តើកងទ័ពអាមេរិកត្រូវបន្តស្ថិតនៅអាហ្វហ្កានីស្ថាន ក្រោយឆ្នាំ ២០១៤?
តាមកាលកំណត់ កងទ័ពបរទេសអង្គការអូតង់នឹងត្រូវដកចេញឲ្យអស់ពីទឹកដីអាហ្វហ្កានីស្ថាន យ៉ាងយូរដាច់ឆ្នាំ ២០១៤។ ប៉ុន្តែ ក្នុងហេតុផលសន្តិសុខ រដ្ឋាភិបាលអាហ្វហ្កានីស្ថានកំពុងស្វែងរកកិច្ចព្រមព្រៀងមួយជាមួយទីក្រុងវ៉ាស៊ីនតោន ដើម្បីអាចឲ្យទាហានអាមេរិកអាចបន្តស្ថិតនៅ ក្រោយការដកទ័ពបរទេសពីអាហ្វហ្កានីស្ថាន។ ចាប់តាំងពីថ្ងៃម្សិលមិញ សភាអាហ្វហ្កានីស្ថានត្រូវកោះប្រជុំពិសេស ដើម្បីពិនិត្យលើសន្ធិសញ្ញា ដែលរដ្ឋាភិបាលចង់ចុះជាមួយអាមេរិក។
ចុះផ្សាយនៅថ្ងៃ៖
ស្តាប់ - ០២:៣១
តើកងទ័ពអាមេរិកអាចបន្តស្ថិតនៅយ៉ាងម៉េច នៅក្នុងទឹកដីអាហ្វហ្កានីស្ថាន នៅក្រោយកាដកទ័ពបរទេស ចេញឲ្យអស់ពីអាហ្វហ្កានីស្ថាន នៅឆ្នាំ ២០១៤។ ទំាងនេះជាចម្ងល់ ដែលសមាជិកសភាមកពីគ្រប់តំបន់របស់អាហ្វហ្កានីស្ថាន ចោទសួរឡើងនៅក្នុងវេទិកាប្រជុំសភា ដែលបើកធ្វើកាលពីថ្ងៃព្រហស្បតិ៍ ទី ២១វិច្ឆិកា។
តាមគម្រោង កិច្ចប្រជុំសភា ដែលនឹងប្រព្រឹត្តធ្វើរហូតដល់ថ្ងៃអាទិត្យ សំដៅពិភាក្សា និងបោះឆ្នោត អនុម័តលើសន្ធិសញ្ញាទ្វេភាគីស្តីពីសន្តិសុខ ដែលរដ្ឋាភិបាលអាហ្វហ្កានីស្ថានចង់ធ្វើជាមួយទីក្រុងវ៉ាស៊ីនតោន។ ប្រសិនបើសភាអាហ្វហ្កានីស្ថានអនុម័តគាំទ្រសន្ធិសញ្ញាទ្វេភាគី នោះ កងទ័ពអាមេរិកាំងប្រមាណ ១៥០០០នាក់នឹងត្រូវបន្តស្ថិតនៅក្នុងប្រទេសអាហ្វហ្កានីស្ថាន។ ទិសដៅរបស់ពួកគេគឺ ដើម្បីបណ្តុះបណ្តាលកងទ័ពអាហ្វហ្កានីស្ថាន និងប្រយុទ្ធប្រឆាំងអំពើភេរវកម្ម។ សន្ធិសញ្ញាកម្រាស់៣២ទំព័រមានចែងផងដែរ ពីចំនួនមូលដ្ឋានទ័ព លក្ខខណ្ឌនៃអន្តរាគមន៍របស់ទ័ពអាមេរិក និងជំនួយហិរញ្ញវត្ថុដែលអាមេរិកសន្យាផ្តល់ឲ្យអាហ្វហ្កានីស្ថាន ក្នុងរយៈពេលវែង។
តាមអ្នកជំនាញ មានចំណុចជាច្រើន នៅក្នុងសន្ធិសញ្ញា ដែលមិនបំពេញចិត្តអ្នកនយោបាយអាហ្វហ្កានីស្ថាន។ ទីមួយ គឺលក្ខខណ្ឌនៃការអន្តរាគមន៍របស់ទ័ពអាមេរិក នៅពេលដែលកិច្ចព្រមព្រៀងបានចែងពីសិទ្ធិរបស់ទាហានអាមេរិកាំងដើម្បីចូលឆែកឆេរតាមផ្ទះរបស់ប្រជាជនអាហ្វហ្កានីស្ថាន។ ទីពីរទៀត រដ្ឋាភិបាលអាមេរិកបានទាមទារអភ័យឯកសិទ្ធិឲ្យទាហានរបស់ខ្លួន ក្នុងករណីមានបទល្មើសឧក្រិដ្ឋ មានន័យថា ទាហានអាមេរិកាំងដែលប្រព្រឹត្តកំហុស ឬឧក្រិដ្ឋនៅអាហ្វហ្កានីស្ថាន នឹងត្រូវជំនុំជម្រះដោយតុលាការអាមេរិកាំង ប៉ុន្តែ មិនមែនអាហ្វហា្កនីស្ថានទេ។
កាលពីថ្ងៃម្សិលមិញ លោកប្រធានាធិបតីអាហ្វហ្កានីស្ថាន ដែលត្រូវអស់អាណត្តិនៅខែមេសាឆ្នាំក្រោយ បានបញ្ជាក់ម្តងហើយ ម្តងទៀតពីសារៈសំខាន់នៃវត្តមានទ័ពអាមេរិកនៅអាហ្វហ្កានីស្ថាន។ តាមអ្នកតាមដាននយោបាយអាហ្វហ្កានីស្ថាន វត្តមានយោធាអាមេរិក ដើម្បីរក្សាសន្តិសុខ ប្រឈមនឹងការគំរាមកំហែងរបស់ពួកតាលីបង់ គឺជារឿងមួយ ប៉ុន្តែ គឺលុយដុល្លារ បៃតង សម្រាប់សេដ្ឋកិច្ចអាហ្វហ្កានីស្ថានដែលសំខាន់ជាងអ្វីទាំងអស់។ លុយដុល្លារអាមេរិកអាចជួយធានាការបើកប្រាក់ខែសម្រាប់កងទ័ពអាហ្វហ្កានីស្ថានប្រមាណ៣សែននាក់។ គេបារម្ភថា ចំនួនទាហានអាហ្វហ្កានីស្ថានដែលរត់ចូលទៅក្រុមឧទ្ទាម មកប្រឆាំងនឹងរដ្ឋាភិបាល នឹងអាចនឹងកើនឡើង នៅពេលដែលជីវភាពរបស់ពួកគេជួបការខ្វះខាត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ