បក្សកាន់អំណាចបង់ក្លាដែសឈ្នះការបោះឆ្នោតដែលពោរពេញដោយអំពើហិង្សា និងការធ្វើពហិការ
ចុះផ្សាយនៅថ្ងៃ៖
ស្តាប់ - ០៤:៥៤
គណបក្សកាន់អំណាចនៅបង់ក្លាដែសបានទទួលជោគជ័យក្នុងការបោះឆ្នោតជាតិ កាលពីថ្ងៃអាទិត្យ។ វាមិនមែនជារឿងដែលគួរឲ្យភ្ញាក់ផ្អើលទេ ពីព្រោះថា គណបក្សរបស់លោកស្រីនាយករដ្ឋមន្រ្តី ហាស៊ីណា (Hasina) ឈរឈ្មោះបោះឆ្នោតតែម្នាក់ឯង ដោយគ្មានបក្សប្រឆាំង។ មនុស្សប្រមាណជាង ២០នាក់ត្រូវបាត់បង់ជីវិត ក្នុងអំពើហិង្សា នៅថ្ងៃបោះឆ្នោត។ ចំណែកឯអត្រាអ្នកចេញទៅបោះឆ្នោតវិញ មានកម្រិតទាបបំផុត។
ថ្វីដ្បិតតែលទ្ធផលបោះឆ្នោតនៅមិនទាន់ត្រូវបានប្រកាសជាផ្លូវការ នៅថ្ងៃចន្ទនេះ ក៏ប៉ុន្តែ លទ្ធផលបណ្តោះអាសន្នបង្ហាញថា គណបក្សកាន់អំណាច គឺជាអ្នកទទួលជោគជ័យ ក្នុងការបោះឆ្នោត កាលពីថ្ងៃអាទិត្យ។ ក៏ប៉ុន្តែ គេប៉ាន់ប្រមាណថា អត្រាអ្នកចេញទៅបោះឆ្នោតអាចនឹងមានកម្រិតទាបបំផុត មិនធ្លាប់មាន ក្នុងប្រវត្តិនៃការបោះឆ្នោត នៅបង់ក្លាដែស។ នៅពេលនេះ គេនៅមិនទាន់ទទួលបានតួលេខទូទាំងប្រទេសនៅឡើយទេ ក៏ប៉ុន្តែ សម្រាប់រដ្ឋធានីដាកា (Dhaka) ប្រជាពលរដ្ឋ ដែលចេញទៅបោះឆ្នោតមានប្រហែលត្រឹមតែ ២២%ប៉ុណ្ណោះ។
នៅក្នុងថ្ងៃបោះឆ្នោត ការិយាល័យបោះឆ្នោតរាប់រយកន្លែងត្រូវទទួលរងនូវការវាយប្រហារ និងដុតបំផ្លាញ។ មនុស្សពី ១៨ ទៅ ២៤នាក់ ត្រូវបាត់បង់ជីវិត។
គណបក្ស BNP (Bangladesh National Party) ដែលជាបក្សប្រឆាំងដ៏ធំ បានធ្វើពហិការមិនចូលរួមបោះឆ្នោត ក្រោយពីលោកស្រីនាយករដ្ឋមន្រ្តីហាស៊ីណា (Cheikh Hasina) បដិសេធមិនព្រមចុះចេញពីតំណែង នៅមុនការបោះឆ្នោត ដើម្បីបង្កើតរដ្ឋាភិបាលចាំផ្ទះមួយ ដែលអព្យាក្រឹត ស្របទៅតាមការអនុវត្តនាពេលកន្លងមក។
គួរបញ្ជាក់ថា ចាប់តាំងពីឆ្នាំ១៩៩៦ ការបោះឆ្នោតជាតិបង់ក្លាដែស ត្រូវរៀបចំធ្វើ ក្រោមការចាត់ចែងរបស់រដ្ឋាភិបាលចាំផ្ទះ ដែលមិនចំណុះឲ្យគណបក្សណាមួយ ដើម្បីធានាឲ្យដំណើរការបោះឆ្នោតអាចធ្វើទៅដោយសេរី និងយុត្តិធម៌។ ក៏ប៉ុន្តែ គណបក្សកាន់អំណាចរបស់លោកស្រីនាយករដ្ឋមន្រ្តីហាស៊ីណា បានធ្វើការកែប្រែរដ្ឋធម្មនុញ្ញ ហើយសម្រេចរៀបចំការបោះឆ្នោត ដោយមិនបង្កើតរដ្ឋាភិបាលចាំផ្ទះ។
បណ្តាប្រទេសលោកខាងលិចមួយចំនួន រួមមានសហរដ្ឋអាមេរិក និងសហភាពអឺរ៉ុប ជាដើម បានបដិសេធមិនបញ្ជូនអ្នកសង្កេតការណ៍បោះឆ្នោតឲ្យទៅបង់ក្លាដែស។
គណបក្សប្រឆាំង ក្រៅពីបានធ្វើពហិការមិនចូលរួមការបោះឆ្នោត ក៏បានរៀបចំឲ្យមានការធ្វើកូដកម្ម និងបាតុកម្មយ៉ាងច្រើនផងដែរ ដើម្បីដាក់សម្ពាធលើរដ្ឋាភិបាល។ គណបក្សកាន់អំណាចបានចោទបក្សប្រឆាំងថាបានប្រើអំពើហិង្សា បង្កការភ័យខ្លាច ដើម្បីរារាំងប្រជាពលរដ្ឋកុំឲ្យចេញទៅបោះឆ្នោត។
នៅក្រោយការបោះឆ្នោត វិបត្តិនយោបាយបង់ក្លាដែសនៅតែស្ថិតក្នុងសភាពធ្ងន់ធ្ងរ។ គណបក្សធំៗទាំងពីរនៅតែបន្តប្រឈមមុខដាក់គ្នា ដោយមិនមានភាគីណាមួយសុខចិត្តបន្ទន់ជំហរ ដើម្បីសម្រុះសម្រួលរកដំណោះស្រាយ។
គណបក្សប្រឆាំងទាមទារឲ្យលុបចោលលទ្ធផលបោះឆ្នោត កាលពីថ្ងៃអាទិត្យ ហើយរៀបចំការបោះឆ្នោតឡើងវិញ ក្រោមការចាត់ចែងរបស់រដ្ឋាភិបាលចាំផ្ទះ ដែលអព្យាក្រឹត។
លោកស្រីនាយករដ្ឋមន្រ្តីហាស៊ីណាហាក់បានបង្ហាញនូវឆន្ទៈចង់ឲ្យមានការរៀបចំការបោះឆ្នោតឡើងវិញ ទៅតាមការទាមទាររបស់បក្សប្រឆាំង ក៏ប៉ុន្តែ បានដាក់លក្ខខណ្ឌច្រើន៖ ឲ្យបក្សប្រឆាំងបញ្ឈប់ការប្រើអំពើហិង្សា, កាត់ផ្តាច់សម្ព័ន្ធភាពជាមួយគណបក្សអ៊ីស្លាមជ្រុលនិយម និងជាពិសេស ឲ្យបក្សប្រឆាំងបញ្ឈប់ការទាមទារឲ្យបង្កើតរដ្ឋាភិបាលចាំផ្ទះ។
គណបក្សធំៗទាំងពីរ នៅតែបន្តទម្លាក់ការទទួលខុសត្រូវដាក់គ្នាទៅវិញទៅមកថា ជាអ្នកបង្កវិបត្តិនៅពេលនេះ។ ក៏ប៉ុន្តែ អ្នកវិភាគឯករាជ្យភាគច្រើន នៅបង់ក្លាដែស យល់ថា គេមិនអាចបន្ទោសតែម្ខាងណាមួយបានទេ តែវាជាកំហុសទាំងសងខាង ពីព្រោះថា គ្រប់អ្នកនយោបាយបង់ក្លាដែសទាំងអស់ ទាំងបក្សកាន់អំណាច និងបក្សប្រឆាំងគិតតែពីប្រយោជន៍ និងមុខមាត់ខ្លួនឯង មិនយកប្រយោជន៍រួមជាធំ។
ការប្រកាន់ជំហរតឹងរ៉ឹងរៀងៗខ្លួនរបស់គណបក្សធំៗទាំងពីរ ធ្វើឲ្យវិបត្តិសង្គម និងនយោបាយបង់ក្លាដែសត្រូវស្ថិតក្នុងភាពទាល់ច្រក បង្កឲ្យមានក្តីបារម្ភថា វាអាចនឹងប៉ះពាល់ទៅដល់វិស័យសេដ្ឋកិច្ចបង់ក្លាដែស ដែលជាប្រទេសដ៏ក្រីក្រមួយ នៅក្នុងតំបន់អាស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ