ប្រជាកសិករបើកផ្លូវជាតិលេខ៥វិញ ក្រោយការចរចាតម្លៃស្រូវត្រូវគ្នា
នៅថ្ងៃអាទិត្យនេះ ប្រជាកសិករក្នុងស្រុកសង្កែខេត្តបាត់ដំបងបានបើកផ្លូវជាតិលេខ៥ឲ្យដំណើរការវិញភ្លាមៗ ក្រោយពីអាជ្ញាធរអន្តរាគម និងទិញស្រូវរបស់ពួកគាត់ក្នុងតម្លៃ ដែលរដ្ឋបានកំណត់។ ការបិទផ្លូវរបស់ប្រជាកសិករធ្វើឡើង ក្រោយពីតម្លៃស្រូវបានធ្លាក់ថ្លៃយ៉ាងគំហុកកាលពីដើមសប្តាហ៍នេះ។
ចុះផ្សាយនៅថ្ងៃ៖
ស្តាប់ - ០២:០៨
កាលពីវេលាម៉ោង១០ព្រឹក ថ្ងៃទី១៨ កញ្ញា កសិករក្នុងឃុំកំពង់ព្រៀង ស្រុកសង្កែ ខេត្តបាត់ដំបងប្រមាណ៤០០នាក់ បានប្រមូលផ្តុំគ្នា យកគោយន្តដឹកស្រូវ ដាក់ពង្រាយលើផ្លូវជាតិលេខ៥ ដើម្បីបិទផ្លូវក្នុងគោលបំណងទាមទារតម្លៃស្រូវដែលរដ្ឋបានកំណត់។ ការបិទផ្លូវនេះ បានបណ្តាលឲ្យស្ទះចរាចរណ៍ជិត៣ម៉ោងនៅលើផ្លូវជាតិលេខ៥។ នេះបើតាមមេឃុំកំពង់ព្រៀងលោកសំ ណេត។
មេឃុំរូបនេះបានបញ្ជាក់ថាប្រជាពលរដ្ឋបានបើកផ្លូវឲ្យមានចរាចរណ៍ឡើងវិញ នៅម៉ោងប្រមាណ១២ថ្ងៃត្រង់ ហើយរថយន្តទិញស្រូវក៏បានប្រមូលទិញស្រូវភ្លាមៗនៅកន្លែងនោះ ក្នុងតម្លៃមួយតោន៨៤ម៉ឺនរៀល សម្រាប់ប្រភេទស្រូវលេខ១។ ការយល់ព្រមបើកផ្លូវឲ្យដំណើរការនេះ ក្រោយពីមានអន្តរាគមន៍ពីអភិបាលខេត្តបាត់ដំបង និងធានាគារស្រូវ។
ប្រភពដដែលបានបញ្ជាក់ថាមូលហេតុដែលឈានដល់ការផ្ទុះការទាមទារនេះ ដោយសារតែរដ្ឋមិនបានទិញស្រូវឲ្យទាន់ពេលវេលា ហើយឈ្មួញកណ្តាលទិញក្នុងតម្លៃថោក។
កាលថ្ងៃទី១២កញ្ញា កន្លងទៅក្រសួងកសិកម្មក៏បានចេញវិធានការទប់ស្កាត់ការប្រមូលទិញកសិផលពីកសិករក្នុងតម្លៃថោក។ ជាការទប់ស្កាត់ ដើម្បីរក្សាស្ថិរភាពតម្លៃកសិផល ពិសេសថ្លៃស្រូវ ដែលតែងតែកើតឡើងក្រោយពេលប្រមូលផល។
តាមគម្រោងនៅសប្ដាហ៍ក្រោយរដ្ឋាភិបាល នឹងទម្លាក់កញ្ចប់ថវិកាប្រមាណ ២០ទៅ៣០លានដុល្លារ តាមរយៈធនាគារអភិវឌ្ឍន៍ជនបទដើម្បីទិញស្រូវប្រជាពលរដ្ឋ ខណៈតម្លៃស្រូវនៅពេលនេះ កំពុងមានការធ្លាក់ចុះយ៉ាងគំហុក។
សូមបញ្ជាក់ថា គម្រោងនៃការទម្លាក់កញ្ចប់ថវិការបស់រដ្ឋាភិបាលនៅពេលនេះ ធ្វើឡើងមួយថ្ងៃបន្ទាប់ពី ធនាគារស្រូវបានប្រកាសទិញស្រូវពីកសិករដែលជាប្រភេទស្រូវសែនក្រអូបសើម ក្នុងតម្លៃ៨៤០ រៀលស្មើនឹង៧បាតប្រាក់ថៃក្នុងមួយគីឡូក្រាមពីកសិករផ្ទាល់នៅនឹងស្រែក្នុងខេត្តបាត់ដំបង ពោធិ៍សាត់ និង បន្ទាយមានជ័យ។
ទាក់ទងនឹងករណីផ្ទុះការបិទផ្លូវក្នុងស្រុកសង្កែខេត្តបាត់ដំបងនេះដែរ លោកផៃ ស៊ីផាន អ្នកនាំពាក្យរដ្ឋាភិបាលបានសរសេរនៅលើហ្វេសប៊ុករបស់លោកដោយអំពាវនាវឲ្យរក្សាភាពស្ងៀមស្ងាត់ រង់ចាំ ដំណោះស្រាយនេះ ដែលលោកនាយករដ្ឋមន្ត្រីហ៊ុន សែន បានសម្រេចរួចស្រេចហើយ។
លោកផៃ ស៊ីផានថាជន ឬក្រុមទុច្ចរិតទាំងឡាយណា ដែលយករបៀបវារៈ តម្លៃស្រូវនេះ ជាមធ្យោបាយគៀងគរ ដើម្បីបង្កភាពចលាចល ប្រឆាំងនឹងសណ្តាប់ធ្នាប់សង្គម និងត្រូវតែ ទទួលខុសត្រូវចំពោះមុខច្បាប់។ លោកបញ្ជាក់ថា រាជរដ្ឋាភិបាលនឹងចាត់វិធានការ ដ៏ម៉ឺងម៉ាត់ចំពោះភាពញុះញង់នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ