គ.ជ.ប ព្រមានបណ្តេញចេញពីការិយាល័យបោះឆ្នោត បើជនណាបង្កការរំខានដល់ការរាប់សន្លឹកឆ្នោត
ការបោះឆ្នោតជាតិជ្រើសតាំងតំណាងរាស្ត្រ នឹងចាប់ផ្តើមនៅព្រឹកថ្ងៃអាទិត្យ ទី២៩ កក្កដា ខណៈដែលគណៈកម្មាធិការជាតិរៀបចំការបោះឆ្នោត ហៅកាត់ថា គជប បានចេញសេចក្តីណែនាំបន្ថែមមួយ ស្តីពី ការផ្តល់សុពលភាពលើគំនូស សញ្ញាគាំទ្រ លើសន្លឹកឆ្នោត។ សេចក្តីណែនាំបន្ថែមនេះ គឺក្នុងគោលបំណងធ្វើឲ្យការបោះឆ្នោត និងរាប់សន្លឹកឆ្នោតនៅថ្ងៃអាទិត្យ ទី២៩ កក្កដា ប្រព្រឹត្តទៅដោយរលូន។ អ្វីដែលធ្ងន់ធ្ងរជាងនេះ គ.ជ.ប បានព្រមានថា នឹងបណ្តេញចេញពីការិយាល័យបោះឆ្នោត បើជនណាបង្កការរំខានដល់ការរាប់សន្លឹកឆ្នោត រួមទាំងការពិន័យជាប្រាក់ផង។
ចុះផ្សាយនៅថ្ងៃ៖
ស្តាប់ - ០២:១៨
សេចក្តីណែនាំនេះ បានសម្រេចផ្តល់សិទ្ធិនិងសមត្ថកិច្ចដល់ប្រធានគណៈកម្មការរាប់សន្លឹកឆ្នោត (គ.ក.រ) ឲ្យបណ្តេញជនទាំងឡាយណា ដែលបង្កការអុកឡុក ឬរំខានដល់ដំណើរការនៃការរាប់សន្លឹកឆ្នោត។ ក្រៅពីការបណ្តេញចេញ ជននោះ ក៏ត្រូវប្រឈមនឹងការផាកពិន័យជាប្រាក់ពី៥លានរៀល ដល់២០លានរៀល ដោយពុំទាន់គិតដល់ទោសព្រហ្មទណ្ឌផ្សេងទៀត។ នេះបើយោងតាមសេចក្តីណែនាំបន្ថែមរបស់ គជប ចុះថ្ងៃទី ២៨ កក្កដា នេះ។ ការសម្រេចផ្តល់សុពលភាពជាសន្លឹកឆ្នោតបានការ ឬមិនបានការ គឺជាសិទ្ធិ និងជាសមត្ថកិច្ចរបស់ប្រធានគណៈកម្មការរាប់សន្លឹកឆ្នោត (គ.ក.រ)។
សេចក្តីណែនាំនេះ បានលើកឡើងថា ជនគ្រប់រូបដែលមានវត្តមាននៅក្នុងការិយាល័យរាប់សន្លឹកឆ្នោត និងនៅក្នុងបរិវេណខាងក្នុងការិយាល័យ គឺស្ថិតនៅក្រោមការគ្រប់គ្រង និងការត្រួតពិនិត្យរបស់ប្រធានគណៈកម្មការរាប់សន្លឹកឆ្នោត (គ.ក.រ)។ ក្នុងករណីមានជនណាបង្កការអុកឡុក ឬរំខានមិនឲ្យដំណើរការរាប់សន្លឹកឆ្នោតបាន ប្រធានគណៈកម្មការរាប់សន្លឹកឆ្នោត (គ.ក.រ) ត្រូវចាត់វិធានការបណ្តេញជននោះ ចេញពីការិយាល័យភ្លាម និងធ្វើរបាយការណ៍អំពីករណីនេះ ជូនទៅគណៈកម្មការរៀបចំការបើឆ្នោតឃុំ/សង្កាត់។ ប៉ុន្តែយ៉ាងណាក៏ដោយ សេចក្តីណែនាំបន្ថែមនេះ បានផ្តល់ចន្លោះតូចមួយសម្រាប់ការតវ៉ាថា ជនណាដែលមិនយល់ស្របតាមការសម្រេចរបស់ប្រធានគណៈកម្មការរាប់សន្លឹកឆ្នោត (គ.ក.រ) អាចតវ៉ា ឬ ជំទាស់ចំពោះករណីនេះ ទៅកាន់គណៈកម្មការឃុំ/សង្កាត់រៀបចំការបោះឆ្នោត យ៉ាងយូរត្រឹមម៉ោង១១និង៣០នាទី នៃថ្ងៃបន្ទាប់នៃការបោះឆ្នោត។
គួរជំរាបជូនថា កន្លងមកមានគណបក្សនយោបាយមួយបានតវ៉ា អំពីយន្តការនៃការគូសន្លឹកឆ្នោតនេះ ដោយតម្រូវឲ្យគូសតែសញ្ញាធិក (Tick) នៅក្នុងប្រអប់៤ជ្រុងតូច នៃគណបក្សនយោបាយនីមួយ។ លោក ហង់ ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោតបានអះអាងថា គជប បានលើកទឹកចិត្តឲ្យអ្នកបោះឆ្នោតគូសសញ្ញាធិកនៅក្នុងប្រអប់៤ជ្រុងទ្រវែង ក៏ប៉ុន្តែ ការគូសសញ្ញាផ្សេងៗទៀត ក៏អាចយកជាបានការដែរ កុំឲ្យតែសញ្ញានោះ បញ្ជាក់ពីអត្តសញ្ញាណរបស់អ្នកបោះឆ្នោត ដូចជា សញ្ញេ ឬ ការសរសេរជាអក្សរជាដើម។
សូមបញ្ជាក់ថា បើគ្មានការប្រែប្រួលទេ ប្រជាពលរដ្ឋកម្ពុជាជាង៨លាននាក់ នឹងចេញទៅកាន់ការិយាល័យបោះឆ្នោត នៅថ្ងៃ អាទិត្យ ទី២៩ កក្កដា ចាប់ពីវេលាម៉ោង៧ព្រឹក ដល់ម៉ោង ៣រសៀល។ ហើយការរាប់សន្លឹកឆ្នោត នឹងធ្វើឡើងនៅពេលបន្ទាប់ នៃថ្ងៃដដែលនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ