ប៉ាគីស្ថាន៖ស្លាប់ ២១នាក់នៅក្នុងអំពើភេរវកម្មអត្តឃាតបង្កដោយពួកតាលីបង់
នៅក្នុងប្រទេសប៉ាគីស្ថាន មានមនុស្សស្លាប់យ៉ាងតិច ២១នាក់ និងរបួសជាច្រើននាក់ផ្សេងទៀតនៅក្នុងអំពើភេរវកម្មអត្តឃាតបង្កឡើងដោយពួកឧទ្ទាមតាលីបង់នារសៀលថ្ងៃអង្គារ ទី២៩ ធ្នូ។ ព្រឹត្តិការណ៍នេះបានកើតមានឡើងនៅប៉ែកពាយព្យប្រទេសដោយពួកឧទ្ទាមម្នាក់ដែលបំពាក់ជាតិផ្ទុះជាប់ខ្លួនបានបើកម៉ូតូសំដៅចូលការិយាល័យរដ្ឋាភិបាលដែលកំពុងមានវត្តមានបុគ្គលិកជាច្រើននាក់។ ក្រោយឧប្បត្តិហេតុនោះភ្លាម សាខារបស់ចលនាឧទ្ទាមតាលីបង់បានចេញមុខប្រកាសទទួលស្គាល់ជាស្នាដៃរបស់ខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
គឺនៅក្នុងស្រុកម៉ាដានស្ថិតប៉ែកពាយ័ព្យប្រទេសដែលពួកឧទ្ទាមតាលីបង់បានបើកការវាយប្រហារ ហើយការិយាល័យដែលអត្តឃាករតាលីបង់ម្នាក់បានបរម៉ូតូសំដៅចូលទៅខាងក្នុងនោះ គឺជាស្ថាប័នទទួលបន្ទុកធ្វើអត្តសញ្ញាណប័ណ្ណឲ្យប្រជាជនប៉ាគីស្ថាន នេះជាការបញ្ជាក់របស់ប៉ូលិសស្រុកម៉ាដាន។ តុល្យការចុងក្រោយត្រូវបានរដ្ឋអំណាចប្រាប់ឲ្យដឹងថា មានមនុស្សស្លាប់ចំនួន ២១នាក់ និងរបួសប្រមាណជា ៦៣នាក់ផ្សេងទៀត។ ទូរទស្សន៍ក្នុងស្រុកជាច្រើនបានបង្ហាញឲ្យឃើញពីឥទ្ធិពល និងរូបភាពនៃអំពើភេរវកម្មអត្តឃាតដែលជញ្ជាំងរលំបាក់ លាយឡំនឹងគំនរថ្ម ព្រមទាំងកំទេចកំទីជាច្រើនបំណែកនៅតាមផ្លូវ។
កម្មករម្នាក់អាយុអាយុ ២៩ឆ្នាំបានរៀបរាប់ឲ្យដឹងថា នៅពេលដែលរូបគាត់កំពុងតម្រង់ជួរដើម្បីបន្តអត្តសញ្ញាណប័ណ្ណ ស្រាប់តែឮសូរសម្លេងស្រែកឡើងថា Allah Akbar ឬព្រះជាម្ចាស់ធំមហិមា ភ្លាមៗនោះ គាត់ក៏បានក្រាបផ្ទាល់ដី។ ចំណែកបុរសសាក្សីម្នាក់ទៀតដែលបានរបួសជើងបាននិយាយថា លោកបានឃើញឈាម និងបំណែកសាច់មនុស្សរប៉ាត់រប៉ាយនៅកន្លែងដែលមនុស្សតម្រង់ជួរឈរចាំដើម្បីធ្វើអត្តសញ្ញាណប័ណ្ណថ្មី ឬមួយក៏បន្តអត្តសញ្ញាណប័ណ្ណ។ ក្រោយអំពើភេរវកម្មអត្តឃាតបន្តិច Jamaat-ul-Ahrar ដែលជាសាខារបស់ចលនាឧទ្ទាមតាលីបង់Tehreek-e-Taliban Pakistan (TTP)បានចេញមុខប្រកាសថាជាស្នាដៃរបស់ខ្លួន។
នៅក្នុងសេចក្តីប្រកាសព័ត៌មានរបស់ខ្លួន Jamaat-ul-Ahrar បានសន្យានឹងបន្តវាយប្រហារសងសឹកលើស្ថាប័នរដ្ឋាភិបាលប៉ាគីស្ថានដែលបានបើកយុទ្ធនាការបង្រ្កាបពួកគេ។ គួររម្លឹកជូនថា ទ័ពរដ្ឋាភិបាលប៉ាគីស្ថានពិតជាបានធ្វើការវាយប្រហារលើចលនាតាលីបង់ និងក្រុមឧទ្ទាមផ្សេងទៀតនៅតាមបណ្តោយព្រំដែនជាមួយប្រទេសអាហ្វហ្កានីស្ថាន។ កន្លងមក Jamaat-ul-Ahrar ធ្លាប់បានសារភាពពីការរៀបចំភេរវកម្មអត្តឃាតប្រមាណជា ១០ ក្នុងទឹកដីប៉ាគីស្ថាន។ ជាក់ស្តែង អំពើភេរវកម្មអត្តឃាតពីរផ្ទួនគ្នាប្រឆាំងនឹងអង្គប្រជុំនយោបាយមួយកាលពីខែសីហាដោយសម្លាប់មនុស្ស ១៦នាក់ និងអំពើភេរវកម្មអត្តឃាតប្រឆាំងវិហារគ្រឹស្តសាសនាចំនួនពីរក្នុងទីក្រុងឡាអរកាលពីខែមីនា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ