អគ្គស្នងការអ.ស.បទទួលបន្ទុកសិទ្ធិមនុស្សទាមទារឲ្យភូមាផ្តន្ទាទោសព្រះសង្ឃដែលជេរប្រមាជប្រេសិតខ្លួន
នៅថ្ងៃព្រសហ្បតិ៍ ទី២២ មករានេះ អគ្គស្នងការសិទ្ធិមនុស្សរបស់អង្គការសហប្រជាជាតិលោកហ្សីរ៉ាដ អាល់ហ៊ូសេនបានទាមទារឲ្យរដ្ឋាភិបាលភូមាផ្តន្ទាទោសលើព្រះសង្ឃមួយអង្គព្រះនាមវីរ៉ាធូពីបទបានជេរប្រមាជចំពោះលោកស្រីលី យំាងហ៊ី ប្រេសិតពិសេសរបស់ អ.ស.ប.ទទួលបន្ទុកសិទ្ធិមនុស្សនៅភូមា។ ប្រតិកម្មតបរបស់លោកអាល់ហ៊ូសេនពេលនេះបានធ្វើឡើង ជិតមួយសប្តាហ៍ក្រោយពីសង្ឃវីរ៉ាធូបានប្រើពាក្យជេរប្រមាជលោកស្រីលីដោយបានចោទលោកស្រីពីបទមានបំណងលូកដៃចូលកកូរកកាយក្នុងរឿងកិច្ចការផ្ទៃក្នុងរបស់ភូមា ពិសេសទាក់ទងនឹងរឿងគ្រួសារ និងសាសនា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
មិនមែនជាពាក្យជេរប្រមាជធម្មតាទេ តែជាពាក្យជេរម្រ៉ាយតែម្តងដែលសង្ឃវីរ៉ាធូភូមាអង្គនោះបានប្រើចំពោះលោកស្រីលី យំាងហ៊ី។ គឺការជេរប្រមាជដោយប្រើពាក្យរបៀបនេះហើយដែលលោកអគ្គស្នងការសិទ្ធិមនុស្សរបស់អង្គការសហប្រជាជាតិហ្សីរ៉ាដ អាល់ហ៊ូសេនបានចាត់ទុកជារឿងមួយដែលលោកមិនអាចទទួលយកបានទេ និងបានទាមទារឲ្យរដ្ឋអំណាចភូមាធ្វើការផ្តន្ទាទោសសង្ឃវីរ៉ាធូដែលគ្រប់គ្នាស្គាល់ថា ជាប្រមុខសង្ឃមួយអង្គដែលមានលក្ខណៈជាតិនិយមជ្រុល។ នៅក្នុងសេចក្តីជូនដំណឹងរបស់ស្នងការសិទ្ធិមនុស្សសហប្រជាជាតិចេញផ្សាយថ្ងៃនេះ លោកអាល់ហ៊ូសេនបានបញ្ជាក់ថា វាគ្មានហេតុផលណាមួយដែលគេត្រូវប្រើពាក្យជេរប្រមាជលើប្រេសិតពិសេសរបស់អង្គការសហប្រជាជាតិដូចករណីសង្ឃភូមាវីរ៉ាធូបានជេរម្រ៉ាយលោកស្រីលី យំាងហ៊ីនោះឡើយ។ ទន្ទឹមគ្នានេះ លោកអាល់ហ៊ូសេនក៏បានអំពាវនាវឲ្យថ្នាក់ដឹកនំានយោបាយ និងសាសនានៅភូមាផ្តន្ទាទោសលើសកម្មភាពទំាងឡាយណាដែលនំាឲ្យមានការញុះញង់ស្អប់ខ្ពើមគ្នា។
សូមជម្រាបជូនថា អ្វីៗបានកើតមានឡើងនៅក្នុងក្បួនបាតុកម្មប្រឆំាងនឹងវត្តមានលោកស្រីលី យំាងហ៊ីកាលពីថ្ងៃសុក្រ ទី១៦ មករាកន្លងទៅ។ នៅក្នុងក្បួនបាតុកម្មនោះ ព្រះសង្ឃវីរ៉ាធូបានប្រើពាក្យជេរម្រ៉ាយលោកស្រីលី យំាងហ៊ីជាសាធារណៈនៅក្នុងហ្វូងបាតុករ ដោយបានចោទលោកស្រីពីបទបានលូកដៃចូលកកូរកកាយកិច្ចការផ្ទៃក្នុងរបស់ភូមា ចំពេលដែលរដ្ឋាភិបាលភូមាកំពុងរៀបចំធ្វើកំណែទម្រង់លើច្បាប់សាសនា និងគ្រួសារដ៏ចម្រូងចម្រាស។ គឺជាគម្រោងកំណែទម្រង់មួយដែលលោកស្រីលី យំាងហ៊ីបានយល់ឃើញថា ជាសញ្ញាដែលបញ្ជាក់ពីដំណើរវិលថយក្រោយរបស់ប្រទេសភូមា។ គួររម្លឹកជូនថា ពាក្យជេរប្រមាជរបស់សង្ឃវីរ៉ាធូត្រូវបានចុះផ្សាយយ៉ាងព្រោងព្រាតនៅក្នុងបណ្តាញសង្គម។
រហូតមកដល់ពេលនេះ សង្ឃវីរ៉ាធូមិនបានធ្វើការសុំទោសទេ និងថែមទំាងអះអាងថា បើមានពាក្យអ្វីធ្ងន់ធ្ងរជាងនេះ ព្រះអង្គក៏មិនញញើតនឹងប្រើដែរ។ ចំណែករដ្ឋាភិបាលភូមាក៏ហាក់ដូចជាបានទទួលស្គាល់ពីកំណើនជាតិនិយមរបស់អ្នកកាន់ព្រះពុទ្ធសាសនានៅក្នុងប្រទេសដែលតំាងពីឆ្នំា ២០១២ មក បានជួបប្រទះនឹងអំពើហិង្សាជាច្រើនរវាងអ្នកកាន់សាសនាព្រះពុទ្ធ និងអ៊ីស្លាមដោយបណ្តាលឲ្យមានមនុស្សស្លាប់យ៉ាងតិច ២៥០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ