លោកនាយករដ្ឋមន្ដ្រីហ៊ុន សែន៖ ក្រសួងអប់រំ និងសង្គមកិច្ច ត្រូវដាក់បញ្ចូលគ្រូជនពិការ ទៅក្នុងក្របខ័ណ្ឌរដ្ឋ
នៅថ្ងៃទី១០ធ្នូនេះ លោកនាយករដ្ឋមន្ដ្រីហ៊ុន សែន បានប្រកាសឲ្យក្រសួងអប់រំ យុវជន និងកីឡា ព្រមទាំងក្រសួងសង្គមកិច្ច ដាក់បញ្ចូលគ្រូជនពិការ ដែលបង្រៀននៅតាមអង្គការនានា ទៅក្នុងក្របខ័ណ្ឌរដ្ឋ។ បើតាមលោកនាយករដ្ឋមន្ដ្រី នៅក្នុងឆ្នាំ២០១៤ខាងមុខនេះ សម្រាប់គ្រូបង្រៀនក្របខ័ណ្ឌរដ្ឋ ត្រូវជ្រើសរើសចំនួន៦ពាន់នាក់ ច្រើនជាងឆ្នាំមុនៗ ដែលជ្រើសរើសតែ៥ពាន់នាក់ប៉ុណ្ណោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៨
ទិវាជនពិការអន្ដរជាតិ និងជនពិការកម្ពុជា ៣ធ្នូ ត្រូវបានប្រារព្ធធ្វើឡើងនៅថ្ងៃទី១០ធ្នូនេះ ក្រោមអធិបតីភាពលោកនាយករដ្ឋមន្ដ្រីហ៊ុន សែន នៅមជ្ឈមណ្ឌលសន្និបាទកោះពេជ្រ។
នៅចំពោះមុខអ្នកចូលរួមជាង២ពាន់នាក់ ដែលក្នុងនោះមានជនពិការជាង១ពាន់នាក់ផងនោះ លោកនាយករដ្ឋមន្ដ្រី បានប្រកាស តម្រូវឲ្យក្រសួងអប់រំ យុវជន និងកីឡា សហការជាមួយក្រសួងសង្គមកិច្ច ដាក់បញ្ចូលគ្រូជនពិការ ដែលបង្រៀននៅតាមអង្គការនានា ទៅក្នុងក្របខ័ណ្ឌរដ្ឋ។ ការដាក់បញ្ចូលគ្រូជនពិការ ទៅក្នុងក្របខ័ណ្ឌរដ្ឋ នឹងជួយឲ្យគ្រូជនពិការ អាចទទួលបានប្រាក់បៀវត្សរ៍ពីខាងអង្គការផង និងពីរដ្ឋាភិបាលផង។
លោកនាយករដ្ឋមន្ដ្រីឲ្យដឹងថា កន្លងមក ក្រសួងអប់រំ យុវជន និងកីឡា ធ្លាប់បានដាក់បញ្ចូលគ្រូជនពិការ ទៅក្នុងក្របខ័ណ្ឌរដ្ឋរួចហើយ។ ប៉ុន្តែសកម្មភាពនេះ ត្រូវតែបន្តធ្វើតទៅមុខទៀត ពិសេសសម្រាប់ឆ្នាំ២០១៤ខាងមុខ។ ឆ្នាំ២០១៤ ដែលប្រមុខរដ្ឋាភិបាលកម្ពុជា អះអាងថា ត្រូវជ្រើសរើសគ្រូបង្រៀនក្របខ័ណ្ឌរដ្ឋចំនួន៦ពាន់នាក់ ច្រើនជាងឆ្នាំមុនៗ ដែលជ្រើសរើសតែ៥ពាន់នាក់ប៉ុណ្ណោះ។
ក្រៅពីនេះ លោកនាយករដ្ឋមន្ដ្រីហ៊ុន សែន ក៏បានជំរុញឲ្យក្រសួងអប់រំ យុវជន និងកីឡា សហការជាមួយក្រសួងសង្គមកិច្ច រៀបចំចងក្រង និងដាក់បញ្ចូលអក្សរស្ទាប និងភាសាសញ្ញា ទៅក្នុងកម្មវិធីសិក្សារបស់ក្រសួងអប់រំផងដែរ។
សូមជម្រាបជូនថា ទិវាជនពិការអន្ដរជាតិលើកទី៣១ និងទិវាជនពិការកម្ពុជាលើកទី១៥ នៅឆ្នាំនេះ ប្រារព្ធឡើងក្រោមប្រធានបទ «ការលុបបំបាត់ឧបសគ្គនានា និងការផ្ដល់ឱកាសដល់ជន ពិការ ដើម្បីសង្គមមួយសម្រាប់យើងទាំងអស់គ្នា»៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ