គជប៖ យុទ្ធនាការឃោសនា ២១ថ្ងៃ បញ្ចប់ដោយរលូន
យុទ្ធនាការឃោសនាបោះឆ្នោតជ្រើសតាំងតំណាងរាស្ត្រ នីតិកាលទី ៦ រយៈពេល ២១ថ្ងៃ បានបញ្ចប់ហើយ នៅថ្ងៃទី ២៧កក្កដា ឆ្នាំ ២០១៨នេះ! គណៈកម្មាធិការជាតិរៀបចំការបោះឆ្នោត (គ.ជ.ប) បានវាយតំលៃក្នុងសន្និសីទសារព័ត៌មាននៅស្នាក់ការរបស់ខ្លួន នាល្ងាចថ្ងៃនេះថា យុទ្ធនាការឃោសនាបោះឆ្នោត របស់គណបក្សនយោបាយទាំង ២០ បានដំណើរការដោយភាពរលូន ពោលគឺមិនមានអំពើហិង្សា ឬ ភាពចម្រូងចម្រាស់ខ្លាំងនោះទេ។
ចុះផ្សាយនៅថ្ងៃ៖
ស្តាប់ - ០១:៤៦
មានបណ្តឹងតិចតួច បានកើតឡើងក្នុងយុទ្ធនាការឃោសនាបោះឆ្នោត ប៉ុន្តែបើតាមគ.ជ.ប ទាំងនេះ មិនមែនជាបញ្ហាធំដុំនោះទេ ដូច្នេះជាសរុបដំណើរការឃោសនារកសំឡេងឆ្នោត របស់គណបក្សនយោបាយនីមួយៗ បានបញ្ចប់ដោយភាពវិជ្ជមាន។ ក្រៅពីភាពវិជ្ជមាននេះ អគ្គលេខាធិការគ.ជ.ប លោកទេព នីថា ក៏បានបង្ហាញពីសុទិដ្ឋិនិយម ចំពោះដំណើរការនៅថ្ងៃបោះឆ្នោត ថ្ងៃទី ២៩កក្កដា ផងដែរ។
លោកទេព នីថា បានបញ្ជាក់ថា គ.ជ.ប បានត្រៀមខ្លួនរួចហើយ ហើយក៏មិនមានក្តីបារម្ភពីបញ្ហាទឹកជំនន់នោះដែរ។ តាមគ.ជ.ប ប្រសិនបើមានទឹកជំនន់ ប៉ះពាល់ដល់ការិយាល័យដែលគេគ្រោងរៀបចំការបោះឆ្នោត នោះអាជ្ញាធរ និងគ.ជ.ប នឹងចាត់វិធានការភ្លាមៗ ប្តូរទីតាំងការិយាល័យបោះឆ្នោតទៅរកទីទួលមានសុវត្ថិភាព។ ក្នុងនោះ គ.ជ.ប ក៏បានបញ្ជាក់ថា មានមធ្យោបាយគ្រប់គ្រាន់ ទាំងមធ្យោបាយផ្តល់ព័ត៌មាន និងមធ្យោបាយដឹកជញ្ជូនពលរដ្ឋ ទៅកាន់ទីតាំងការិយាល័យបោះឆ្នោត ប្រសិនបើមានគ្រោះធម្មជាតិណាមួយកើតឡើង។
យ៉ាងណាមិញ បើតាមគ.ជ.ប គិតត្រឹមថ្ងៃទី ២៧កក្កដា ខេត្តដែលរងគ្រោះដោយទឹកជំនន់ ដូចជាខេត្តស្ទឹងត្រែងជាដើម គឺមានផលប៉ះពាល់ដល់ការិយាល័យរៀបចំការបោះឆ្នោត តែប្រមាណ ៧ប៉ុណ្ណោះ ខណៈខេត្តត្បូងឃ្មុំ មានផលប៉ះពាល់ ៦ការិយាល័យ។ ប៉ុន្តែគ.ជ.ប សង្ឃឹមថា ទឹកនឹងអាចស្រកវិញ ត្រឹមថ្ងៃបោះឆ្នោត។
គួរជម្រាបជូនថា ការបោះឆ្នោតជាតិជ្រើសតាំងតំណាងរាស្ត្រ អណ្តត្តិទី ៦ នឹងធ្វើឡើងចាប់វេលាម៉ោង ៧ព្រឹក ដល់ម៉ោង ៣រសៀល ក្នុងថ្ងៃអាទិត្យ ទី ២៩កក្កដាចុងសប្តាហ៍នេះ។ ហើយលទ្ធផលនៃការបោះឆ្នោតបឋម នឹងត្រូវផ្សព្វផ្សាយនៅវេលាម៉ោង ៦ល្ងាចថ្ងៃដដែល ខណៈដែលលទ្ធផលផ្លូវការពីចំនួនអាសនៈ នឹងត្រូវផ្សព្វផ្សាយ នៅថ្ងៃទី ១៥ខែសីហា ប្រសិនបើមិនមានការប្តឹងផ្តល់ណាមួយ ប៉ុន្តែបើមានបណ្តឹងតវ៉ា នោះលទ្ធផលផ្លូវការ នឹងពន្យាការប្រកាសជាចុងក្រោយ រហូតដល់ថ្ងៃទី ១០ខែកញ្ញា ឆ្នាំ ២០១៨៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ