សភាភូមាបដិសេធមិនធ្វើវិសោធនកម្មរដ្ឋធម្មនុញ្ញនៅមុនការបោះឆ្នោត ឆ្នាំ២០១៥
ច្បាស់ដោយគ្មានស្រពិចស្រពិល លោកស្រីអ៊ុងសាន ស៊ូជី ប្រមុខដឹកនាំបក្សប្រឆាំងភូមា នឹងមិនអាចក្លាយជាប្រធានាធិបតីភូមា បើសិនជាគណបក្សរបស់លោកស្រីឈ្នះឆ្នោត នៅឆ្នាំក្រោយ។ កាលពីថ្ងៃអង្គារ ទី ១៨ វិច្ឆិកា ប្រធានសភាភូមា បានបញ្ជាក់ប្រាប់អ្នកកាសែតថា សភានឹងមិនអាចធ្វើវិសោធនកម្មរដ្ឋធម្មនុញ្ញ នៅមុនការបោះឆ្នោតជាតិ នៅឆ្នាំ២០១៥ទេ។ គណបក្សប្រឆាំងបានទាមទារឲ្យសភា និងរដ្ឋាភិបាលធ្វើវិសោធនកម្មរដ្ឋធម្មនុញ្ញ ដែលគេវាយតម្លៃថា ជារនាំង ឧបសគ្គ មិនឲ្យលោកស្រីជ័យលាភីណូបែលសន្តិភាពអាចឈរឈ្មោះជាបេក្ខជនប្រធានាធិបតី។
ចុះផ្សាយនៅថ្ងៃ៖
ស្តាប់ - ០២:០៧
ការធ្វើវិសោធនកម្មរដ្ឋធម្មនុញ្ញឲ្យបានមុនពេលបោះឆ្នោតជាតិ នៅឆ្នាំ ក្រោយ គឺជារឿងដែលមិនអាចទៅរួច។ នេះបើតាមការប្រកាសរបស់លោកស្វេ ម៉ាន់ ប្រធានរដ្ឋសភាភូមា កាលពីថ្ងៃអង្គារ។
ការសម្រេចរបស់សភា ដែលបក្សប្រឆាំងទន្ទឹងរង់ចាំយ៉ាងអន្ទះសារ បានបិទបញ្ចប់ក្តីសង្ឃឹមរបស់លោកស្រីអ៊ុងសាន ស៊ូជី មេបក្សប្រឆាំងភូមា ដែលប្រាថ្នាចង់ក្លាយជាប្រធានាធិបតីភូមា ក្នុងករណីគណបក្សរបស់លោកស្រី ឈ្នះឆ្នោត នៅឆ្នាំ២០១៥។
ប្រធានសភាបានបញ្ជាក់ដំណឹងនេះទៅអ្នកកាសែត បន្ទាប់ពីមានការចាក់ផ្សាយតាមទូរទស្សន៍ នូវកិច្ចប្រជុំពេញអង្គមួយរបស់រដ្ឋសភា កាលពីថ្ងៃអង្គារ។ នៅក្នុងកិច្ចប្រជុំសភា ដែលបើកធ្វើតាំងពីថ្ងៃចន្ទ យោភាភូមាដែលកាន់កាប់អាសនៈចំនួន ២៥ភាគរយនៃរដ្ឋសភា បានចេញមុខប្រឆាំង មិនឲ្យសភាបោះឆ្នោតធ្វើវិសោធនកម្មរដ្ឋធម្មនុញ្ញ។ វរសេនីយឯក តៃ ណាំង សមាជិកយោធា ដែលមានឥទ្ធិពលជាងគេនៅសភា បានឡើងនិយាយថា វានឹងជារឿងគួរឲ្យព្រួយបារម្ភ សម្រាប់អនាគតប្រជាជនភូមា ប្រសិនបើកូនរបស់ថ្នាក់ដឹកនាំជាន់ខ្ពស់របស់ពួកគេ ជាជនបរទេស។
លោកស្រីអ៊ុងសាន ស៊ូជីដែលរៀបការជាមួយជនជាតិអង់គ្លេស (ទទួលមរណភាពរួចហើយ) មានកូនប្រុសពីរនាក់ដែលកាន់លិខិតឆ្លងដែនអង់គ្លេស។ គណបក្សប្រឆាំងធ្លាប់មានក្តីសង្ឃឹម កាលពីខែតុលា នៅពេលដែលរដ្ឋាភិបាលសន្យាថា សភានឹងពិភាក្សាពីការកែប្រែរដ្ឋធម្មនុញ្ញ។ តាមប្រធានសភាភូមា បើទោះបីជាគេមិនធ្វើវិសោធនកម្ម នៅមុនឆ្នាំ ២០១៥ ប៉ុន្តែ ការបោះឆ្នោតប្រជាមតិដើម្បីទាមទារឲ្យមានវិសោធនកម្មរដ្ឋធម្មនុញ្ញ អាចនឹងធ្វើឡើង នៅខែឧសភា ឆ្នាំ ២០១៥ គឺនៅមុនការបោះឆ្នោតជាតិ ដែលនឹងត្រូវប្រព្រឹត្តទៅ នៅចុងខែតុលា ឬ ដើមខែវិច្ឆិកា ឆ្នាំក្រោយ។
ការបដិសេធមិនកែប្រែរដ្ឋធម្មនុញ្ញរបស់សភាភូមា ធ្វើឡើងនៅតែប៉ុន្មានថ្ងៃក្រោយជំនួបរវាងលោកប្រធានាធិបតីអាមេរិក បារ៉ាក់ អូបាម៉ា ជាមួយលោកថេន សេន ប្រធានាធិបតីភូមា។ នៅក្នុងជំនួបជាមួយលោកស្រីអ៊ុងសាន ស៊ូជី លោកអូបាម៉ាបានទាមទារឲ្យមានការបោះឆ្នោត ដោយសេរី និងស្មើភាព។ លោកស្រី មេបក្សប្រឆាំងវិញ បានរិះគន់ដោយចំហរដ្ឋធម្មនុញ្ញភូមា ដែលលោកស្រីចាត់ទុកថា មិនយុត្តិធម៌ និងគ្មានលក្ខណៈប្រជាធិបតេយ្យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ