អង្គភាពប្រឆាំងអំពើពុករលួយបន្តស្រាវជ្រាវអ្នកកាសែត៣នាក់ក្នុងរយៈពេល៤៨ម៉ោង
អង្គភាពប្រឆាំងអំពើពុករលួយកំពុងធ្វើការបន្ថែមទៀតប្រឆាំងនឹងមនុស្សបីនាក់ដែលបានចាប់ខ្លួននៅឯខេត្តកំពតកាលពីថ្ងៃសុក្រ ទាក់ទងទៅនឹងការចោទប្រកាន់ថាបានជំរិតទារប្រាក់ ដែលជាប់ទាក់ទងទៅនឹងអំពើពុករលួយ។ មិនមានសេចក្តីថ្លែងការណ៍ឬអត្ថាធិប្បាយណាមួយពីសមាគមកាសែតនានាទាក់ទងទៅនឹងការចាប់ខ្លួននេះទេ។ក៏ប៉ុន្តែមជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យសម្តែងនូវការបារម្ភពីនីតិវិធីនៃចំណាត់ការផ្លូវច្បាប់ចំពោះអ្នកដែលត្រូវចាប់ខ្លួនទាំងនោះ។
ចុះផ្សាយនៅថ្ងៃ៖
ស្តាប់ - ០១:៥៨
អង្គភាពប្រឆាំងអំពើពុករលួយ(ACU)បានធ្វើការចាប់ខ្លួនជាបន្តបន្ទាប់កាលពីថ្ងៃសុក្រ មនុស្ស៣នាក់ នៅខេត្តកំពតពីបទជំរិតទារប្រាក់។ ប្រព័ន្ធផ្សព្វផ្សាយអនឡាញនៅចុងសប្តាហ៍នេះ បានចេញផ្សាយថា បុរសទាំងបីនាក់នោះគឺជាអ្នកកាសែត។ពួកគេបំរើការងារក្នុងនាមជាសហការីនៅតាមស្ថាប័នសារព័ត៌មានមួយចំនួនក្នុងនោះមាន ទូរទ្សសន៍ប៉ុស្តិលេខ៩ ទូរទស្សន៍ហង្សមាស និងកាសែតកម្ពុជាថ្មី និងអ្នកទីបីជាសហការីទូរទស្សន៍អប្សារា។
ក៏ប៉ុន្តែលោក ឱម យិនទៀង ប្រធានអង្គភាពប្រឆាំងអំពើពុករលួយក្នុងអំឡុងពេល៤៨ ម៉ោងនៃកិច្ចស៊ើបអង្កេតលោកមិនបានប្រើពាក្យថាអ្នកដែលត្រូវចាប់ខ្លួននោះថាជាអ្នកកាសែតនោះទេ។ លោក ឱម យិនទៀង បញ្ជាក់ថា យើងមិនទាន់ហ៊ានអះអាងថាអ្នកទាំងនោះជាអ្នកកាសែត អ្នកកាសែតក្លែងក្លាយ ឬក៏អ្នកកាសែតពីមុនដែលបានឈប់ពីការងារនេះក៏ទេដែរ ដោយលោកកំពុងបន្តធ្វើការស្រាវជ្រាវ។
លោក ប៉ា ងួនទៀង ប្រធានមជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ បានគាំទ្រដល់ចំណាត់ការរបស់អង្គភាពប្រឆាំងអំពើពុករលួយទាក់ទងទៅនឹងសកម្មភាពប្រយុទ្ធ
ប្រឆាំងអំពើពុករលួយ ប្រសិនបើមានអ្នកកាសែតប្រព្រឹត្តិខុសវិជ្ជាជីវៈដូច្នេះមែន។ក៏ប៉ុន្តែ
អ្វីដែលលោកមានការព្រួយបារម្ភនោះគឺចំណាត់ការនីតិវិធី។
ពោលគឺបើមានការប្រព្រឹត្តិខុសបែបហ្នឹង តើចំណាត់ការនីតិវិធីគួរធ្វើឡើងតាមផ្លូវតុលាការឬក៏តាមរយៈអង្គភាពប្រឆាំងអំពើពុករលួយ។ជាមួយគ្នានេះលោក ប៉ា ងួនទៀង ក៏ចោទជាសំណួរដែរទាក់ទងទៅនឹងការព្រួយបារម្ភ ពីសុច្ចរិតភាពនិងតម្លាភាពរបស់របស់មន្ត្រី ACU ថ្នាក់ក្រោមមួយចំនួន ក្នុងការឈានទៅរកការចាប់ខ្លួនអ្នកកាសែត។
សូមបញ្ជាក់ថា កាលពីថ្ងៃទី៩ខែកញ្ញាឆ្នាំ២០១៤កន្លងទៅនេះ អ្នកកាសែតចំនួន ៦នាក់ បំរើការងារនៅស្ថាប័នព័ត៌មានផ្សេងៗគ្នា ត្រូវតុលាការខេត្តកំពុងឆ្នាំង លើកយកសំណុំរឿងទៅជុំនុំជម្រះបន្ទាប់ពីបានចោទប្រកាន់ពីបទកំហែងយក។ប៉ុន្តែសាលក្រមនឹងត្រូវប្រកាសនៅថ្ងៃទី១៦ខែកញ្ញាសប្តាហ៍ក្រោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ