វេទិកាស្រាវជ្រាវផ្នែកអប់រំផ្តោតលើគុណភាពអប់រំ និងការស្រាវជ្រាវក្នុងវិស័យអប់រំនៅកម្ពុជា
វេទិកាស្រាវជ្រាវផ្នែកអប់រំនៅកម្ពុជា ដែលបានចាប់ផ្តើមធ្វើ តាំងពីថ្ងៃសុក្រម្សិលមិញ នៅវិទ្យាស្ថានជាតិអប់រំ មានគោលបំណងរួមចំណែកពង្រឹងគុណភាពអប់រំ និងអភិវឌ្ឍការស្រាវជ្រាវក្នុងវិស័យនេះនៅកម្ពុជា។ ទន្ទឹមនឹងនេះដែរ វេទិកាដែលត្រូវបញ្ចប់នៅថ្ងៃសៅរ៍នេះ ក៏សំដៅលើកកម្ពស់សមត្ថភាពអ្នកស្រាវជ្រាវ ព្រមទាំងចែករំលែកលទ្ធផលស្រាវជ្រាវជូនអ្នកសិក្សាជំនាន់ក្រោយឱ្យកាន់តែយល់ដឹងអំពីសារសំខាន់នៃការស្រាវជ្រាវបន្ថែមទៀត។ នៅក្នុងវេទិកាដែលឧបត្ថម្ភដោយអង្គការយូណេស្កូ លោក ហង់ ជួនណារ៉ុន រដ្ឋមន្ត្រីក្រសួងអប់រំ បានជម្រុញឱ្យគ្រិះស្ថានឧត្តមសិក្សាកំណត់យកគុណភាព និងឧត្តមភាពជាគោលដៅចម្បង ក្នុងការផ្លាស់ប្តូរឆ្ពោះទៅរកសង្គមដែលផ្អែកលើពុទ្ធិជាមូលដ្ឋាន។
ចុះផ្សាយនៅថ្ងៃ៖
ស្តាប់ - ០២:០៧
សមាគមគ្រឹះស្ថានឧត្តមសិក្សាកម្ពុជា និងក្រសួងអប់រំ យុវជន និងកីឡារៀបចំវេទិកាស្រាវជ្រាវផ្នែកអប់រំនៅកម្ពុជា តាំងពីថ្ងៃសុក្រម្សិលមិញ ហើយនឹងត្រូវបញ្ចប់នៅថ្ងៃសៅរ៍នេះ ក្រោមការឧបត្ថម្ភផ្នែកបច្ចេកទេស និងថវិការបស់អង្គការយូណេស្កូ។ វេទិកា ដែលប្រព្រឹត្តទៅនៅឯវិទ្យស្ថានជាតិអប់រំ មានគោលបំណងរួមចំណែកពង្រឹងគុណភាពអប់រំ និងអភិវឌ្ឍការស្រាវជ្រាវក្នុងវិស័យអប់រំនៅកម្ពុជា។ ទន្ទឹមនឹងនេះដែរ វេទិកានេះក៏សំដៅលើកកម្ពស់សមត្ថភាពអ្នកស្រាវជ្រាវ ព្រមទាំងចែករំលែករបកគំហើញនៃការស្រាវជ្រាវនានាដល់អ្នកចូលរួម និងអ្នកសិក្សាជំនាន់ក្រោយឱ្យកាន់តែយល់អំពីសារសំខាន់នៃការសិក្សាស្រាវជ្រាវផងដែរ។
ក្នុងអំឡុងពេលនៃការបង្ហាញលទ្ធផលនៃការស្រាវជ្រាវ និងការសួរដេញដោល ប្រធានបទសំខាន់ៗនៃវេទិកាស្រាវជ្រាវផ្នែកអប់រំនៅកម្ពុជាត្រូវបានលើឡើង។ ក្នុងចំណោមប្រធានបទទាំងនោះរួមមាន៖ ការអប់រំកុមារតូច, បឋមសិក្សា, មធ្យមសិក្សា, ឧត្តមសិក្សា, ការប្រៀបធៀបផ្នែកអប់រំ, ការអប់រំបច្ចេកទេស និងបណ្តុះបណ្តាលវិជ្ជាជីវៈ, ការអប់រំបញ្ចូលគ្នា, ការបណ្តុះបណ្តាល និងវិក្រឹតការ, អក្ខរកម្ម និងអប់រំក្រៅប្រព័ន្ធ, គុណភាពអប់រំ, ការផ្សព្វផ្សាយសមភាពយែនឌើក្នុងវិស័យអប់រំ, ការរៀបចំ ឬផែនការគ្រប់គ្រងក្នុងវិស័យអប់រំ ព្រមទាំងប្រធានបទផ្សេងៗទៀត។
រដ្ឋមន្ត្រីក្រសួងអប់រំ យុវជន និងកីឡា បានថ្លែងសង្កត់ធ្ងន់លើការអប់រំប្រកបដោយគុណភាព ដែលសំដៅលើឧត្តមភាពវិស័យអប់រំ។ លោក ហង់ ជួនណារ៉ុន បានទទួចឱ្យអ្នកពាក់ព័ន្ធទាំងអស់ខិតខំប្រឹងប្រែងសម្រេចឱ្យបាននូវឧត្តមភាពក្នុងកិច្ចការដែលខ្លួនបាន និងកំពុងធ្វើ។ លោករដ្ឋមន្ត្រីបានបន្តទៀតថា គុណភាពនិងរចនាសម្ព័ន្ធពាក់ព័ន្ធគ្រប់កម្រិតទាំងអស់ក្នុងវិស័យអប់រំគឺជាកត្តាពីរ ដែលត្រូវកើតឡើងព្រមគ្នា សម្រាប់ការបណ្តុះបណ្តាលឱ្យមានសមត្ថភាពប្រកបដោយគុណវុឌ្ឍិ និងជម្រុញប្រទេសជាតិឆ្ពោះទៅរកសេដ្ឋកិច្ច ដែលផ្អែកលើចំណេះដឹង។ ជាមួយគ្នានេះដែរ លោក ហង់ ជួនណារ៉ុន ក៏បានលើកទឹកចិត្តឱ្យគ្រប់ភាគីពាក់ព័ន្ធទាំងអស់លើកកម្ពស់ស្តង់ដាអប់រំ ទាំងក្នុងការបង្រៀន និងការរៀន ការរិះគិត ការបង្កើតកម្មវិធីសិក្សាថ្មីៗ ដែលមានលក្ខណៈប្រកួតប្រជែង សម្រាប់ការសិក្សាពេញមួយជីវិត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ