ព្រះរាជពិធីដង្ហែព្រះបរមអដ្ឋិ ព្រះបរមរតនកោដ្ឋមានមនុស្សជាង២ម៉ឺននាក់ចូលរួមដង្ហែ
នៅព្រឹកថ្ងៃទី១១ កក្កដានេះ គឺថ្ងៃដង្ហែព្រះបរមអដ្ឋិ ព្រះបរមរតនកោដ្ឋ។ នៅក្នុងពិធីនេះ មានអ្នកចូលរួមដង្ហែតាមផែននីមួយៗ ២ពាន់២រយនាក់និងប្រជាពលរដ្ឋរួមទាំងមន្ត្រីរាជការ អមសងខាងផ្លូវប្រមាណ២ម៉ឺននាក់ផ្សេងទៀត។ ផែនចូលរួមក្នុងក្បួនដង្ហែ មានផែនសាសនា មន្ត្រីរាជការ កងកម្លាំងប្រដាប់អាវុធ យុវជនជាដើម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៨
នៅម៉ោងប្រមាណជាង ៩ និង ៣០នាទី ព្រះរាជពិធីដង្ហែព្រះបរមអដ្ឋិ ព្រះបរមរតនកោដ្ឋ បានដង្ហែចូលដល់ព្រះវិហារព្រះកែវមរកតក្នុងព្រះបរមរាជវាំងវិញ ក្រោយពិធីដង្ហែចេញនៅម៉ោងប្រមាណជា៧ និង២០នាទីព្រឹក។
ក្រោយស្នូរកាំភ្លើង១០១ណាត់ ព្រះរាជពិធីដង្ហែព្រះបរមអដ្ឋិចំនួន៣កោដ្ឋលើព្រះទីនាំង គុចស៊ី បានចាប់ផ្តើមដង្ហែចេញយឺតៗដែលដឹកមុខដោយក្បួនក្រុមទ័ពត្រែ។ ក្បួនដង្ហែបានចេញពីវិថីសម្តេចសុធារសខាងមុខព្រះបរមរាជវាំង បត់ឆ្វេងតាមផ្លូវព្រះធម្មលិខិតអ៊ុក ជាប់ព្រះបរមរាជវាំងឆ្ពោះទៅកាន់វិថីព្រះនរោត្តមពីជើងទៅត្បូង រហូតដល់វិថីរោងដំរី។ ក្នុងពិធីដង្ហែនេះ មានផែនបួនសំខាន់ៗ គឺផែនកងទ័ព និងយុវជន ផែនមន្ត្រីរាជការនៃអង្គនីតិប្រតិបត្តិ រីឯផែនសាសនាព្រាហ្មណ៍ និងផែនព្រះទីនាំងតម្កល់ព្រះអដ្ឋិព្រះបរមកោដ្ឋ។
ក្រៅពីផែនដែលបានរៀបចំដង្ហែក្បួន ដែលស្ថិតក្នុងសំលៀកបំពាក់ទៅតាមអង្គភាពនីមួយផ្សេងៗគ្នានោះ ប្រជាពលរដ្ឋដែលមានផ្កាចម្រុះពណ៌ ទង់ជាតិខ្មែរ ទង់ព្រះបរមរាជវាំង រួមទាំងព្រះឆាយាល័ក្ខណ៍របស់សម្តេចឪ នរោត្តម សីហនុ ក្នុងដៃបានអង្គុយបត់ជើងលើកដៃប្រណមសុំបួងសួងយកសេចក្តីសុខពេលក្បួនព្រះបរមអដ្ឋិបានឆ្លងកាត់។ មនុស្សម្នាស្ថិតក្នុងទឹកមុខស្រងូតស្រងាត់ មិនថាក្មេងចាស់ប្រុសស្រី ដែលបានកើតនិងធំដឹងក្តីទាន់ព្រះរាជបូនីយកិច្ចរបស់ព្រះបរមរតនកោដ្ឋក៏ដោយ។
បើទោះបីជាមិនសូវមានមនុស្សចូលរួមច្រើនដូចថ្ងៃដង្ហែព្រះបរមសពព្រះអង្គពីទីក្រុងប៉េកាំងមកកាន់ព្រះបរមរាជវាំងនៅភ្នំពេញក៏ដោយ។ ក៏ប៉ុន្តែអ្នកចូលរួមទាំងអស់មិនក្រោមពីរម៉ឺននាក់នោះទេ ។ នេះបើតាមការបញ្ជាក់ពីអ្នកនាំពាក្យសាលារាជធានីភ្នំពេញ លោក ឡុង ឌីម៉ង់។
ដោយឡែកនៅតាមដងវិថីដែលព្រះរាជពិធីបានឆ្លងកាត់ ទង់នៃព្រះរាជាណាចក្រកម្ពុជា រូបព្រះឆាយាលក្ខ័ណ៍របស់ព្រះសម្តេចឪ នរោត្តម សីហនុ រួមទាំងពាក្យស្លោកដែលនិយាយពីព្រះរាជបូនីយកិច្ចរបស់អតីតព្រះមហាក្សត្រ អង្គសម្តេចឪ ត្រូវបានដាក់តាំងអមសងខាងផ្លូវ។
សូមបញ្ជាក់ថា កម្មវិធីដង្ហែព្រះបរមអដ្ឋិ ព្រះបរមរតនកោដ្ឋ មានរយៈពេលបីថ្ងៃគឺចាប់ផ្តើមពីថ្ងៃទី១០ដល់ថ្ងៃទី១២ កក្កដាស្អែកនេះ។ ពិធីដង្ហែព្រះបរមអដ្ឋិ ព្រះបរមរតនកោដ្ឋនេះ មានការចូលរួមពីមន្ត្រីរដ្ឋាភិបាលនៃគណបក្សប្រជាជនកម្ពុជា តំណាងរាស្ត្រជាប់ឆ្នោតគណបក្សសង្គ្រោះជាតិផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ