សេចក្តីព្រាងរដ្ឋធម្មនុញ្ញថ្មីនៅតែខ្ទាស់ហាមមិនឲ្យលោកស្រីអ៊ុងសាន ស៊ូជីអាចក្លាយជាប្រធានាធិបតី
រដ្ឋាភិបាលភូមាបន្ទន់ជំហរ ដោយសុខចិត្តយល់ព្រមធ្វើកំណែទម្រង់រដ្ឋធម្មនុញ្ញទៅតាមការទាមទាររបស់បក្សប្រឆាំង។ កាលពីថ្ងៃ ព្រហស្បតិ៍ រដ្ឋាភិបាលចេញផ្សាយជាសាធារណៈ សេចក្តីព្រាងរដ្ឋធម្មនុញ្ញថ្មី ដែលត្រូវបានដាក់ឲ្យសភា ពិភាក្សា កាលពីថ្ងៃពុធ ទី ១០មិថុនា។ ជាមួយនឹងរដ្ឋធម្មនុញ្ញថ្មី ក្រុមយោធា ភូមា នឹងត្រូវកាត់បន្ថយសំឡេង និងគ្មានសិទ្ធិធ្វើវេតូនៅសភាតទៅទៀត។ ប៉ុន្តែ យ៉ាងណាក៏ដោយគណបក្សប្រឆាំងសំខាន់របស់ភូមា គណបក្សសម្ព័ន្ធជាតិដើម្បីប្រជាធិបតេយ្យ នៅតែរិះគន់ និងចាត់ទុក ការធ្វើទម្រង់របស់រដ្ឋអំណាចភូមាថា នៅទាន់មិនគ្រប់គ្រាន់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
សេចក្តីព្រាងរដ្ឋធម្មនុញ្ញដែលគេទន្ទឹងរង់ចាំជាយូរមកហើយ ត្រូវបានចេញផ្សាយជាសាធារណៈ កាលពីថ្ងៃព្រហស្បតិ៍ នៅក្នុងកាសែតរដ្ឋភូមា The Mirror។ ចំនុចវិជ្ជមាននៃសេចក្តីព្រាងរដ្ឋធម្មនុញ្ញ គឺការបិទបញ្ចប់សិទ្ធិធ្វើវេតូរបស់យោធា នៅក្នុងរដ្ឋសភា តទៅទៀត ចំណែកបុគ្គលដែលមានកូនចៅ រៀបការជាមួយជនបរទេស ក៏នឹងត្រូវគេលែងហាមឃាត់ ក្នុងរឿងឈរឈ្មោះ ជាប្រធានាធិបតីភូមា។
នៅភូមា នៅក្រោយរបបសឹករំលាយខ្លួន និងបង្កើតរដ្ឋាភិបាលស៊ីវិល ក្រុមយោធានៅតែដើរតួសំខាន់ និងកាន់កាប់ ដោយស្វ័យប្រវត្តិ សំឡេង ២៥ភាគរយនៅសភា។ តាមរដ្ឋធម្មនុញ្ញបច្ចុប្បន្ន ដើម្បីធ្វើវិសោធនកម្ម កែប្រែរដ្ឋធម្មនុញ្ញ គេត្រូវការសំលេងយ៉ាងតិច ៧៥ភាគរយនៅសភា។ លក្ខខណ្ឌនេះបានបើកដៃឲ្យយោធាភូមាមានសិទ្ធិធ្វើវេតូ។ ប៉ុន្តែ សេចក្តីព្រាងរដ្ឋធម្មនុញ្ញថ្មីបានតម្រូវឲ្យមានត្រឹមតែសំឡេង៧០ភាគរយប៉ុណ្ណោះ ពោលគឺអំណើះតទៅ គណបក្សប្រឆាំង នឹងអាចមានក្តីសង្ឃឹម មានលទ្ធភាព ទាមទារធ្វើកំណែទម្រង់រដ្ឋធម្មនុញ្ញ ដោយគ្មានយោធា ខ្ទាស់ជើង ជាស្វ័យប្រវត្តិ។
យ៉ាងណាក៏ដោយ នៅក្រោយការចុះផ្សាយ របស់កាសែតរដ្ឋភូមា គណបក្សសម្ព័ន្ធជាតិដើម្បីប្រជាធិបតេយ្យ ដែលជាគណបក្សប្រឆាំង សំខាន់នៅភូមា នៅតែសំដែងការខកចិត្ត ព្រោះថា វិសោធនកម្ម រដ្ឋធម្មនុញ្ញ នៅទីបំផុតទៅ មិនបាននិយាយពីករណីមេដឹកនាំរបស់ពួកគេ គឺលោកស្រីអ៊ុងសាន ស៊ូជីទេ។ ជារួម លោកស្រី មេបក្សប្រឆាំង នៅតែត្រូវគេហាមឃាត់ មិនឲ្យចូលកាន់តំណែងជាប្រធានាធិបតីភូមា បើទោះលោកស្រីឈ្នះឆ្នោត នោះក៏ព្រោះថា លោកស្រី មានស្វាមី និងកូនជាជនបរទេស។
តាំងពីថ្ងៃពុធ លោកស្រីមេបក្សប្រឆាំងភូមា បានផ្តើមទស្សនកិច្ចផ្លូវរដ្ឋ ជាប្រវត្តិសាស្រ្ត នៅប្រទេសចិន ទៅតាមការអញ្ជើញរបស់បក្សកុម្មុយនិស្តចិន។ នៅថ្ងៃព្រហស្បតិ៍លោកស្រីបានជួបសន្ទនាជាមួយលោកប្រធានាធិបតីចិន ស៊ី ជីនពីង ដែលបាននិយាយត្រង់ៗថា តាមរយៈទស្សនកិច្ចលើកនេះ លោកស្រីអ៊ុងសាន ស៊ូជី នឹងស្គាល់បានស៊ីជម្រៅប្រទេស និងបក្សកុម្មុយនិស្តចិន។ “ខ្ញុំសង្ឃឹមថា លោកស្រី និងគណបក្សរបស់លោកស្រី នឹងបន្តដើរតួនាទីសំខាន់ ក្នុងការកសាង និងដឹកនាំប្រជាជនភូមា”។ នេះជាអ្វីដែលលោកប្រធានាធិបតីចិន ថ្លែងទៅកាន់មេបក្សប្រឆាំងភូមា។ គណបក្សប្រឆាំងរបស់លោកស្រីអ៊ុងសាន ស៊ូជីត្រូវគេព្យាករថា នឹងអាចឈ្នះឆ្នោត ច្រើន នៅថ្ងៃបោះឆ្នោតនាខែវិច្ឆិកាខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ