ស្ថាប័នពាក់ព័ន្ធប្រកាសអប់រំណែនាំយុវវ័យ ខណៈពួកគេត្រៀមអបអរបុណ្យថ្ងៃ១៤កុម្ភៈ
ស្ថាប័នសាធារណៈ និងអង្គការសង្គមស៊ីវិលនានា មានការច្បាប់អារម្មណ៍កាន់តែច្រើនទាក់ទងទៅនឹងថ្ងៃទី១៤កុម្ភៈឆ្នាំ២០១៥នេះ។ ក្រសួងមន្ទីរដែលពាក់ព័ន្ធ សុទ្ធតែបានធ្វើសកម្មភាពផ្សព្វផ្សាយជាមុនទប់ស្កាត់ការប្រព្រឹត្តិជ្រុលជ្រួសហួសប្រពៃណីរបស់ក្រុមយុវវ័យសម័យថ្មីឬក៏ចេញសេចក្តីប្រកាសមានលក្ខណៈជាការអប់រំ។ ជាមួយគ្នានេះមជ្ឈមណ្ឌលវប្បធម៌ និង សីលធម៌សង្គម ក៏បានប្រាប់ម្ចាស់ផ្ទះសំណាក់មួយចំនួន ឲ្យសហការជាមួយខ្លួនក្នុងការបដិសេធនូវសកម្មភាពមិនប្រក្រតីរបស់យុវវ័យពេញមួយថ្ងៃគឺថ្ងៃទី១៤កុម្ភៈ ដែលជាថ្មីនៃសេចក្តីស្រលាញ់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
មជ្ឈមណ្ឌលវប្បធម៌ជាតិនិងសីលធម៌សង្គមបានលើកឡើងថា អង្គការមួយនេះនឹងធ្វើសកម្មភាពពន្យល់និងទប់ស្កាត់ដល់យុវវ័យ ប្រសិនបើពួកគេបង្ហាញពីកាយវិការជ្រុលជ្រួស
ហួសពីព្រំដែននៃខ្លឹមសារបុណ្យនៃសេចក្តីស្រលាញ់ ឬប្រឆាំងនឹងប្រពៃណីនិងទំនៀមទំលាប់ខ្មែរ ដែលការធ្វើសកម្មភាពនេះប្រព្រឹត្តិទៅនៅថ្ងៃទី១៤កុម្ភៈស្អែកនេះ។
លោក ប៉ូ សំណាង ប្រធានមជ្ឈមណ្ឌលជាតិ និង វប្បធម៌សង្គមបានថ្លែងប្រាប់វិទ្យុបារាំង អន្តរជាតិ RFI នៅថ្ងៃនេះថា អង្គការរបស់លោកបានទាក់ទងអ្នកគ្រប់គ្រងផ្ទះសំណាក់និងសណ្ឋាគារ ប្រមាណជិត៣០០ នៅទីក្រុងភ្នំពេញ ដោយស្នើសុំឲ្យជួយសហការ និងទំនាក់ទំនងគ្នាតាមខ្សែរទូរស័ព្ទនៅពេលដែលមានភាពមិនប្រក្រតីណាមួយទាក់ទងទៅនឹងយុវវ័យនៅថ្ងៃទី១៤កុម្ភៈ។
លោក ប៉ូ សំណាង បញ្ធាក់ថាលោកបានស្នើសុំឲ្យម្ចាស់សណ្ឋាគារ និងផ្ទះសំណាក់បដិសេធ
ការសុំជួលបន្ទប់ដល់យុវវ័យ ដែលមើលទៅទំនងជានាំគ្នាប្រព្រឹត្តិខុសគន្លងប្រពៃណី ឬក៏ក្រុមយុវជនជាអនីតិជន ដែលនេះជាការចូលរួមប្រយុទ្ធប្រឆាំងនឹងការជួញដូរមនុស្សផងដែរ។ ក៏ប៉ុន្តែការអបអរចំថ្ងៃបុណ្យនេះ គឺជាសិទ្ធិរបស់យុវវ័យទាំងអស់ ក្រៅពីការអប់រំលោកគ្មានសិទ្ធិឬឥទ្ធិពលអ្វីរំលោភសិទ្ធិនិងការសប្បាយរបស់យុវវ័យនោះទេ។
ជាមួយគ្នានេះ រដ្ឋមន្ត្រីក្រសួងអប់រំយុវជននិងកីឡា លោក ហង្ស ជួនណារ៉ុន ក៏បានប្រាប់វិទ្យុRFI កាលពីថ្ងៃពុធដែរថា ក្រសួងអប់រំមានតែការពន្យល់ដល់ក្មេងៗតាមរយៈសាលារៀន ដែលបានធ្វើប៉ុន្មានថ្ងៃកន្លទទៅនេះ ហើយលោកមិនមានការបារម្មណ៍ទេប្រសិនបើពួកគេយល់ច្បាស់ពីថ្ងៃនៃសេចក្តីស្រលាញ់ពិតប្រាកដ។ ជាមួយគ្នានេះលោករដ្ឋមន្ត្រីក៏បានអំពាវនាវដល់មាតា បិតា ឲ្យមានការយកចិត្តទុកដាក់ចំពោះកូន ហើយសាលារៀនតម្រូវឲ្យពង្រឹងអវត្តមាន។
ទាក់ទងទៅនឹងប្រធានបទនេះដែរ ក្រសួងវប្បធម៌ ក្រសួងកិច្ចការនារី និងស្ថាប័នពាក់ព័ន្ធឯទៀត ក៏បានអំពាវនាវដល់យុវវ័យផងដែរ កុំឲ្យប្រើប្រាស់ទិវានៃក្តីស្រលាញ់ជាលេសប្រព្រឹត្តិ
នូវអំពើអវិជ្ជមាននានា ខុសគន្លងប្រពៃណីដ៏ត្រកាលរបស់ខ្មែរដែលនាំឲ្យប៉ះពាល់ដល់អនាគតនិងកិត្តិយសរបស់ខ្លួននិងគ្រួសារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ