ថៃ៖របបសឹកបានសម្រេចលើកថ្ងៃបោះឆ្នោតសភានៅក្រោយខែមិថុនា ឆ្នំា ២០១៧
នៅក្នុងប្រទេសថៃ របបសឹកបានប្រកាសឲ្យដឹងនៅថ្ងៃពុធ ទី១៦ កញ្ញាពីការលើកថ្ងៃបោះឆ្នោតសភា។ ការរៀបចំបោះឆ្នោតសភានៅពេលខាងមុខដែលមិនអាចធ្វើឡើងនៅមុនខែមិថុនា ឆ្នំា ២០១៧ បានទេ។ គួររម្លឹកជូនថា នៅប៉ុន្មានថ្ងៃក្រោយរដ្ឋប្រហារកាលពីជាង ១៥ខែមុន របបសឹកដឹកនំាដោយលោកប្រាយុទ្ធ ចាន់អូចាបានសន្យាថា ការរៀបចំបោះឆ្នោតសភានឹងត្រូវធ្វើឡើងយ៉ាងយូរបំផុត ១៨ខែក្រោយថ្ងៃរដ្ឋប្រហារ។ តែនៅពេលថ្ងៃកំណត់កាន់តែខិតជិតមកដល់ របបសឹកតែងតែបានលើកពេលជាបន្តបន្ទាប់។
ចុះផ្សាយនៅថ្ងៃ៖
ស្តាប់ - ០២:១៥
អ្វីដែលក្រុមឧត្តមសនីយបានសន្យាពេញមាត់ជាផ្លូវការតំាងពីក្រោយថ្ងៃរដ្ឋប្រហារជាង ១ឆ្នំាកន្លងទៅនោះគឺថា ពួកគេនឹងប្រគល់អំណាចទៅឲ្យស៊ីវិលកាន់កាប់វិញតាមរយៈការរៀបចំបោះឆ្នោតនៅ ១ឆ្នំាកន្លះក្រោយថ្ងៃរដ្ឋប្រហារ មានន័យថា នៅប៉ុន្មានខែទៀតខាងមុខ។ ការលើកឡើងរបស់ក្រុមឧត្តមសេនីយដូចនេះដោយគេសំអាងលើការចំណាយពេលដើម្បីរៀបចំតាក់តែងច្បាប់រដ្ឋធម្មនុញ្ញថ្មី។ តែនៅពេលថ្ងៃកំណត់កាន់តែខិតចូលជិតមកដល់ របបសឹកដឹកនំាដោយលោកប្រាយុទ្ធ ចាន់អូចាតែងតែបានលើកពេលម្តងជាពីរដង។ នៅដើមខែកញ្ញានេះ ក្រុមប្រឹក្សាកំណែទម្រង់ដែលបង្កើតឡើងដោយរបបសឹកបានប្រកាសច្រានចោលសេចក្តីព្រាងច្បាប់រដ្ឋធម្មនុញ្ញថ្មី។
គឺទង្វើរបស់ក្រុមប្រឹក្សាកំណែទម្រង់នេះហើយដែលរបបសឹកបានយកទៅធ្វើជាហេតុផលក្នុងការលើកពេលរៀបចំបោះឆ្នោតសភា។ នៅក្នុងកិច្ចប្រជុំជាមួយមន្រ្តីការទូតបរទេសក្នុងទីក្រុងបាងកកនាថ្ងៃពុធ ទី១៦ កញ្ញា លោកឧបនាយករដ្ឋមន្រ្តីថៃវីសានុ គ្រាងាមបានថ្លែងថា ការរៀបចំតាក់តែងច្បាប់រដ្ឋធម្មនុញជាថ្មីនឹងត្រូវប្រើពេលយ៉ាងតិចបំផុត ២០ខែ និងថា លោកសង្ឃឹមនឹងអាចរៀបចំបោះឆ្នោតសភានៅក្នុងខែមិថុនា ឆ្នំា ២០១៧ ឬមួយក៏ក្រោយនេះបន្តិច ហើយ ១ខែក្រោយការបោះឆ្នោត ថៃនឹងមានរដ្ឋាភិបាលថ្មីដឹកនំាដោយស៊ីវិល។ ចំណែកលោករដ្ឋមន្រ្តីការបរទេសបានបន្ថែមថា លោកនាយករដ្ឋមន្រ្តីក៏មិនចង់បន្តកាន់អំណាចយូរដែរ។
គេនៅមិនទាន់ដឹងថា តើនឹងមានការប្រកាសលើកពេលបោះឆ្នោតជាថ្មីឬអត់ទេ។ តែបើរបបសឹកគោរពតាមអ្វីដែលខ្លួនទើបបានសន្យាជាថ្មីថានឹងរៀបចំបោះឆ្នោតនៅក្នុងខែមិថុនា ឆ្នំា ២០១៧ មែននោះ នោះមានន័យថា របបសឹកបានកាន់អំណាចរយៈពេល ៣ឆ្នំាដែលជារយៈពេលយូរបំផុតមិនធ្លាប់មានទេគិតតំាងពីឆ្នំា ១៩៦៩។
របបសឹកធ្លាប់បានធានាថា វត្តមានរដ្ឋធម្មនុញ្ញថ្មីជារឿងមួយមិនអាចខ្វះបានសម្រាប់ផ្សះផ្សារសង្គមថៃដែលកំពុងបែកបាក់។ សូមជម្រាបជូនថា ការប្រកាសលើកពេលបោះឆ្នោតជាថ្មីពេលនេះបានធ្វើឡើង ចំពេលដែលស្ថានភាពសិទ្ធិមនុស្សកាន់តែធ្លាក់ដុនដាប និងចំពេលដែលក្តីបារម្ភកំពុងបន្តកើតមានជុំវិញស្ថានភាពសុខភាពរបស់ព្រះមហាក្សត្រព្រះចៅភូមិវិបុល អាឌូយ៉ាដេតដែលកំពុងសម្រាកព្យាបាលជម្ងឺក្នុងមន្ទីរពេទ្យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ