ជនជាតិរ៉ូហ៊ីងយ៉ាកំពុងត្រូវគេផាត់ចេញពីការបោះឆ្នោតជាតិភូមា
យុទ្ធនាការឃោសនាបោះឆ្នោតនៅភូមាបានចាប់ផ្តើមបើកធ្វើ ដោយមានបេក្ខជនជាង ៦ពាន់នាក់ ចូលរួមប្រកួតប្រជែងក្នុងការបោះឆ្នោតជ្រើសរើសសមាជិកសភាជាតិ និងសភាតំបន់ ដែលនឹងត្រូវរៀបចំធ្វើ នៅថ្ងៃទី៨វិច្ឆិកាខាងមុខ។ ក៏ប៉ុន្តែ នៅក្នុងពេលដែលលោកប្រធានាធិបតីថេន សេន ប្រកាសសន្យាថាការបោះឆ្នោតនេះនឹងប្រព្រឹត្តទៅដោយសេរីនិងយុត្តិធម៌ គេសង្កេតឃើញថា ជនជាតិរ៉ូហ៊ីងយ៉ាកំពុងតែត្រូវបានគេផាត់ចេញពីដំណើរការប្រជាធិបតេយ្យនេះ។
ចុះផ្សាយនៅថ្ងៃ៖
ស្តាប់ - ០២:០៩
នៅសល់ពេលមិនដល់ពីរខែទៀតទេនឹងត្រូវដល់ពេលបោះឆ្នោត ហើយយុទ្ធនាការឃោសនាបោះឆ្នោតក៏បានចាប់ផ្តើមទៅហើយដែរ ក៏ប៉ុន្តែ អ្នកនយោបាយរ៉ូហ៊ីងយ៉ា ដែលជាជនជាតិភាគតិចកាន់សាសនាអ៊ីស្លាមយ៉ាងតិច ២៨នាក់ ត្រូវបានគណៈកម្មាធិការជាតិរៀបចំបោះឆ្នោតភូមាបដិសេធមិនឲ្យឈរឈ្មោះជាបេក្ខជន។
មូលហេតុដែលលើកឡើងក្នុងការបដិសេធមិនឲ្យឈរឈ្មោះនេះ គឺបញ្ហាសញ្ជាតិ។ តាមច្បាប់ភូមា អ្នកដែលអាចឈរឈ្មោះបោះឆ្នោតបាន លុះត្រាតែមានសញ្ជាតិភូមាពីកំណើត ព្រមទាំងមានឪពុកនិងម្តាយជាពលរដ្ឋភូមា។ ក៏ប៉ុន្តែ ជនជាតិភាគតិចរ៉ូហ៊ីងយ៉ាតែងតែត្រូវបានរដ្ឋាភិបាលភូមាចាត់ទុកថាជាជនអន្តោប្រវេសន៍ខុសច្បាប់មកពីបង់ក្លាដែស ហើយបដិសេធមិនព្រមទទួលស្គាល់ថាជាជនជាតិភាគតិច ដែលមានសញ្ជាតិភូមានោះទេ។ ហេតុដូច្នេះហើយបានជាសំណើសុំឈរឈ្មោះបោះឆ្នោតរបស់អ្នកនយោបាយរ៉ូហ៊ីងយ៉ាត្រូវបានគណៈកម្មាធិការរៀបចំការបោះឆ្នោតបដិសេធចោល។
អ្វីដែលធ្វើឲ្យគេភ្ញាក់ផ្អើលនិងហួសចិត្តកាន់តែខ្លាំងថែមទៀតនោះ គឺនៅក្នុងចំណោមអ្នកដែលត្រូវគណៈកម្មាធិការរៀបចំការបោះឆ្នោតបដិសេធមិនឲ្យឈ្មោះនេះ មានម្នាក់ គឺជាតំណាងរាស្រ្ត ដែលបានជាប់ឆ្នោត កាលពីឆ្នាំ២០១០ ហើយបច្ចុប្បន្នកំពុងស្ថិតក្នុងអាណត្តិនៅឡើយ។ តំណាងរាស្រ្តរ៉ូហ៊ីងយ៉ារូបនេះបានប្រាប់អ្នកសារព័ត៌មានថា វាគឺជារឿងដែលគួរឲ្យហួសចិត្តខ្លាំងណាស់ ដែលកាលពី៥ឆ្នាំមុនលោកអាចឈ្មោះជាបេក្ខជន រហូតជាប់ឆ្នោតជាតំណាងរាស្រ្ត ហើយស្រាប់តែពេលនេះបេក្ខភាពរបស់លោកបែរជាត្រូវបានគេច្រានចោលទៅវិញ។
ក្រៅពីមិនអាចឈរឈ្មោះបោះឆ្នោត ជនជាតិរ៉ូហ៊ីងយ៉ាប្រមាណជា១លាននាក់ផ្សេងទៀតក៏កំពុងតែប្រឈមមុខនឹងការរារាំងមិនឲ្យទៅបោះឆ្នោតផងដែរ។ ពួកជនជាតិរ៉ូហ៊ីងយ៉ាអស់ទាំងនេះបានរស់នៅនៅក្នុងប្រទេសភូមាតាំងឆ្នាំ១៩៤៨ ហើយកាលពីពេលកន្លងមកពួកគេធ្លាប់ត្រូវបានគេអនុញ្ញាតឲ្យបោះឆ្នោត។ ក៏ប៉ុន្តែ កាលពីខែមិថុនាកន្លងទៅថ្មីៗនេះ សភាភូមាបានចេញច្បាប់ដកហូតអត្តសញ្ញាណប័ណ្ណបណ្តោះអាសន្ន ដែលកាន់ដោយជនជាតិរ៉ូហ៊ីងយ៉ា ដែលជាហេតុធ្វើឲ្យពួកគេមិនអាចទៅបោះឆ្នោតបាន។
ការផាត់ជនជាតិរ៉ូហ៊ីងយ៉ាចេញពីដំណើរការបោះឆ្នោតនៅពេលនេះ ត្រូវបានគេមើលឃើញថា គឺដោយសារតែមានសម្ពាធពីសំណាក់ក្រុមអ្នកកាន់ពុទ្ធសាសនាជ្រុលនិយម ដែលមានចលនារីកដុះដាលកាន់តែខ្លាំងនៅភូមា ហើយដែលសូម្បីតែលោកស្រីជ័យលាភីណូបែលសន្តិភាព អ៊ុង សានស៊ូជី ក៏ហាក់ដូចជាមិនហ៊ានធ្វើអ្វី ឬនិយាយអ្វីឲ្យក្រុមនេះឃ្នើសចិត្តនោះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ