ប្រធានាធិបតីបារាំងទៅចិនដើម្បីនិយាយពីសន្និសីទអាកាសធាតុ
លោកប្រធានាធិបតីបារាំង ហ្វ្រង់ស័រ ហូឡង់ ចាប់ផ្តើមដំណើរទស្សនកិច្ចរយៈពេល ២ថ្ងៃ នៅក្នុងប្រទេសចិន។ គោលដៅសំខាន់ គឺបញ្ចុះបញ្ចូលចិនឲ្យចូលរួមកាន់តែសកម្មនៅក្នុងយុទ្ធនាការប្រយុទ្ធប្រឆាំងនឹងការប្រែប្រួលអាកាសធាតុ ដើម្បីជំរុញឲ្យសន្និសីទអាកាសធាតុ នៅទីក្រុងប៉ារីសអាចសម្រេចបានជោគជ័យ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៩
នៅសល់មិនដល់មួយខែទៀតទេ នឹងត្រូវដល់ពេលបើកសន្និសីទអាកាសធាតុ នៅទីក្រុងប៉ារីស ហើយដើម្បីឲ្យសន្និសីទនេះអាចទទួលជោគជ័យ បារាំងប្រាកដជាត្រូវការចិន ដែលជាប្រទេសបញ្ចេញឧស្ម័នកាបូនិកច្រើនជាងគេបង្អស់នៅលើពិភពលោក។
គេសង្កេតឃើញថា នៅក្នុងកិច្ចចរចាជុំចុងក្រោយនៅអាល្លឺម៉ង់ កាលពីជាងមួយសប្តាហ៍មុន ក៏ដូចជាកិច្ចចរចាអាកាសធាតុលើកមុនៗ ចំណុចចម្រូងចម្រាសធំបំផុត គឺការខ្វែងគំនិតគ្នា រវាងប្រទេសអភិវឌ្ឍ និងប្រទេសកំពុងអភិវឌ្ឍ។ ចិនដែលជាមហាអំណាចសេដ្ឋកិច្ចពិភពលោកលំដាប់ទី២ ប៉ុន្តែ នៅមិនទាន់ទទួលស្គាល់ខ្លួនឯងថាជាប្រទេសអភិវឌ្ឍ តែងតែបដិសេធមិនព្រមជាប់កាតព្វកិច្ចក្នុងការកាត់បន្ថយការបញ្ចេញឧស្ម័ន ហើយនៅពេលដែលប្រទេសមហាអំណាចសេដ្ឋកិច្ច និងជាប្រទេសបញ្ចេញឧស្ម័នច្រើនជាងគេមិនជាប់កាតព្វកិច្ចបែបនេះ វាធ្វើឲ្យប្រទេសផ្សេងទៀតក៏បាននាំគ្នាបដិសេធមិនព្រមធ្វើដូចគ្នា។
ដូច្នេះ ដើម្បីអាចបញ្ចុះបញ្ចូលប្រទេសផ្សេងទៀតបាន គេត្រូវតែបញ្ចុះបញ្ចូលចិនឲ្យបានជាមុនសិន។ នេះហើយ ដែលជាគោលដៅចម្បងបំផុតរបស់លោកប្រធានាធិបតីហ្វ្រង់ស័រ ហូឡង់ នៅក្នុងដំណើរទស្សនកិច្ចនៅចិននៅថ្ងៃចន្ទ និងថ្ងៃអង្គារស្អែកនេះ។
សម្រាប់លោកហ្វ្រង់ស័រ ហូឡង់ អ្វីដែលលោកស្វះស្វែងរក នៅក្នុងដំណើរទស្សនកិច្ចនេះ គឺបញ្ចុះបញ្ចូលលោកប្រធានាធិបតីចិន ស៊ី ជីនពីង ឲ្យចេញសេចក្តីថ្លែងការណ៍រួមមួយ ដែលបង្ហាញពីការប្តេជ្ញាចិត្តខ្ពស់របស់ចិន នៅក្នុងការប្រឹងប្រែងកាត់បន្ថយការបញ្ចេញឧស្ម័ន ដើម្បីធ្វើយ៉ាងណាទប់ស្កាត់សីតុណ្ហភាពមធ្យមនៃភពផែនដី កុំឲ្យកើនឡើងលើសពី ២អង្សា នៅចុងសតវត្សរ៍ទី២១នេះ។
ក្រៅពីជួបជាមួយនឹងមេដឹកនាំចិន លោកហ្វ្រង់ស័រ ហូឡង់ ក៏គ្រោងនឹងចូលរួមផងដែរ នៅក្នុងវេទិកាក្រុមហ៊ុនចិន និងបារាំង ដែលនឹងរៀបចំធ្វើនៅថ្ងៃអង្គារ ដើម្បីជជែកអំពីប្រធានបទ “សេដ្ឋកិច្ច និងអាកាសធាតុ”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ