ហុងកុង៖គណបក្សគាំទ្រចិនដីគោកទទួលបានជោគជ័យធំធេងនាការបោះឆ្នោតឃុំ សង្កាត់
នៅហុងកុង មានពលរដ្ឋហុងកុងជិត ៥០% បានចូលរួមបោះឆ្នោតនៅក្នុងការបោះឆ្នោតឃុំ សង្កាត់នាថ្ងៃអាទិត្យ ទី២២ វិច្ឆិកា។ នេះជាអត្រាមួយដ៏ខ្ពស់ដែលមិនធ្លាប់មានទេនៅក្នុងការបោះឆ្នោតឃុំ សង្កាត់នាពេលកន្លងមក។ ម្យ៉ាងទៀត នេះក៏ជាការបោះឆ្នោតលើកទី១ បន្ទាប់ពីមានការងើបបះបោររបស់សកម្មជនប្រជាធិបតេយ្យនៃចលនាឆ័ត្រកាលពីរដូវលំហើយឆ្នំា ២០១៤។ យ៉ាងណាក៏ដោយ ជោគជ័យនៅតែស្ថិតក្នុងកណ្តាប់ដៃរបស់គណបក្សមានទំនោររកចិនដីគោកដោយទទួលបានសម្លេងគាំទ្រជិត ៧០%។
ចុះផ្សាយនៅថ្ងៃ៖
ស្តាប់ - ០១:៥៨
ការបោះឆ្នោតឃុំ សង្កាត់នៅហុងកុង គឺជាការបោះឆ្នោតជ្រើសរើសសមាជិកគណៈកម្មាធិការតំបន់ ពោលមានន័យស្មើនឹងការបោះឆ្នោតជ្រើសរើសទីប្រឹក្សាឃុំ សង្កាត់។ តែសម្រាប់ពលរដ្ឋហុងកុងទូទៅ ការបោះឆ្នោតរបៀបនេះក៏សំខាន់ដូចការបោះឆ្នោតជ្រើសរើសតំណាងរាស្រ្តដែលគ្រោងរៀបចំនៅឆ្នំា ២០១៧ ខាងមុខ។ អ្វីដែលគួរឲ្យកត់សម្គាល់ នេះជាលើកទី១ ដែលការបោះឆ្នោតឃុំ សង្កាត់បានរៀបចំឡើង បន្ទាប់ពីមានចលនាងើបបះបោររបស់ក្រុមសកម្មជនប្រជាធិបតេយ្យនៃចលនាឆ័ត្រកាលពីរដូវលំហើយឆ្នាំ ២០១៤។
តែយ៉ាងណាក៏ដោយ លទ្ធផលផ្លូវការចេញផ្សាយថ្ងៃនេះឲ្យដឹងថា គណបក្សសម្ព័ន្ធប្រជាធិបតេយ្យដើម្បីសុវឌ្ឍិកម្ម និងការចម្រើនដែលជាគណបក្សមានទំនោររកចិនដីគោកបានទទួលជោគជ័យយ៉ាងធំធេងប្រឈមនឹងគណបក្សប្រជាធិបតេយ្យ។ ក៏ប៉ុន្តែ គណបក្សប្រជាធិបតេយ្យហាក់ដូចជាមិនសូវភ្ញាក់ផ្អើលនឹងលទ្ធផលនេះប៉ុន្មានទេ ព្រោះជាទូទៅ គណបក្សគាំទ្រចិនដីគោកមានសមត្ថភាព និងលទ្ធភាពច្រើនជាងគណបក្សប្រជាធិបតេយ្យឆ្ងាយណាស់សម្រាប់ការបោះឆ្នោតឃុំ សង្កាត់។ ឧទាហរណ៍ជាក់ស្តែង បេក្ខជនរបស់បក្សកាន់អំណាចបានចុះធ្វើយុទ្ធនាការដោយនំាយកទៅជាមួយនូវកាដូ និងជំនួយផ្សេងៗសម្រាប់ពលរដ្ឋដល់លំនៅដ្ឋានតែម្តង។
អ្នកបោះឆ្នោតមានវ័យចំណាស់ខ្លះថែមទំាងបានសារភាពត្រង់ៗថា ពួកគេបានបោះឆ្នោតតាមការបង្គាប់របស់មន្រ្តីស្រុក។ នេះពិតជាទង្វើមួយដែលបានធ្វើឲ្យគណបក្សប្រឆំាងចិនដីគោកមិនសប្បាយចិត្តសោះឡើយ។ ១ឆ្នំាក្រោយព្រឹត្តិការណ៍ងើបបះបោររបស់មហាជនហុងកុងនៃចលនាឆ័ត្រមក កំហឹងប្រឆាំងនឹងនយោបាយចិនដីគោកនៅតែមិនទាន់អាចផ្តល់ជោគជ័យឲ្យគណបក្សប្រជាធិបតេយ្យតាមរយៈកាបោះឆ្នោតឃុំ សង្កាត់នាពេលនេះទេ។ តែគេត្រូវហ៊ានទទួលស្គាល់ពីការចូលប្រឡូកក្នុងឆាកនយោបាយហុងកុងជាបណ្តើរៗរបស់សកម្មជននៃចលនាឆ័ត្រ។ ក្តីសង្ឃឹមរបស់ពួកគេ គឺប្តូររូបភាពនយោបាយហុងកុងនៅក្នុងការបោះឆ្នោតសភានាឆ្នំា ២០១៧ខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ