នគរបាលថៃរកឃើញសាកសពមនុស្ស៨នាក់ ក្នុងជំរុំជនភៀសខ្លួន ក្បែរព្រំដែនម៉ាឡេស៊ី
សមត្ថកិច្ចថៃ ទើបបានជីកយកសាកសពមនុស្ស៨នាក់ ក្នុងជំរុំមួយកន្លែង ភាគខាងត្បូងប្រទេសថៃ ក្បែរព្រំដែនជាមួយប្រទេសម៉ាឡេស៊ី។ ជំរុំនេះជាជំរុំជនភៀសខ្លួនមកពីភូមា និងបង់ក្លាដែស ហើយត្រូវក្រុមឈ្មួយជួញដូរមនុស្ស ឃុំទុក ទំរាំដល់វេនបញ្ជូនឆ្លងចូលទឹកដីម៉ាឡេស៊ី ដោយខុសច្បាប់។ នេះជាលើកទីមួយហើយ ដែលថៃបានបង្ហាញជាសាធារណៈ នូវការរកឃើញជំរុំជនភៀសខ្លួនខុសច្បាប់បែបនេះ ស្របពេលដែលសហគមន៍អន្តរជាតិកំពុងចោទប្រកាន់ថា សមត្ថកិច្ចថៃ បានចូលដៃចូលជើង ជាមួយក្រុមទុច្ចរិតជួញដូរមនុស្ស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
ក្នុងចំណោមសាកសព ទាំង ៨ មាន៤ បានរលួយសល់តែឆ្អឹង ហើយ ៥ផ្សេងទៀត ទំនងទើបតែបានស្លាប់ ថ្មីៗនេះប៉ុណ្ណោះ។ សាកសាពទាំងនេះ ត្រូវបានរកឃើញក្នុងរណ្តៅ កប់ខ្មោចរួមមួយ នៅក្នុងព្រៃ ចម្ងាយប្រមាណជាង១០០ម៉ែត្រ ពីព្រំដែនរវាងខេត្ត សុងក្លា និងប្រទេសម៉ាឡេស៊ី ។ មនុស្សពីរនាក់ផ្សេងទៀត ដែលស្គមសល់តែស្បែកដណ្តប់ឆ្អឹង ត្រូវបានគេឃើញនៅក្បែរនោះ ក្នុងបន្ទាប់រនាំងឫស្សី។ អាជ្ញាធរថៃ បានសន្និដ្ឋានថា នេះជាជំរុំ ដែលពួកឈ្មួញជួញដូរមនុស្ស បានធ្វើការឃុំជនភៀសខ្លួនទុក មុននឹងបញ្ជូនចូលទៅក្នុងទឹកដីម៉ាឡេស៊ី។
សាកសព មនុស្សទាំង៨ ក៏ដូចជា អ្នកដែលនៅរស់ទាំងពីរនាក់ ត្រូវបានគេសន្និដ្ឋានថា ជាជនអន្តោប្រវេសន៍អ៊ីស្លាម ដែលធ្វើដំណើរមកពី ប្រទេសភូមា និងប្រទេសបង់ក្លាដែស។ សមត្ថកិច្ចថៃ បានដាក់ការសង្ស័យថា ជនអន្តោប្រវេសន៍ទាំងនោះ អាចជាក្រុមជនជាតិភាគតិច Rohingyas មកពីភូមា ដែលទ្រាំទ្រលែងបាន ពីការធ្វើបាបរបស់អ្នកកាន់សាសនាព្រះពុទ្ធ នៅក្នុងខេត្ត Rakhine ប្រទេសភូមា។ បុរសម្នាក់អាយុ ៣៥ឆ្នាំ ដែលនៅរស់ ក្នុងចំណោមពីរនាក់ ហើយកំពុងមានជំងឺគ្រុនចាញ់យ៉ាងធ្ងន់ធ្ងរ បាននិយាយថា គាត់ត្រូវបានគេឃុំទុក ជាយូរខែមកហើយ ដោយសារគ្មានប្រាក់បង់ឲ្យគេ ដើម្បីបានឆ្លងទៅម៉ាឡេស៊ី។
អង្គការសហប្រជាជាតិ ក៏ដូចជា អង្គការ Human Rights Watch បានបញ្ជាក់ថា គេគ្មានអ្វីភ្ញាក់ផ្អើលទេ ចំពោះការរកឃើញកន្លែងឃុំទុកជនភៀសខ្លួន របស់ក្រុមឈ្មួញទុច្ចរិក នៅក្បែរព្រំដែនម៉ាឡេស៊ីនេះ។ មានជនជាតិ ភាគតិចអ៊ីស្លាម មកពីភូមា និងបង់ក្លាដែស រាប់ពាន់នាក់ដែលធ្វើដំណើរចង់ឆ្លងទៅម៉ាឡេស៊ី។ ប៉ុន្តែអ្វីដែលគេភ្ញាក់ផ្អើល គឺថា នេះជាលើកទីមួយហើយ ដែលអាជ្ញាធរថៃ បង្ហាញជាសាធារណៈ ពីការរកឃើញសាកសពមនុស្ស និងជំរុំនេះ។
សូមបញ្ជាក់ថា កន្លងមក អង្គការសិទ្ធិមនុស្ស ក៏ដូចជាសហគមន៍អន្តរជាតិ បានចោទប្រកាន់មន្ត្រីថៃ មួយចំនួន ថាបានឃុបឃិត ជាមួយឈ្មួញទុច្ចរិត ជម្រឹតយកប្រាក់ពីក្រុមជនភៀសខ្លួន ដើម្បីបញ្ជូនពួកគេ ឆ្លងចូលទៅទឹកដីម៉ាឡេស៊ី ដោយខុសច្បាប់។ ជាទូទៅ ជនភៀសខ្លួន ត្រូវបានពួកឈ្មួញថៃ ធ្វើទារុណកម្ម និងឃុំទុកយ៉ាងអមនុស្សធម៌ ជាទីបំផុត។
យ៉ាងណាមិញ ការបង្ហាញជាសាធារណៈនូវការរកឃើញជំរុំមរណៈនេះ វាស្របពេលដែល រដ្ឋាភិបាលយោធាថៃ បានប្រកាសធ្វើការបោសសម្អាត មេទាហាន និងមន្រ្តីធំៗដែលពុករលួយ។ កាលពីខែមករា កន្លងទៅ មានមេនគរបាល ជាច្រើននាក់ រួមទាំងមេទាហានជើងទឹកម្នាក់ផង ត្រូវបានជាប់ទោស ពីបទជួញដូរមនុស្ស។ ក្រោមក្រសែភ្នែកសំឡក់សំឡឹង ពីសហគមន៍អន្តរជាតិ តាមរយៈប្រតិបត្តិការនេះ ថៃកំពុងតែធ្វើការលាងសម្អាតមុខមាត់ ដ៏ក្រខ្វក់របស់ខ្លួន៕
{{ scope.legend }}
© {{ scope.credits }}ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ