អូស្ត្រាលី៖ រដ្ឋមន្ត្រី១០នាក់ សុំចុះចេញពីតំណែង!
នៅថ្ងៃពុធ ទី២២សីហានេះ រដ្ឋមន្ត្រីអូស្ត្រាលី ចំនួន១០នាក់ បានសុំលាឈប់ពីតំណែង។ នេះគឺដោយហេតុតែជម្លោះទស្សននិងនយោបាយផ្ទៃក្នុងគណបក្សកាន់អំណាច។ ការសុំលាឈប់ពីសំណាក់រដ្ឋមន្ត្រីជាច្រើននាក់នេះ គឺធ្វើឲ្យតំណែងនាយករដ្ឋមន្ត្រីអូស្ត្រាលី ក៏ផុយស្រួយណាស់ដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៦
រដ្ឋមន្ត្រីដែលសុំឈប់ពីតំណែងនោះ មានរដ្ឋមន្ត្រីក្រសួងមហាផ្ទៃ, ពាណិជ្ជកម្ម, សុខាភិបាល និងក្រសួងអភិវឌ្ឍអន្តរជាតិជាដើម។ ពេលនេះ លិខិតសុំឈប់របស់រដ្ឋមន្ត្រី ទាំង១០នាក់នោះ គឺមានតែរដ្ឋមន្ត្រីពីរនាក់ប៉ុណ្ណោះ ដែលបានត្រូវនាយករដ្ឋមន្ត្រី Malcolm Turnbull សម្រេចចិត្តយល់ព្រមភ្លាមៗ ឲ្យឈប់ពីការងារ។ ប៉ុន្តែ៨នាក់ទៀត គឺគេនៅមិនទាន់ដឹងនៅឡើយទេ។
ក្នុងចំណោមរដ្ឋមន្ត្រីទាំងពីរ ដែលបានត្រូវអនុញ្ញាតឲ្យឈប់ជាផ្លូវនោះ គឺមានរដ្ឋមន្ត្រីក្រសួងមហាផ្ទៃ Peter Dutton ដែលធ្លាប់កាន់កាប់ស្ថាប័នជាតិដ៏សំខាន់ផ្នែកនគរបាល អន្តោប្រវេសន៍ និងស៊ើបការសម្ងាត់។ លោក Peter Dutton នេះ គឺជាគូប្រជែងដ៏មុខស្រួច នៅក្នុងបក្សកាន់អំណាច ប្រឈមមុខតទល់នឹងនាយករដ្ឋមន្ត្រី។ លោក Peter Dutton មិនលាក់លាមឡើងថា លោកនឹងចូលរួមប្រកួតប្រជែងការបោះឆ្នោតនៅឆ្នាំក្រោយនេះ។ បើលោកឈ្នះឆ្នោតក្លាយជានាយករដ្ឋមន្ត្រីនៅឆ្នាំ២០១៩ លោកថានឹងកាត់បន្ថយតម្លៃអគ្គិសនី ជួយជំរុញគោលនយោបាយធនធានទឹកដល់កសិករ ហើយជាពិសេស កាត់ផ្តាច់ជាទីបំផុត ពួកជនភៀសខ្លួន។
ចំណែកនាយករដ្ឋមន្ត្រី Malcolm Turnbull វិញ ហាក់បានកំពុងធ្លាក់ប្រជាប្រិយភាពបន្តិច ដោយសារតែលោកគាំទ្រឲ្យធ្វើច្បាប់កាត់បន្ថយការប្រើឧស្ម័ន។ ហើយចំពេលរដ្ឋមន្ត្រីគ្រាក់ៗជាច្រើននាំគ្នាសុំលាឈប់ រត់ចេញពីរដ្ឋាភិបាលដូច្នេះ គឺកាន់តែធ្វើឲ្យតំណែងនាយករដ្ឋមន្ត្រី កាន់តែផុយស្រួយថែមទៀត។ គួរសង្កត់ធ្ងន់ថា រដ្ឋាភិបាលអូស្ត្រាលី ពីរបីអាណត្តិចុងក្រោយនេះ គឺគ្មាននាយករដ្ឋមន្ត្រីរូបណា ដែលអាចកាន់តំណែង បានពេញមួយអាណត្តិស្រួលបួលនោះទេ។ ១១ឆ្នាំចុងក្រោយនេះ អូស្ត្រាលី មាននាយករដ្ឋមន្ត្រីដល់ទៅ៧រូបឯណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ