ប៉ាគីស្ថាន៖ផ្ទុះហិង្សានៅក្នុងក្បួនបាតុកម្មនៅទីក្រុងការ៉ាឈីប្រឆំាងនឹងទស្សនាវដ្តីបារំាង Charlie Hebdo
នៅក្នុងទីក្រុងការ៉ាឈី ប្រទេសប៉ាគីស្ថាន មានមនុស្សរាប់សិបពាន់នាក់បាននំាគ្នាដង្ហែរក្បួនបាតុកម្មកាលពីរសៀលថ្ងៃសុក្រ ទី១៦ មករា។ គឺជាបាតុកម្មប្រឆំាងនឹងទស្សនាវដ្តីបារំាងមួយឈ្មោះ Charlie Hebdo ដែលទើបបានចេញផ្សាយលេខថ្មីដោយបានផ្តិតរូបព្យាការីអ៊ីស្លាមម៉ាហូម៉េតនៅលើទំព័រមុខ។ រូបព្យាការីម៉ាហូម៉េតដែលកំពុងសម្រកទឹកភ្នែកជាមួយនឹងដៃកាន់បដាសរសេរថា ខ្ញុំជា Charlie។ នៅទីបំផុត ក្បួនបាតុកម្មបានបញ្ចប់ទៅដោយមានការប៉ះទង្គិចគ្នាយ៉ាងហិង្សារវាងពួកបាតុករ និងកម្លំាងប៉ូលិសនៅមុខស្ថានទូតបារំាងប្រចំាទីក្រុងការ៉ាឈីដោយបណ្តាលឲ្យមានរបួស ២នាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
ពិតមែនតែទស្សនាវដ្តីបារំាង Charlie Hebdo មិនត្រូវបានគេអនុញ្ញាតឲ្យដាក់លក់ ឬមួយក៏ចូលអានតាមអ៊ីធឺណែតក្នុងប្រទេសប៉ាគីស្ថានក៏ដោយ ក៏កំហឹងប្រឆំាងនឹងទស្សនាវដ្តីត្លុកកំប្លែងរបស់បារំាងមួយនេះបាន និងកំពុងកើតមានយ៉ាងពុះកញ្ជ្រោល។ គឺជាក្បួនបាតុកម្មដែលអំពាវនាវដោយចលនាអ៊ីស្លាមប៉ាគីស្ថាន រួមជាមួយនឹងគណបក្សអ៊ីស្លាមជាច្រើន ក្នុងនោះក៏មានគណបក្ស Jamaat-e-Islami ដែរ។ នៅក្នុងទីក្រុងការ៉ាឈីដែលមានប្រជាជនរស់នៅប្រមាណជា ២០លាននាក់ មានបាតុករជាច្រើនរយនាក់បាននំាគ្នាបរិហារទស្សនាវដ្តី Charlie Hebdo ដែលបានយករូបព្យាការីអ៊ីស្លាមម៉ាហូម៉េតមកផ្តិតលើទំព័រមុខរបស់ខ្លួន។ តាមគម្រោង ពួកបាតុករចង់ដង្ហែរក្បួនប្រឆំាងដោយដើរកាត់ពីមុខស្ថានទូតបារំាង តែត្រូវបានប៉ះទង្គិចជាមួយនឹងកម្លំាងប៉ូលិសយ៉ាងហិង្សា ដោយបណ្តាលឲ្យមានរបួស ២នាក់ ក្នុងនោះមានអ្នកថតរូបរបស់ទីភ្នាក់ងារព័ត៌មាន AFP ម្នាក់។
ក្រៅពីទីក្រុងការ៉ាឈី ក្បួនបាតុកម្មដែលបានរៀបចំឡើងនៅក្រោយបញ្ចប់ពិធីសូត្រធម៌ដូចថ្ងៃសុក្រសព្វមួយដងក៏បានកើតមាននៅក្នុងទីក្រុងប៉ាគីស្ថានផ្សេងទៀត ដូចយ៉ាងអ៊ីស្លាម៉ាបាត ឡាអរ ប៉េស្ហាវ៉ា ឬមួយក៏មុលតានដែលទង់ជាតិបារំាងត្រូវបានពួកបាតុករយកទៅជាន់ឈ្លីដុតចោល។ « រដ្ឋាភិបាលបារំាងត្រូវតែធ្វើការសុំទោសចំពោះប្រទេសអ៊ីស្លាមទំាងអស់ និងថា ប្រទេសអ៊ីស្លាមទំាងអស់ត្រូវតែរួមសាមគ្គីគ្នាឡើង » នេះជាការថ្លែងរបស់លោកស៊ីរ៉ា អុលហាក ប្រធានគណបក្សអ៊ីស្លាម Jamaat-e-Islami។ ទន្ទឹមគ្នានេះ លោកអុលហាកក៏បានអំពាវនាវឲ្យបាតុករទំាងអស់សាទរចំពោះសេចក្តីថ្លែងការណ៍របស់សម្តេចប៉ាបហ្រ្វង់ស័រដែលថា សិទ្ធិសេរីភាពក្នុងការបញ្ចេញមតិមិនបានអនុញ្ញាតឲ្យប្រមាជ ដៀមដាមសាសនាអ្នកដទៃនោះទេ។
ដោយឡែក និងក្រៅពីកំហឹងរបស់ប្រជាជន លោកនាយករដ្ឋមន្រ្តី និងរដ្ឋសភាប៉ាគីស្ថានក៏បានថ្កោលទោសលើទស្សនាវដ្តី Charlie Hebdo ដែរ។ គួររម្លឹកជូនថាក្នុងឆ្នំា ២០១២ ប៉ាគីស្ថានក៏ធ្លាប់បានស្គាល់បាតុកម្មយ៉ាងហិង្សាប្រឆំាងនឹងការចុះផ្សាយរូបត្លុកកំប្លែងព្យាការីម៉ាហូម៉េតដូចគ្នា ព្រមទំាងប្រឆំាងនឹងកុនអាមេរិកំាងមួយដែលមានលក្ខណៈប្រឆំាងអ៊ីស្លាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ