស្តា ព្រះមហាក្សត្រថៃ។ ចាប់តំាង ពីយោធាធ្វើរដ្ឋប្រហារទម្លាក់រដ្ឋាភិបាលរបស់លោកស្រីយីងឡាក់ចេញពីអំណាច ចំនួន ករណីប្តឹងផ្តល់ និងផ្តន្ទាទោសដាក់ពន្ធនាគារ ក្រោមបទចោទប្រកាន់ជេរប្រមាថព្រះមហាក្សត្រ ចេះតែកើនឡើង មិនឈប់ នៅប្រទេសថៃ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
ក្នុងអាយុ ៦៧ ឆ្នាំ អូភាស ចាន់សុខសៃ ត្រូវបានចាប់ខ្លួន បន្ទាប់ពីគាត់បានគូរអក្សរ នៅក្នុងបន្ទប់បង្គន់មួយ ក្នុងមជ្ឈមណ្ឌលពាណិជ្ជកម្មក្នុងក្រុងបាងកក។ នៅក្នុងឃ្លាដែលលោកតា ចាន់សុខសៃ បានសរសេរ នៅក្នុងបង្គន់ និងដែលត្រូវបានចៅក្រមស្រង់យកទៅអាននៅក្នុងសវនាការ លោកតា ចាន់សុខសៃ បានរិះគន់ របបសឹកដែលបានធ្វើរដ្ឋប្រហារយោធា។ កាលពីថ្ងៃសុក្រ តុលាការយោធាថៃបានកាត់ទោសលោកតាម្ចាស់អក្សរ ឲ្យជាប់គុក ១៨ខែ ព្រោះថា នៅក្នុងគំនូរអក្សររិះគន់នោះមានផងដែរ ពាក្យដែលនិយាយពីព្រះមហាក្សត្រថៃ។
ជាទូទៅ ប្រជាជនថៃដែលមិនបានចូលរួមនៅក្នុងសវនាការនៅតែមិនដឹងថា តើលោកតា ចាន់សុខសៃនិយាយអ្វីនៅក្នុងគំនូរអក្សររបស់ខ្លួន ព្រោះថា អ្នកកាសែតមិនអាចសរសេរស្រង់ឃ្លា ដែលគាត់បានសរសេរទេ។ នៅក្នុងច្បាប់ជេរប្រមាថព្រះចេស្តា ការសរសេរ ឬនិយាយចុះផ្សាយពាក្យដែលមានន័យជេរប្រមាថព្រះមហាក្សត្រនោះ ត្រូវបានចាត់ទុកជាសកម្មភាពជេរប្រមាថ ព្រះមហាក្សត្រ និងប្រឈមនឹងទោសជាប់គុក ១៥ឆ្នាំ។
សកម្មភាពចាប់ចង និងកាត់ទោសដាក់ពន្ធនាគារក្រោមបទចោទប្រកាន់ជេរប្រមាថព្រះមហាក្សត្រថៃ បានកើនឡើង ជាបន្តបន្ទាប់ ចាប់តាំងពីរបបសឹកចូលកាន់អំណាចនៅប្រទេសថៃ។ គេមិនដឹងថា តើករណីចាប់ចង ក្នុងរឿងជេរប្រមាថ កើនឡើង ដោយសារតែរបបសឹកបានយកលេសប្រើច្បាប់នេះ ដើម្បី បិទសិទ្ធិសេរីភាពបុគ្គល ដែលរិះគន់ ប្រឆាំងនឹងខ្លួន? ឬមួយ ក៏ចំនួនករណីជេរប្រមាថព្រះមហាក្សត្រថៃ បានកើនឡើង ដោយសារតែប្រជាជនថៃ ទ្រាំលែងបាននឹងរបបយោធា ដែលគាំទ្រ ដោយរាជវង្សថៃ?
អង្គការការពារសិទ្ធិមនុស្សបានរិះគន់របបសឹកថៃថា បានយក ច្បាប់ជេរប្រមាថព្រះមហាក្សត្រ ត្រូវធ្វើជាអាវុធដើម្បីបំបិទសិទ្ធិសេរីភាពបញ្ចេញមតិ ក្នុងប្រទេសថៃ ដែលកំពុងជួបវិបត្តិរាជបល្ល័ង្ក រកអ្នកស្នងរាជ្យ បន្តពីព្រះចៅ ភូមិបុល ដែលមានព្រះជន្ម ៨៧ ព្រះវស្សា និងដែលកំពុងប្រឈួន សម្រាកនៅមន្ទីរពេទ្យរហូតមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ