ស្លាប់ជនស៊ីវិលយ៉ាងតិច៣៥នាក់ ក្នុងការវាយប្រហារភេរវកម្ម នៅបួគីណាហ្វាសូ
យប់ថ្ងៃអង្គារ ទី២៤ធ្នូ គឺមានស្លាប់ជនស៊ីវិលយ៉ាងតិច៣៥នាក់ នៅក្នុងការវាយប្រហារភេរវកម្ម នៅប្រទេសបួគីណាហ្វាសូ។ ប្រទេសនៅអាហ្វ្រិកមួយនេះ បានប្រកាសកាន់ទុក្ខចំនួនពីរថ្ងៃ។ ប្រធានាធិបតីបួគីណាហ្វាសូ បានចាត់ទុកថា«នេះគឺជាមរណៈទុក្ខដ៏ក្រៀមក្រំចំពោះពលរដ្ឋ និងកងកម្លាំងទាហានបួគីណាហ្វាសូ ខណៈពេលដែលពិភពលោកកំពុងអបអរសប្បាយនឹងឱកាសបុណ្យណូអែល និងបុណឆ្លងឆ្នាំថ្មី»។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
គឺជាការបំផ្ទុះគ្រាប់បែកបង្កប់ក្នុងឡាន ហើយបន្តកន្ទុយដោយការបាញ់រះយ៉ាងសន្ធឹកសំដៅលើជនស៊ីវិល។ ហេតុការណ៍វាយប្រហារសម្លាប់មនុស្សនេះ កើតឡើងនៅខេត្តភាគជើងបួគីណាហ្វាសូ។ ក្នុងចំណោមអ្នកបាត់បង់ជីវិត យ៉ាងហោចទាំង៣៥នាក់នោះ គឺភាគច្រើនជាស្ត្រីភេទ ដល់ទៅចំនួន៣១នាក់។ ពលរដ្ឋស៊ីវិល៦នាក់ផ្សេងទៀត រងរបួសធ្ងន់ ហើយក៏មាន ទាហានប៉ូលីស ប្រមាណ២០នាក់ រងរបួសផងដែរ។ នេះបើតាមការបញ្ជាក់របស់អ្នកនាំពាក្យរដ្ឋាភិបាលនិងជារដ្ឋមន្ត្រីឃោសនាការ។ រដ្ឋមន្ត្រីរូបនេះ ក៏បានកត់សម្គាល់ដែរ ថា«ការវាយប្រហារភេរវកម្មជីហាតលើកនេះ មានរយៈពេលជាច្រើនម៉ោង គឺយូរជាងការវាយប្រហារភេរវកម្មមុនៗ»។
ទន្ទឹមគ្នានេះ អគ្គមេបញ្ជាការបួគីណាហ្វាសូ បានអះអាងក្នុងសេចក្តីថ្លែងការណ៍មួយ ថា«ក្រុមពួកភេរវជន គឺប្រដាប់ដោយអាវុធគ្រប់ៗដៃ»។ ក្រោយការវាយបង្គ្រាបរបស់សមត្ថកិច្ច អំណាចរដ្ឋប្រមូលរឹបអូសបានម៉ូតូជាងមួយ១០០គ្រឿង, កាំភ្លើងនិងគ្រាប់រំសេវជាច្រើន សុទ្ធសឹងតែមានគុណភាព។
គួរជ្រាបថា បួគីណាហ្វាសូ ជាប្រទេសរងគ្រោះមួយនៃអំពើភេរវនិយមនៅក្នុងតំបន់សាហែល។ កាលពីឆ្នាំ២០១៥ ការវាយប្រហាររបស់ពួកអង្គការរដ្ឋអ៊ីស្លាមជីហាត បានប្រល័យជីវិតជនស្លូតត្រង់ អស់ចំនួន៧០០នាក់ ហើយពលរដ្ឋជាង៥៦ម៉ឺននាក់ ត្រូវរត់ភៀសខ្លួនចោលផ្ទះសម្បែង។ នេះបើតាមរបាយការណ៍របស់អង្គការសហប្រជាជាតិ។ តំបន់ដែលរងគ្រោះខ្លាំង ភាគច្រើន គឺនៅភាគខាងជើង និងខាងកើតនៃផ្ទៃប្រទេស ក៏ប៉ុន្តែ សូម្បីតែកណ្តាលប្រទេស គឺក្នុងរដ្ឋធានី Ouagadougou ក៏ធ្លាប់រងការវាយប្រហារភេរវកម្មចំនួនបីដងរួចហើយ។
ប្រឈមនឹងគ្រោះថ្នាក់ភេរវកម្មក្នុងតំបន់យ៉ាងដូច្នេះ ប្រធានាធិបតីនិងថ្នាក់ដឹកនាំរដ្ឋ អាហ្វ្រិក ក្នុងតំបន់សាហែលទាំង៥ប្រទេស មាន បួគីណាហ្វាសូ ម៉ាលី ម៉ូរីតានី នីហ្សេ និង ឆាត នឹងត្រូវធ្វើដំណើរមកប្រទេសបារាំង នៅខែមករាខាងមុខនេះ តាមតបការអញ្ជើញរបស់ប្រធានាធិបតី អេម៉ាណុយអែល ម៉ាក្រុង ដើម្បីជួបប្រជុំគ្នារកយុទ្ធសាស្ត្របន្ថែមជាថ្មី ទប់ទល់ស្ថានការណ៍ដ៏ក្តៅគគុក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ