សហព័ន្ធអ្នកកាសែតអន្តរជាតិ៖សេរីភាពសារព័ត៌មាននៅហុងកុង និងម៉ាកាវធ្លាក់ចុះក្នុងឆ្នាំ ២០១៥
នៅថ្ងៃសៅរ៍ ទី៣០ មករានេះ សហព័ន្ធអ្នកកាសែតអន្តរជាតិបានចេញផ្សាយរបាយការណ៍ប្រចាំឆ្នាំ ២០១៥ ស្តីពីសេរីភាពសារព័ត៌មាននៅក្នុងប្រទេសចិន។ របាយការណ៍បានកត់សម្គាល់ឃើញថា សេរីភាពសារព័ត៌មាននៅហុងកុងបានធ្លាក់ចុះយ៉ាងខ្លាំងក្នុងឆ្នាំ ២០១៥ និងបានចង្អុលចំមុខចិនដីគោកពីបទបានប្រើគ្រប់មធ្យោបាយដើម្បីត្រួតពិនិត្យ និងដាក់គំនាបលើបណ្តាញសារព័ត៌មាននៅហុងកុងដែលជាតំបន់ពាក់កណ្តាលស្វយ័ត។
ចុះផ្សាយនៅថ្ងៃ៖ កែប្រែថ្ងៃទី៖
របាយការណ៍ប្រចាំឆ្នាំ ២០១៥ របស់សហព័ន្ធអ្នកកាសែតអន្តរជាតិស្តីពីសេរីភាពសារព័ត៌មានក្នុងប្រទេសចិនបានផ្តោតសំខាន់លើសេរីភាពសារព័ត៌មាននៅហុងកុង និងម៉ាកាវដែលជាតំបន់ពិសេសពាក់កណ្តាលស្វយ័តរបស់ចិនដីគោក។ របាយការណ៍បានបញ្ជាក់ច្បាស់ៗពីការធ្លាក់ចុះសេរីភាពសារព័ត៌មាននៅហុងកុង និងម៉ាកាវក្នុងឆ្នាំ ២០១៥ កន្លងទៅ និងបានបរិហារចិនដីគោកពីបទប្រើគ្រប់មធ្យោបាយដើម្បីដាក់គំនាប ក៏ដូចជាត្រួតពិនិត្យលើគ្រប់បណ្តាញសារព័ត៌មានក្នុងស្រុក ពិសេសនៅហុងកុង និងម៉ាកាវ។
របាយការណ៍របស់សហព័ន្ធអ្នកកាសែតអន្តរជាតិបានផ្សព្វផ្សាយឡើង ចំពេលដែលមានការបាត់ខ្លួនបុគ្គលិកចំនួន ៥នាក់ដែលបម្រើការងារឲ្យក្រុមហ៊ុនបោះពុម្ពសៀវភៅនៅហុងកុងឈ្មោះ Mighty Current។ ការបាត់ខ្លួនមនុស្ស ទាំង៥នាក់ដ៏អាទិ៍កំបាំងនៅហុងកុងបានបំផុសឲ្យមានក្តីរបារម្ភជាពន់ពេកនៅក្នុងចំណោមមហាជនហុងកុងទូទៅ ពិសេសខណៈមានព័ត៌មានលេចឡើងថា មនុស្សទាំង ៥នាក់នោះប្រហែលជាកំពុងត្រូវបានរដ្ឋអំណាចចិនដីគោកឃុំឃំាង។
គួរជម្រាបជូនថា ក្រុមហ៊ុនបោះពុម្ពសៀវភៅនៅហុងកុងឈ្មោះ Mighty Current ល្បីខាងបោះពុម្ពសៀវភៅដែលមានខ្លឹមសារវាយប្រហាររដ្ឋាភិបាលចិនដីគោក។ សព្វថ្ងៃនៅហុងកុង រឿងអាស្រូវមួយនេះបានបំផុសឲ្យមានប្រតិកម្មប្រឆាំងចិនដីគោកពីបទរំលោភបំពានលើគោលការណ៍ប្រទេសមួយប្រព័ន្ធពីរដែលទីក្រុងប៉េកាំងបានចុះហត្ថលេខាជាមួយប្រទេសអង់គ្លេសក្នុងឆ្នាំ ១៩៩៧។ យោងតាមកិច្ចព្រមព្រៀង ហុងកុងត្រូវបន្តរក្សាលក្ខន្តិកដូចក្នុងជំនាន់អាណានិគមអង់គ្លេសរយៈពេល ៥០ឆ្នាំដោយគិតពីឆ្នាំ ១៩៩៧ ទាំងរបៀបរស់នៅក៏ដូចជាសិទ្ធិសេរីភាព។
តាមរបាយការណ៍របស់សហព័ន្ធអ្នកកាសែតអន្តរជាតិ ព្រឹត្តិការណ៍បាត់ខ្លួនបុគ្គលិក ៥នាក់នៅក្រុមហ៊ុនបោះពុម្ពសៀវភៅ Mighty Current បានធ្វើឲ្យពលរដ្ឋហុងកុងបារម្ភពីសន្តិសុខផ្ទាល់ខ្លួន និងសិទ្ធិសេរីភាពក្នុងការបញ្ចេញមតិ និងចោទចិនដីគោកថា បានប្រើអំណាចសេដ្ឋកិច្ចដើម្បីពង្រឹងឥទ្ធិពលរបស់ខ្លួននៅហុងកុងមុនពេលបោះឆ្នោតជ្រើសរើសមេដឹកនាំថ្មីហុងកុងនាឆ្នាំ ២០១៧ ខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ