សភាថៃច្រានចោលគម្រោងរដ្ឋធម្មនុញ្ញ ការបោះឆ្នោតអាចនឹងត្រូវលើកពេលទៀត
គម្រោងកំណែទម្រង់រដ្ឋធម្មនុញ្ញ របស់រដ្ឋាភិបាលសឹកកំពុងកាន់អំណាច ត្រូវបានសភាដែលរបបសឹកខ្លួនឯងជាអ្នកចាត់តាំងឡើងសោះ ច្រានចោលនៅថ្ងៃអាទិត្យនេះ។ ដំណើរការកំណែទម្រង់ ត្រូវវិលមកចំណុចចាប់ផ្តើមវិញជាថ្មី ! គឺជាបរាជ័យដ៏ជូរចត់សម្រាប់របបសឹក ប៉ុន្តែការច្រានចោលបែបនេះអាចជាប្រការល្អសម្រាប់រដ្ឋាភិបាល ក្នុងការរក្សាអំណាចឱ្យបានកាន់តែយូរ និងមានលេសគ្រប់គ្រាន់សម្រាប់ពន្យារពេលបោះឆ្នោត។
ចុះផ្សាយនៅថ្ងៃ៖ កែប្រែថ្ងៃទី៖
គម្រោងច្បាប់រដ្ឋធម្មនុញ្ញជាមូលដ្ឋានគ្រឹះជាតិស្នើឡើងដោយរដ្ឋាភិបាលសឹកថៃនេះ គឺជាគម្រោងច្បាប់ទី២០ហើយ បើគិតចាប់ពីរបបរាជានិយមផ្តាច់ការថៃបានរលំរលាយទៅនៅឆ្នាំ១៩៣២មក។ តែនៅក្នុងចំណោមសមាជិកទាំង២៤០នាក់ មានដល់ទៅ១៣៥សំឡេងបានបដិសេធ ទល់នឹង ១០៥សំឡេងគាំទ្រ ប៉ុណ្ណោះ បើទោះបីជារបបសឹក និងក្រុមឧត្តមសេនីយ៍កំពូលៗ បានប្រើគ្រប់មធ្យោបាយ គ្រប់ល្បិចដើម្បីធ្វើយ៉ាងណាឱ្យច្បាប់នេះអាចចេញរួចក៏ដោយ។ របបសឹកបានប្រើមធ្យោបាយក្តៅដែលពេលខ្លះជ្រុលហួសហេតុ រហូតដល់ត្រួតពិនិត្យយ៉ាងតឹងតែងការតស៊ូមតិជាសាធារណៈផង។
ប៉ុន្តែគម្រោងច្បាប់នេះ បានរងការរិះគន់យ៉ាងខ្លាំងពីស្ទើរគ្រប់ស្រទាប់នយោបាយទាំងអស់ មិនមែនតែបក្សប្រឆាំងមួយប៉ុណ្ណោះទេ។ បើតាមគម្រោងច្បាប់ អំណាចរបស់រដ្ឋាភិបាលជាប់ឆ្នោតនឹងរួមតូច ដោយបង្កើតឱ្យមានក្រុមប្រឹក្សា តែងតាំងឈ្មោះរួចជាស្រេចដែលអាចក្តាប់អំណាចបានភ្លាម ក្នុងពេលប្រទេសមានវិបត្តិ។ គណៈកម្មការដែលមានសមាជិក២២រូប ជាមេទាហាន ជាមេប៉ូលិស ... អាចចូលធ្វើអន្តរាគមន៍ដឹកនាំប្រទេស បានគ្រប់ពេលវេលា សម្រាប់រយៈពេល៥ឆ្នាំ គិតចាប់ពីច្បាប់នេះអនុម័តរួច។ គឺត្រង់ចំណុចមាត្រានេះហើយ ដែលសមាជិកសភាភាគច្រើនមិនពេញចិត្ត! ចំណែកខាងបក្សប្រឆាំងវិញ ដូចយើងបានធ្លាប់ឮមកជារឿយៗ គម្រោងកំណែទម្រង់ច្បាប់រដ្ឋធម្មនុញ្ញនេះ គ្រាន់តែជាមធ្យោបាយផ្តល់អំណាចឱ្យរបបសឹក និងជារនាំងរាំងស្ទះការស្តារលទ្ធិប្រជាធិបតេយ្យនៅថៃឡើងវិញតែប៉ុណ្ណោះ។
អន្តរកាលនយោបាយ អូសបន្លាយ ថែម៨ខែទៀត
ពេលនេះអ្វីៗហាក់ដូចជាត្រូវចាប់ផ្តើមពីចំណុចសូន្យឡើងវិញអញ្ចឹង។ អន្តរកាលនយោបាយត្រូវពន្យារពេលបន្តទៅទៀតយ៉ាងហោចណាស់ ក៏៨ខែបន្ថែមទៀតដែរ។
របបសឹកដែលដឹកនាំដោយលោកប្រាយុទ្ធ ចាន់អូចា ដែលបានឡើងកាន់អំណាចក្រោយរដ្ឋប្រហារកាលពីខែឧសភា ២០១៤មក តែងបានសន្យាផ្តល់សន្ទុះថ្មីដល់ប្រទេស តាមរយៈការតាក់តែងរដ្ឋធម្មនុញ្ញថ្មី ដ៏ចាំបាច់ សម្រាប់ខិតឱ្យបានកាន់តែជិតជាមួយពលរដ្ឋថៃ មុននឹងបោះឆ្នោត។ ព្រោះសូមបញ្ជាក់ជាថ្មី ថាក្នុងប្រវត្តិប្រទេសថៃ រាល់ការបោះឆ្នោតតែងផ្តល់ជ័យជំនះដល់បក្សប្រឆាំង បក្សប្រជាធិបតេយ្យនិយមរបស់គ្រួសារត្រកូលថាក់ស៊ីន ស៊ីណាវ៉ាត់ និងបក្សអភិរក្សនិយម និងក្រុមស្និទ្ធនឹងរាជវង្សមិនដែលស្គាល់ជ័យជំនះតាមសន្លឹកឆ្នោតទេ។
តែជាចៃដន្យគម្រោងច្បាប់ដែលមានធានាអំណាចយោធានិងប៉ូលិស ត្រូវបានច្រានចោលដោយ ក្រុមប្រឹក្សាកំណែទម្រង់ជាតិ។ ជាផលវិបាក គេត្រូវផ្តើមដំណើរការតាក់តែងអត្ថបទច្បាប់ថ្មី។ របបសឹកមានពេលមួយខែសម្រាប់ បង្កើតគណៈកម្មការតាក់តែងគម្រោងច្បាប់ថ្មី។ ហើយគណៈកម្មការនេះមានពេល១៨០ថ្ងៃ សម្រាប់សរសេរតែងជាច្បាប់ ដែលនឹងត្រូវបន្ទាប់មកឆ្លងកាត់ការធ្វើប្រជាមតិ។ ដូច្នេះការបោះឆ្នោតនឹងត្រូវ ដោយចៀសមិនរួច លើកពេលយ៉ាងហោច ពី៦ ទៅ៧ខែ។
ហើយបើមិនទាន់មានការបោះឆ្នោត បរាជ័យនេះថ្វីបើជាបាក់មុខបន្តិចមែន របបសឹកនៅអាចអង្គុយពីលើបាន ព្រមទាំងអាចបំពេញចំណង់ ដែលមានកប់ក្នុងចិត្ត កាន់អំណាចបន្តទៀត បានរហូតយ៉ាងហោចណាស់ក៏បានទល់នឹងឆ្នាំ២០១៧ដែរ។ ម្យ៉ាងវិញទៀត បរិបទមិនជាក់លាក់ក្នុងរាជវាំង ដោយស្ថានភាពសុខភាព របស់ព្រះរាជាភូមិបុល ព្រះជន្ម៨៧វស្សា ដុនដាបខ្លាំងគួរឱ្យបារម្ភ របបសឹកមានលេសគ្រប់យ៉ាងនឹងប្រើទម្ងន់ដៃសឹក គ្រប់គ្រងប្រទេស។
យើងមិនដឹងថាតើក្រុមឧត្តមសេនីយ៍ជាមេដឹកនាំថៃ មានប្រតិកម្មយ៉ាងណាទេ ចំពោះឆ្នោតអវិជ្ជមានថ្ងៃអាទិត្យនេះ។ របបសឹកអាចនឹងប្រែចិត្ត ក្រោយពីបានស្តាប់ឮការរិះគន់ពីសំណាក់សមាជិកក្នុងក្រុម ហើយបើកចិត្តឱ្យទូលាយ និងសេរីជាមុន។ ឬផ្ទុយទៅវិញ កាន់តែក្រេវក្រោធដាក់ស្រមោលរបស់ខ្លួន កើតភាពសង្ស័យកាន់តែខ្លាំង ហើយទៅរឹតបន្តឹងជួរកាន់អំណាចកាន់តែណែន ប្រលេះចោលឱ្យនូវក្រុម និងបុគ្គលណាដែលបានបោះឆ្នោតប្រឆាំងក៏ថាបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ