ហុងកុង៖បាត់ខ្លួនអ្នកទទួលខុសត្រូវរោងពុម្ពបោះសៀវភៅម្នាក់ទៀត
នៅហុងកុង លោក លី បូ អ្នកទទួលខុសត្រូវមា្នក់នៃរោងពុម្ពមួយឈ្មោះ Mighty Current បានបាត់ខ្លួនតាំងពីថ្ងៃពុធ ទី៣០ ធ្នូ នេះជាការបញ្ជាក់ឲ្យដឹងរបស់ភរិយារបស់លោកលី បូ។ មុនលោកលី បូ នៅមានមិត្តរួមការងារចំនួន ៤នាក់ទៀតរបស់លោកក៏បានបាត់ដំណឹងសូន្យឈឹងមកដល់សព្វថ្ងៃដែរ។ គួរជម្រាបជូនថា រោងពុម្ព Mighty Current ជាប់ឈ្មោះខាងបោះពុម្ពសៀវភៅដែលរិះគន់ ទិតៀនរបបកុម្មុយនិស្តចិនដីគោក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
ការបាត់ខ្លួនអ្នកមានភាគហ៊ុននៅក្នុងរោងពុម្ព Mighty Current បានបំផុសមានសំណួរចោទឡើងថា តើពួកគេទាំង ៥នាក់មិនមែនត្រូវបានប៉ូលិសសម្ងាត់ចិនប៉េកាំងចាប់ខ្លួនទៅឃុំទេ ឬយ៉ាងណា ព្រោះរោងពុម្ព Mighty Current ជាប់ឈ្មោះខាងបោះពុម្ពសៀវភៅដែលរិះគន់ ទិតៀនរបបកុម្មុយនិស្តចិនដីគោក។
គួរជម្រាបជូនថា មានអាយុ ៦៥ឆ្នាំ លោកលី បូត្រូវបានគេប្រទះឃើញជាលើកចុងក្រោយនៅរោងពុម្ពក្នុងថ្ងៃពុធ ទី៣០ ធ្នូ តែស្រាប់តែបានបាត់ខ្លួនតាំងពីថ្ងៃនោះមក។ ភរិយារបស់លោកលី បូ គឺលោកស្រីសូហ្វី ចយបានរៀបរាប់ប្រាប់ AFP ថា ស្វាមីរបស់លោកស្រីពិតជាមានវត្តមានក្នុងទឹកដីហុងកុងនាថ្ងៃពុធ ទី៣០ ធ្នូ តែបានបាត់ខ្លួននៅពេលយប់ក្នុងថ្ងៃដដែលនោះ។
លោកស្រីចយបានប្រាប់ឲ្យដឹងបន្ថែមថា លោកលី បូបានទូរស័ព្ទឲ្យលោកស្រីនៅវេលាម៉ោង ១០យប់ក្នុងថ្ងៃពុធ ទី៣០ ធ្នូដោយប្រាប់លោកស្រីថា លោកសុខសប្បាយធម្មតាទេ តែលោកស្រីថា លេខទូរស័ព្ទដែលហៅលោកស្រីមិនមែនជាលេខរបស់ស្វាមីទេ តែជាលេខហៅមកពីចិនដីគោកក្នុងទីក្រុង Shenzhen។ គឺទើបតែនៅថ្ងៃសុក្រ ទី១ មករា ឆ្នាំ ២០១៦ ដែលលោកស្រីចយបានប្រាប់ដំណឹងស្វាមីដល់ប៉ូលិសហុងកុង ហើយប៉ូលិសហុងកុងក៏បានចាត់ទុករឿងនោះថា ជាការបាត់ខ្លួន។
នៅក្រោយការបាត់ខ្លួនមិត្តរួមការងារក្នុងខែតុលាកន្លងទៅ លោកលី បូធ្លាប់បានថ្លែងប្រាប់ AFP ថា ការបាត់ខ្លួននោះមានជាប់ពាក់ព័ន្ធនឹងរឿងបោះពុម្ពសៀវភៅនយោបាយហាមឃាត់នៅចិនដីគោក។ គួររម្លឹកជូនថា ទឹកដីហុងកុងត្រូវបានប្រទេសអង់គ្លេសប្រគល់ទៅឲ្យចិនដីគោកក្នុងឆ្នាំ ១៩៩៧ និងដែនដីពាក់កណ្តាលស្វយ័តមួយនេះបានទទួលសិទ្ធិសេរីភាពមួយចំនួនដែលនៅកន្លែងផ្សេងមិនអាចទទួលបានទេ ពិសេសសិទ្ធិសេរីភាពសារព័ត៌មាន។
តែខណៈនេះ គ្រប់គ្នាកំពុងបារម្ភពីការដែលរដ្ឋអំណាចប៉េកាំងបានព្យាយាមយកហុងកុងមកក្តាប់ណែងក្នុងដៃ ដោយកម្រិតសិទ្ធិសេរីភាពក្នុងការបញ្ចេញមតិ។ ក្រុមអង្គការសិទ្ធិមនុស្សធ្លាប់បានសម្តែងក្តីបារម្ភចំពោះការបាត់ខ្លួនមនុស្សនៅក្នុងរោងពុម្ព រោងពុម្ព Mighty Current។ អង្គការ Human Rights Watch បានបរិហារលើចេតនារបស់ចិនដីគោកក្នុងការរារាំងកុំឲ្យសៀវភៅនិយាយពីនយោបាយឆ្លងពីហុងកុងចូលទៅប៉េកាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ