សកម្មជនដីធ្លីបឹងកក់យកទិវាសិទ្ធិនារីដាក់ញត្តិទៅក្រសួងកិច្ចការនារី
ប្រជាពលរដ្ឋសហគមន៍បឹងកក់ត្រូវបានរារាំងដោយកំលាំងមានសមត្ថកិច្ចក្រុងភ្នំពេញ ខណៈដែលពួកគេព្យាយាមដង្ហែក្បួនចេញពីសហគមន៍បឹងកក់ ស្ថិតនៅសង្កាត់ស្រះចក ខ័ណ្ឌដូនពេញ។ ទោះយ៉ាងណាក៏ដោយ សកម្មជនដីធ្លីទាំងនេះ បានប្រគល់ញត្តិតាមបំណងរបស់ពួកគេ ដល់ក្រសួងកិច្ចការនារី ដើម្បីស្នើសុំឲ្យក្រសួងនេះអន្តរគមន៍ដល់ ការប្រើអំពើហិង្សារបស់អាជ្ញាធរទៅលើស្ត្រី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥០
ក្រុមស្ត្រីសហគមន៍បឹងកក់ ដោយមានការចូលរួមពីសហគមន៍បុរីកីឡា និងសហគមន៍ឯទៀតត្រូវបានអាជ្ញាធររារាំងមិនឲ្យហែក្បួនទៅកាន់ក្រសួងកិច្ចការនារី បន្ទាប់ពីពួកគេបានជួបជុំគ្នានៅទីតាំងរបស់ខ្លួនក្នុងតំបន់បឹងកក់ ខ័ណ្ឌដូនពេញ។ ប៉ូលិសជាច្រើនាក់បានដាក់របាំង ត្រង់ចំណុចផ្លូវចេញចូលតំបន់បឹងកក់ ស្ថិតនៅក្បែរសណ្ឋាគារភ្នំពេញ និងបានបំបែករាល់ការជួបជុំគ្នារបស់ប្រជាជនសហគមន៍ទាំងនោះនៅលើកំណាត់ផ្លូវមុនីវង្ស។
កញ្ញាសុង ស្រីលាភ តំណាងមួយរូបនៃសហគមន៍បឹងកក់ បានថ្លែងថា ពួកគេបានដាក់ញ្ញាតិ ទៅក្រសួងកិច្ចការនារី ដើម្បីស្នើឲ្យក្រសួងដែលទាក់ទងទៅនឹងកិច្ចការស្ត្រីនេះ ជួយអន្តរាគមន៍ ដល់អាជ្ញាធរក្រុងភ្នំពេញ ដែលតែងតែប្រើអំពើហិង្សាទៅលើស្ត្រី រាល់ពេលពួកគេធ្វើការតវ៉ារឿងដីធ្លីម្តងៗ។ នៅក្នុងឱកាសននៃទិវាសិទ្ធិស្ត្រីនាពេលនេះ ក្រុមសកម្មជនដីធ្លីក៏បានអំពាវនាវឲ្យអាជ្ញាធរគោរពសិទ្ធិស្ត្រីផងដែរ។ទោះយ៉ាងណាក៏ដោយ ញត្តិរបស់ពួកគេកាលពីព្រឹកមិញត្រូវបានទទួលដោយតំណាងក្រសួងកិច្ចការនារីរួចហើយ។
លោក អំ សំអាត, ប្រធានផ្នែកបច្ចេកទេសស៊ើបអង្កេតរបស់អង្គការលីកាដូ បានថ្លែងថា ការរារាំងរបស់អាជ្ញាធរមិនឲ្យប្រជាជនសហគមន៍បឹងកក់ដង្ហែក្បួនអបអរសាទរនៅក្នុងឱកាសនៃទិវាបុណ្យសិទ្ធិនារីអន្តរជាតិ ៨មិនានេះ គឺជាការបំបិទសិទ្ធិសេរីភាពរបស់ប្រជាពលរដ្ឋក្នុងការអនុវត្តន៍សិទ្ធិរបស់ខ្លួន។លោកថាអាជ្ញាធរគួរតែសម្រួលដល់ពលរដ្ឋក្នុងការប្រតិបត្តិដល់សិទ្ធិរបស់ពួកគេ ជាជាងការរំលោភសិទ្ធិដែលនាំឲ្យមានការរិះគន់បែបនេះ។
សូមបញ្ជាក់ថា ប្រជាពលរដ្ឋសហគមន៍បឹងកក់ដែលមានទំនាស់ដីធ្លីដ៏រ៉ាំរ៉ៃនោះ បានដាក់លិខិតអញ្ជើញអាជ្ញាធរក្រុង រួមមានអភិបាលក្រុង និងអភិបាលខ័ណ្ឌដូនពេញ ព្រមទាំងអង្គការក្រៅរដ្ឋាភិបាលនិងតំណាងស្ថានទូតមួយចំនួនដើម្បីចូលរួមវេទិការ ស្តីពីដីធ្លី នៅក្នុងឱកាសនៃទិវាសិទ្ធិនារីអន្តរជាតិលើកទី១០៣នាថ្ងៃនេះ។
អាជ្ញាធររាជធានីភ្នំពេញធ្លាប់បានថ្លែងហើយថា នឹងមិនអនុញ្ញាតិ ឲ្យប្រជាជនសហគមន៍ទាំងនេះ ហែរក្បួនតាមទីសាធារណៈឡើយ ដោយហេតុផលសុវត្ថិភាព និងសណ្តាប់ធ្នាប់សាធារណៈ។ពោលគឺវេទិការនេះត្រូវបានអនុញ្ញាតឲ្យធ្វើតែនៅនឹងកន្លែង ប៉ុណ្ណោះក្នុងស្នាក់ការសហគមន៍របស់ពួកគេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ