សម្តេចប៉ាបថ្កោលទោសភេរវកម្មផ្ទួនៗ ទៅលើវិហារសាសនាកាតូលិកនៅប៉ាគីស្ថាន
ថ្ងៃអាទិត្យទី ១៥ មីនា មានវិហារគ្រឹស្តសាសនាពីរកន្លែង នៅភាគខាងកើតប្រទេសប៉ាគីស្ថាន ត្រូវបានរងការវាយប្រហារភេរវកម្ម ផ្ទួនៗគ្នា។ ហេតុការណ៍នេះ បានសម្លាប់មនុស្ស១៤នាក់ និងជាច្រើននាក់រងរបួស។ សម្តេចប៉ាប ប្រមុខសង្ឃកាតូលិក បានសម្តែងនូវសេចក្តីសោកសង្រេង និងបានថ្កោលទោសទង្វើនេះ ថាជាការប្រមាថមើលងាយ ដល់ជីវិតប្រជាជនស្លូតត្រង់ដែល គ្មានកំហុសអ្វីទាំងអស់ ដោយគ្រាន់តែគ្នាកាន់សាសនាកាតូលិក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
ភេរវកម្មបំផ្ទុះគ្រាប់បែក បានកើតឡើងនៅក្នុងវិហារសាសនាគ្រឹស្តពីរកន្លែង ក្នុងរយៈពេលប៉ុន្មាននាទីប៉ុណ្ណោះពីគ្នា នៅក្នុងទីក្រុងឡាហរ ខេត្តប៉េន្ឌចាប់ ភាគខាងកើតប្រទេសប៉ាគីស្ថាន។ យោងតាមអ្នកនាំពាក្យអាជ្ញាធរប៉ាគីស្ថាន មានអ្នកស្លាប់ចំនួន១៤នាក់ និង ជាង៨០នាក់រងរបួសធ្ងន់។ ការដាក់បំផ្ទុះគ្រាប់បែកអត្តឃាតនេះ ធ្វើនៅ ទីមួយក្នុងវិហារកាតូលិក និងមួយទៀតនៅវិហារប្រូតេស្តង់ ដែលនៅមិនឆ្ងាយពីគ្នា ក្នុងសង្កាត់ដែលសំបូរដោយប្រជាជនប៉ាគីស្ថាន កាន់សាសនាគ្រឹស្ត រស់នៅកុះករ។
ក្រុមសង្រ្គោះកំពុងតែ ធ្វើការជួយជនរងគ្រោះ ហើយចំនួនអ្នកស្លាប់ អាចនឹងកើនឡើងលើសនេះទៀត។ មានសាកសីជាច្រើននាក់ បានឃើញ ថាមានមនុស្សមិនស្គាល់មុខរត់ចូលទៅក្នុងវិហារទាំងពីរ ហើយរំពេចនោះ ស្រាប់តែគេឮសូរសំឡេងផ្ទុះ។ បន្ទាប់មកទៀតមានមនុស្សម្នាក់ ចង់រត់ចូលទៅក្នុងវិហារបន្ថែមទៀត បន្តែអ្នកយាមម្នាក់ បានចូលទៅប្រវ៉ាយប្រតប់ ហើយគ្រាប់បែកក៏បានផ្ទុះ ស្លាប់ទាំងពីរនាក់តែម្តង។ ក្រុមភេរវកម្ម អាល់កាអ៊ីដា មួយឈ្មោះថា ចាម៉ាត អ៊ុល អារ៉ា (Jamaat-ul-Arrar) ដែលជាសាខាអាល់កាអ៊ីដា ប្រចាំនៅភាគខាងកើតប៉ាគីស្ថាន បានចេញមកប្រកាសថា ក្រុមពួកវាជាអ្នកបញ្ជា ឲ្យធ្វើភេរវកម្មអត្តឃាតនេះ។
ក្រោយហេតុការណ៏ផ្ទុះ ភាពចលាចលជុំវិញកន្លែងកើតហេតុ បានកើតឡើង ដោយប្រជាជនបានវាយបណ្តេញនរគបាល ហើយបានស្រែកជេរអាជ្ញាធរប៉ាគីស្ថាន ថាអសមត្ថភាព ក្នុងការការពារសន្តិសុខរបស់ប្រជាជន។ បន្ថែមពីនេះ ប្រជាជនបានព្រួតគ្នាវាយសម្លាប់ ជនសង្ស័យពីរនាក់ នៅនឹងកន្លែងកើតហេតុ ផ្ទាល់។
ក្រោយបានទទួលដំណឹងនេះ សម្តេចប៉ាបហ្រ្វង់ស័រ ប្រមុខសង្ឃកាតូលិក បានសម្តែងនូវសេចក្តីទុក្ខសោក ដល់ក្រុមគ្រួសារជនរងគ្រោះ។ សម្តេចសង្ឃបានអំពាវនាវ ឲ្យបញ្ឈប់នូវអំពើកាប់សម្លាប់ លើប្រជាជនស្លូតត្រង់ ដែលកាន់សាសនាកាតូលិក ដែលគ្នាគ្មានកំហុសអ្វីទាល់តែសោះ។
គួរបញ្ជាក់ផងដែរថា ប្រជាជនកាន់សាសនាកាតូលិក ជាពិសេសក្នុងតំបន់ដើមបូព៌ា ត្រូវបានគេធ្វើទុក្ខបុកម្នេញ យ៉ាងវេទនាជាទីបំផុត។ ជាក់ស្តែងក្រុមអ្នកកាន់សាសនាកាតូលិកនៅអ៊ីរ៉ាក់ និងនៅស៊ីរី ត្រូវបានពួកជីហាតរដ្ឋអ៊ីស្លាម ធ្វើការកាប់សម្លាប់យ៉ាងព្រៃផ្សៃ។ សហគមន៍អ្នកកាន់សាសនាកាតូលិកនៅប៉ាគីស្ថាន ក៏ដូចជានៅឥណ្ឌា ថ្មីៗនេះ ត្រូវបានរងអំពើភេរវកម្មជាបន្តបន្ទាប់ ហើយអាជ្ញាធរប្រទេសទាំងនោះ ដូចជាមិនសូវអើរពើ ទាល់តែសោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ