ក្រុមឧទ្ទាមតាលីបង់ វាយប្រហារវិហារស៊ីអ៊ីតនៅប៉ាគីស្ថាន សម្លាប់មនុស្សអស់យ៉ាងហោចណាស់២០នាក់
ក្រុមឧទ្ទាមមួយក្រុមប្រដាប់ដោយអាវុធនិងគ្រាប់បែក បានបើកការវាយប្រហារទៅលើព្រះវិហារស៊ីអីតនៅប៉ាគីស្ថាន នៅថ្ងៃសុក្រ ទី១៣កុម្ភៈម្សិលមិញ។ ការវាយប្រហារនេះ បានស្លាប់មនុស្សអស់យ៉ាងហោចណាស់២០នាក់ និងធ្វើឲ្យរបួសជាច្រើនទៀត។ ក្រោយកើតហេតុ ក្រុមឧទ្ទាមតាលីបង់បានចេញមុខមកអះអាងថា ខ្លួនជាអ្នកនៅពីក្រោយការវាយប្រហារនេះ។ និងថា នេះគឺជាការសងសឹក ទៅលើរដ្ឋាភិបាលប៉ាគីស្ថាន ដែលបានកាត់ទោសប្រហារជីវិតយុទ្ធជនតាលីបង់ម្នាក់កាលពីចុងឆ្នាំ២០១៤កន្លងទៅ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥២
មនុស្សយ៉ាងហោចណាស់២០នាក់បានស្លាប់ និង៤៥នាក់ទៀតរងរបួស បន្ទាប់ពីក្រុមឧទ្ទាមប្រដាប់អាវុធមួយក្រុម បានសម្រុកចូលក្នុងពិធីបួងសួងថ្ងៃសុក្រ នៃព្រះវិហារសាសនាស៊ីអីតមួយ នៅក្នុងក្រុងប៉េសាវ៉ា នៃប្រទេសប៉ាគីស្ថាន។ មន្ដ្រីប៉ូលីសបានឲ្យដឹងថា បន្ទាប់ពីបើកការបាញ់ប្រហារដោយកាំភ្លើង ក្រុមឧទ្ទាមដែលមានគ្នា៣នាក់ បានបំផ្ទុះគ្រាប់បែកធ្វើអត្តឃាតចំនួន៣គ្រាប់ផ្ទួនៗគ្នាផងដែរ។ បើតាមមន្ដ្រីប៉ូលីសដដែល ជនប្រដាប់អាវុធចំនួន២នាក់ក្នុងចំណោម៣នាក់ បានស្លាប់ដោយសារតែគ្រាប់បែកអត្តឃាត និងម្នាក់ទៀត ស្លាប់ដោយសារតែសាសនិកជន ដែលចូលរួមពិធីបួងសួង។
ក្រោយកើតហេតុ ក្រុមឧទ្ទាមតាលីបង់ TTP បានចេញមុខមកទទួលខុសត្រូវចំពោះការវាយប្រហារនេះ។ នៅក្នុងសេចក្ដីថ្លែងការណ៍ផ្ញើចេញតាមសារអេឡិចត្រូនិក ក្រុមតាលីបង់ TTP បានឲ្យដឹងថា ការវាយប្រហារនេះ គឺជាការសងសឹកចំពោះរដ្ឋាភិបាលប៉ាគីស្ថាន ដែលបានកាត់ទោសប្រហារជីវិតយុទ្ធជនតាលីបង់ម្នាក់ កាលពីខែធ្នូ ឆ្នាំ២០១៤កន្លងទៅ។ ក្រុមឧទ្ទាមនេះបានព្រមានរដ្ឋាភិបាលប៉ាគីស្ថានទៀតថា ការសងសឹកនេះនឹងអូសបន្លាយតទៅទៀត។ ហើយថា រដ្ឋាភិបាលប៉ាគីស្ថានគួរតែរំពឹងការសងសឹកខ្លាំងក្លាជាងនេះ និងច្រើនជាងនេះទៅទៀត។
រដ្ឋាភិបាលប៉ាគីស្ថាន ក្រោយការវាយប្រហារនេះ បានបង្ហាញពីការប្ដេជ្ញាចិត្តក្នុងការលុបបំបាត់បញ្ហាភេរវកម្ម និងភាពជ្រុលនិយមនៅក្នុងប្រទេស។ ដោយឡែក អ្នកសម្របសម្រួលអង្គការសហប្រជាជាតិប្រចាំនៅប៉ាគីស្ថាន គឺលោក Timo Pakkala បានថ្កោលទោស និងថា អំពើហិង្សាទៅលើក្រុមជនជាតិភាគតិចណាក៏ដោយ គឺមិនអាចទទួលយកបានទេ។ លោក Timo Pakkala បានអំពាវនាវឲ្យរដ្ឋាភិបាលប៉ាគីស្ថាន ជំរុញឲ្យមានការអត់ឱននៅក្នុងប្រទេស ខណៈដែលប្រទេសនេះ ប្រយុទ្ធប្រឆាំងនឹងពួកក្រុមសកម្មប្រយុទ្ធអ៊ីស្លាមផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ