ជីវចម្រុះជួបភាពអាសន្ន ការអភិរក្សធម្មជាតិមិនគ្រប់គ្រាន់
អង្គការសហប្រជាជាតិ បានបើកសន្និសីទស្តីអំពីជីវចម្រុះ ចាប់ផ្តើម ពីថ្ងៃចន្ទទី៦-១៧ តុលា ២០១៤ នៅប្រទេសកូរ៉េខាងត្បូង ដោយផ្តោចទៅលើប្រធានបទសំខាន់ៗមួយចំនួនដូចជា ៖ ការផុតពូជ ការបំផ្លិចបំផ្លាញជីវិតក្នុងធម្មជាតិ ប្រព័ន្ធបរិស្ថានធ្លាក់ចុះ។ បើតាមការសន្និដ្ឋានរបស់អង្គការ ការខិតខំប្រឹងប្រែងថែរក្សា និងអភិរក្សកន្លងមកមិនគ្រប់គ្រាន់សម្រាប់ការពារជីវចម្រុះទេ។
ចុះផ្សាយនៅថ្ងៃ៖
ស្តាប់ - ០១:៤៣
១៩៤ប្រទេសជាសមាជិកអនុសញ្ញាជីវសាស្ត្រចម្រុះ ដែលបង្កើតឡើងកាលពី២០ឆ្នាំមុននៅទីក្រុង រីយ៉ូដឺហ្សានេរ៉ូ កំពុងជួបប្រជុំគ្នាក្នុងសន្និសីទលើកទី១២ (ក្នុងក្របខ័ណ្ឌដូចសន្និសីទស្តីពីអាកាសធាតុដែរ)។
“យើងត្រូវប្រឹងឱ្យខ្លាំងជាងនេះ និងភ្លាមៗ ការពារធម្មជាតិ !” នេះគឺជាប្រសាសន៍របស់នាយកកម្មវិធីបរិស្ថានអង្គការសហប្រជាជាតិ (Pnue) នាឱកាសបើកសន្និសីទ។ ព្រោះបើតាមរបាយការណ៍ “មួយដំណាក់ដំបូង” ការងារការពារជីវចម្រុះ១០ឆ្នាំ សន្យាធ្វើនាឱកាសសន្និសីទឆ្នាំ២០១០ នៅក្រុងណាហ្គោយ៉ាប្រទេសជប៉ុន (ចំនួនជាង២០ចំណុច ដូចជាចំណាត់ការស្តុកត្រី ពង្រីកផ្ទៃដីអភិរក្ស ស្រោចស្រង់ប្រព័ន្ធបរិស្ថានខូចខាត កម្ចាត់ជំនួយបង្ខូចបរិស្ថាន ... ) ភាគច្រើនគ្មានបានសម្រេចដូចកម្មវត្ថុកំណត់ទេ។ ប្រាក់ជំនួយដល់ប្រទេសក្រីក្រកំពុងអភិវឌ្ឍន៍ សម្រាប់ការពារជីវចម្រុះ ក៏មិនបានទៅដល់ដៃ។ ចំនួនទឹកប្រាក់មានលក្ខណៈមិនច្បាស់លាស់។ ការកាប់បំផ្លាញព្រៃឈើ បន្តធ្វើក្នុងល្បឿនគួរឱ្យស្រែកអាសន្ននៅតំបន់អាម៉ាហ្សូនី នៅវៀតណាម និងចិន។ ចំនួនសត្វស្លាបបានថយចុះអស់២០%បើប្រៀបទៅឆ្នាំ១៩៨០។
ផែនការការពារធម្មជាតិរយៈពេល១០ឆ្នាំ បានដើរដល់ពាក់កណ្តាលផ្លូវហើយ តែដូចជាគ្មានអ្នកអនុវត្តបានពេញលេញសោះ ! ឆ្នាំ២០២០ នៅមិនឆ្ងាយទេ ដូច្នេះវាជាការបន្ទាន់បំផុតដែលគ្រប់គ្នាត្រូវលើកទឹកចិត្តការពារ ធម្មជាតិភ្លាម។
ជំនួបប្រជុំនេះ ប្រព្រឹត្តទៅ ពីរបីថ្ងៃក្រោយអង្គការការពារសត្វព្រៃចេញផ្សាយរបាយការណ៍ដ៏អាក្រក់មួយបញ្ជាក់ថាចំនួនសត្វព្រៃ លើគោក ក្នុងទឹក លើអាកាស បានធ្លាក់ចុះអស់ពាក់កណ្តាលក្នុងរវាងពី ឆ្នាំ១៩៧០ដល់ឆ្នាំ២០០០។ សន្និសីទលើកនេះក៏ជាឱកាសសម្រេចឱ្យប្រើប្រាស់ពិធីសារណាហ្គោយ៉ា ដែលមានប្រទេសចំនួន៥០ផ្តល់សច្ចាប័ននឹងត្រូវចូលជាធរមាននៅថ្ងៃទី ១២តុលាខាងមុខ។ ពិធីសារដែលជាកិច្ចព្រមព្រៀងចែកចាយផលចំណេញបានមកពី ធនធានធម្មជាតិរុក្ខជាតិសត្វ និងចំណេះបែបបូរាណ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ