គណបក្សទាំងពីរព្រមព្រៀងគ្នាបង្កើតច្បាប់ស្តីពីការជួលផ្ទះ
គណបក្សប្រជាជនកម្ពុជានិងគណបក្សសង្គ្រោះជាតិបានព្រមព្រៀងគ្នាថានឹងបង្កើតច្បាប់ថ្មីមួយដើម្បីគ្រប់គ្រងការជួលផ្ទះ។ ច្បាប់នេះសំដៅការពារផលប្រយោជន៍អ្នកជួលនិងម្ចាស់ផ្ទះដើម្បីចៀសវាងការខាតបង់ផលប្រយោជន៍ដល់ភាគីណាមួយ។ ក្រុមការងារគណបក្សទាំងពីរកំពុងពិភាក្សាគ្នាអំពីការតាក់តែងសេចក្តីព្រាងច្បាប់នេះ។
ចុះផ្សាយនៅថ្ងៃ៖
ស្តាប់ - ០២:១៤
កម្ពុជានឹងមានច្បាប់ស្តីពីការជួលផ្ទះក្នុងពេលឆាប់ៗនេះដើម្បីការពារផលប្រយោជន៍ទាំងម្ចាស់ផ្ទះទាំងអ្នកជួលផ្ទះ។ សេចក្តីព្រាងច្បាប់ថ្មីនេះនឹងត្រូវតាក់តែងឡើងដោយក្រុមការងារគណបក្សទាំងពីរដែលមានកៅអីក្នុងរដ្ឋសភា។ នេះជាការប្រកាសឲ្យដឹងរបស់លោកនាយករដ្ឋមន្ត្រី ហ៊ុន សែន នៅព្រឹកថ្ងៃអង្គារទី ១០ កុម្ភៈនេះ។
ថ្លែងក្នុងពិធីចែកសញ្ញាបត្រដល់និស្សិតនៅឯកោះពេជ្រ ប្រមុខរដ្ឋាភិបាលខ្មែរបានបញ្ជាក់ថា រូបលោកបានព្រមព្រៀងជាមួយលោក សម រង្ស៊ី មេដឹកនាំបក្សប្រឆាំងរួចហើយថានឹងបង្កើតក្រុមការងារដើម្បីសរសេរសេចក្តីព្រាងច្បាប់ស្តីពីការជួលផ្ទះ។ សេចក្តីព្រៀងច្បាប់នេះមានគោលដៅការពារផលប្រយោជន៍ភាគីទាំងសងខាងគឺទាំងម្ចាស់ផ្ទះនិងអ្នកជួលផ្ទះ។ នេះបើតាមការពន្យល់របស់លោកនាយករដ្ឋមន្ត្រី។
លោក សម រង្ស៊ី ធ្លាប់បានបង្ហើបឲ្យដឹងកាលពីពេលថ្មីៗនេះថា លោកចង់ឲ្យមានច្បាប់មួយកំណត់ពីការជួលផ្ទះដូចនៅក្នុងបណ្តាប្រទេសជឿនលឿនផ្សេងទៀតដែរ។ បំណងរបស់មេដឹកនាំបក្សប្រឆាំងត្រូវបានបង្ហាញឡើងស្របពេលដែលគណបក្សកាន់អំណាចកំពុងធ្វើសកម្មភាពដើម្បីការពារផលប្រយោជន៍អ្នកជួលផ្ទះក្នុងនោះភាគច្រើនជាកម្មកររោងចក្រកាត់ដេរ។ ជាក់ស្តែង អាជ្ញាធរអគ្គិសនីកំពុងញាប់ដៃជើងក្នុងការតបណ្តាញអគ្គិសនីតម្លៃថោកជូនដល់អ្នកជួលផ្ទះក្នុងរាជធានីភ្នំពេញ។
លោកនាយករដ្ឋមន្ត្រី ហ៊ុន សែន បានលើកឡើងអំពីបញ្ហាមួយចំនួនដែលទាក់ទងនឹងការជួលផ្ទះ។ បញ្ហាដូចជាម្ចាស់ផ្ទះខ្លះបានដំឡើងថ្លៃស្រេចតែចិត្តឬក៏ផ្តាច់កុងត្រាមុនពេលកំណត់ដែលធ្វើឲ្យអ្នកជួលជួបការលំបាក។ ផ្ទុយទៅវិញ ក៏មានដែរ អ្នកជួលផ្ទះខ្លះដែលចាកចេញទាំងពាក់កណ្តាលទីដែលបង្កបញ្ហាដល់ម្ចាស់ផ្ទះជួល។ ទាំងអស់នេះគឺបណ្តាលមកពីគ្មានច្បាប់សម្រាប់គ្រប់គ្រងការជួលផ្ទះ។
ក្នុងអំឡុងពេលរង់ចាំច្បាប់នេះកើតចេញជារូបរាង លោកនាយករដ្ឋមន្ត្រី ហ៊ុន សែន បានអំពាវនាវឲ្យម្ចាស់ផ្ទះជួលទាំងអស់កុំដំឡើងថ្លៃនៅពេលដែលលឺថាកម្មករបានឡើងប្រាក់ខែ។ ប្រមុខដឹកនាំរដ្ឋាភិបាលបក្សកាន់អំណាចអះអាងថា ការមិនដំឡើងថ្លៃគឺដើម្បីទុកលទ្ធភាពឲ្យកម្មករបង្កើនជីវភាពរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ