លោកស៊ីជីន ពីងបំពេញទស្សនកិច្ចនៅវៀតណាមដើម្បី "ពង្រឹងទំនាក់ទំនងជាមិត្តភាពចាស់ឆ្នាំ"
លោកស៊ី ជីនពីង ប្រធានាធិបតីចិនបានលើកឡើងថា លោកចង់ឲ្យចិននិងវៀតណាមមានទំនាក់ទំនងជាដៃគូល្អប្រសើរជាងពេលបច្ចុប្បន្ន។ ការលើកឡើងនេះធ្វើឡើង នៅក្នុងអំឡុងពេលដែលលោកកំពុងបំពេញទស្សនកិច្ចនៅក្នុងប្រទេសវៀតណាម។ ទស្សនកិច្ចដ៏កម្រ នៅក្នុងពេលដែលប្រទេសទាំងពីរកំពុងតែប្រឈមមុខដាក់គ្នា ដោយសារតែជម្លោះនៅសមុទ្រចិនខាងត្បូង។
ចុះផ្សាយនៅថ្ងៃ៖
ស្តាប់ - ០២:១៦
លោកស៊ី ជីនពីង បានធ្វើដំណើរមកដល់ទីក្រុងហាណូយ កាលពីថ្ងៃព្រហស្បតិ៍ នៅក្នុងដំណើរទស្សនកិច្ចផ្លូវរដ្ឋរយៈពេល ២ថ្ងៃ ដោយលោកគ្រោងនឹងជួបជាមួយថ្នាក់ដឹកនាំកំពូលៗរបស់វៀតណាម រួមមាន លោកប្រធានាធិបតី ជឿង តាន់សាង លោកនាយករដ្ឋមន្រ្តី ង្វៀន តាន់ហ្សុង និងលេខាបក្សកុម្មុយនិស្ត លោក ង្វៀន ភូជុង។
នៅពេលដល់វៀតណាមភ្លាម លោកប្រធានាធិបតីចិនបានលើកឡើងថា លោកសង្ឃឹមថា ដំណើរទស្សនកិច្ចរបស់លោកនឹងអាចរឹតចំណងទាក់ទង “មិត្តភាពចាស់ឆ្នាំ” រវាងចិន និងវៀតណាម ហើយអាចជំរុញឲ្យប្រទេសទាំងពីរបង្កើនកិច្ចសហប្រតិបត្តិការកាន់តែល្អជាពេលបច្ចុប្បន្ន។ នេះបើយោងតាមសេចក្តីថ្លែងការណ៍ចេញផ្សាយជាភាសាវៀតណាម នៅថ្ងៃព្រហស្បតិ៍។
នៅពេលមកដល់ក្រុងហាណូយ លោកស៊ី ជីនពីង ត្រូវបានទទួលស្វាគមន៍ដោយលោកលេខាបក្សកុម្មុយនិស្តវៀតណាម ង្វៀន ភូជុង ដែលបានចាត់ទុកដំណើរទស្សនកិច្ចនេះថាជាព្រឹត្តិការណ៍ដែលមានអត្ថន័យដ៏ជ្រាលជ្រៅ ហើយបើយោងតាមសេចក្តីថ្លែងការណ៍ចេញផ្សាយដោយគណបក្សកុម្មុយនិស្តវៀតណាម ប្រមុខរដ្ឋទាំងពីរសុទ្ធតែបានបង្ហាញពីចេតនាចង់ដោះស្រាយជម្លោះដែនសមុទ្រដោយមិនឲ្យជម្លោះនេះត្រូវរីករាលដាលកាន់តែធំ។
ក៏ប៉ុន្តែ គេសង្កេតឃើញថា នៅប៉ុន្មានម៉ោងមុនពេលដែលលោកស៊ី ជីនពីង ទៅដល់ក្រុងហាណូយ ក្រុមអ្នកជាតិនិយមវៀតណាមជាច្រើននាក់បាននាំគ្នាធ្វើបាតុកម្មប្រឆាំង ទាំងនៅក្នុងទីក្រុងហាណូយ និងនៅទីក្រុងហូជីមិញ។ បាតុកម្មដែលត្រូវបានអាជ្ញាធរវៀតណាមបំបែកភ្លាមៗ។
គួរបញ្ជាក់ថា វៀតណាម និងចិន ថ្វីដ្បិតតែជាប្រទេសកុម្មុយនិស្តដូចគ្នា ក៏ប៉ុន្តែ ភាគច្រើនតែងតែសម្លឹងមើលគ្នាជាគូសត្រូវ ហើយរហូតបានផ្ទុះជម្លោះប្រដាប់អាវុធដាក់គ្នាជាច្រើនលើក ជាពិសេស គឺសង្រ្គាម កាលពីឆ្នាំ១៩៧៩ ក្រោយពីកងទ័ពវៀតណាមចូលឈ្លានពានកម្ពុជា ដើម្បីបណ្តេញខ្មែរក្រហម ដែលជាសម្ព័ន្ធរបស់ចិនចេញពីអំណាច។
នៅក្នុងពេលបច្ចុប្បន្ននេះ បញ្ហាធំបំផុត នៅក្នុងទំនាក់ទំនងចិន-វៀតណាម គឺជម្លោះនៅក្នុងសមុទ្រចិនខាងត្បូង។ គេសង្កេតឃើញថា ទំនាក់ទំនង រវាងប្រទេសកុម្មុយនិស្តទាំងពីរបានធ្លាក់ចុះដុនដាបកាន់តែខ្លាំងដល់កម្រិតទាបបំផុត ចាប់តាំងពីខែឧសភា ឆ្នាំ២០១៤ នៅក្រោយពេលដែលចិនបានបញ្ជូននាវាខួងស្វែងរកប្រេងឲ្យចូលទៅធ្វើសកម្មភាព នៅក្នុងតំបន់សមុទ្រជាប់ជម្លោះជាមួយវៀតណាម។ ជម្លោះដែនសមុទ្រនេះបានជំរុញឲ្យវៀតណាមព្យាយាមពង្រឹងទំនាក់ទំនងជាមួយបណ្តាប្រទេសមួយចំនួន ដែលជាគូប្រជែងរបស់ចិន ដូចជា សហរដ្ឋអាមេរិក ជប៉ុន និងហ្វីលីពីន ជាដើម។
គួរកត់សម្គាល់ថា នៅថ្ងៃព្រហស្បតិ៍ នៅពេលដែលលោកស៊ី ជីនពីង ចាប់ផ្តើមដំណើរទស្សនកិច្ចនៅវៀតណាម រដ្ឋមន្រ្តីក្រសួងការពារជាតិជប៉ុនក៏កំពុងតែបំពេញទស្សនកិច្ចនៅវៀតណាមនោះដែរ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ