យុទ្ធនាការជួយពលករនៅប៉ោយប៉ែត បិទបញ្ចប់នៅថ្ងៃនេះហើយ
យុទ្ធនាការជួយពលករទ្រង់ទ្រាយធំរបស់រដ្ឋាភិបាលកម្ពុជាប្រចាំខេត្តបន្ទាយមានជ័យ នៅថ្ងៃទី២៧ មិថុនានេះ បានបិទបញ្ចប់ហើយ។ បិទបញ្ចប់ព្រោះថា ចំនួនពលករចំណាកស្រុកពីប្រទេសថៃបានថយចុះនៅសល់ត្រឹមតែ១ពាន់នាក់ ក្នុងមួយថ្ងៃតែប៉ុណ្ណោះ។ បើតាមអភិបាលខេត្តបន្ទាយមានជ័យ ការចំណាយលើសម្រាប់ការជួយពលករ មានប្រមាណជាង៦លានដុល្លារសម្រាប់អំឡុងពេលជាងកន្លះខែនេះ។
ចុះផ្សាយនៅថ្ងៃ៖
ស្តាប់ - ០១:៥០
បញ្ចប់ហើយ យុទ្ធនាការជួយពលករចំណាកស្រុកទ្រង់ទ្រាយធំរបស់រដ្ឋាភិបាលកម្ពុជាដែលបានចាប់ផ្តើមតាំងពីដើមខែមិថុនានេះមក។ នេះបើតាមការបញ្ជាក់ពីលោក គោស៊ុំ សារឿត អភិបាលខេត្តបន្ទាយមានជ័យដែលប្រាប់វិទ្យុបារាំងនៅថ្ងៃសុក្រនេះ។ លោកអភិបាលបានបញ្ជាក់ថាកងកម្លាំងគ្រប់លំដាប់ថ្នាក់របស់ជាតិ នឹងវិលទៅកាន់មូលដ្ឋានរៀងៗខ្លួនវិញនៅល្ងាចថ្ងៃសុក្រនេះតែម្តង។ ពោលគឺនៅសល់តែកម្លាំងរបស់ខេត្តបន្ទាយមានជ័យតែប៉ុណ្ណោះដែលនៅរ៉ាប់រងចំពោះពលករដែលបន្តហូរចូលត្រឹមតែជា១ពាន់នាក់ក្នុងមួយថ្ងៃតែប៉ុណ្ណោះ។
សូមបញ្ជាក់ជូនថា កងកម្លាំងគ្រប់ប្រភេទរបស់រដ្ឋាភិបាល ប្រមាណ៣ពាន់នាក់ រថយន្តជាង៣០០គ្រឿង បានប្រតិបត្តិការជួយពលករខ្មែរខុសច្បាប់ដែលរដ្ឋាភិបាលយោធាថៃបញ្ជូនត្រឡប់មកវិញយ៉ាងគំហុក ទៅកាន់មូលដ្ឋានស្រុកកំណើត។ តាំងពីដើមខែមិថុនានេះមក មានពលករខ្មែរចំណាកស្រុកប្រមាណជាង២៥ម៉ឺននាក់ត្រូវបានអាជ្ញាធរថៃបញ្ជូនមកកាន់កម្ពុជាវិញ។ បើតាមការបញ្ជាក់ពីលោកអភិបាលខេត្តដដែល រដ្ឋាភិបាលបានចំណាយទឹកប្រាក់លើការដឹកជញ្ជូន ម្ហូបអាហារ មានប្រមាណជាង៦លានដុល្លារអាមេរិក។
ប៉ុន្តែយ៉ាងណាក៏ដោយ លោកគោស៊ុំ សារឿត បានឱ្យដឹងថា ខេត្តបន្ទាយមានជ័យនឹងចាប់ផ្តើមដាក់ដំណើរការផ្តល់លិខិតឆ្លងដែនដល់ពលករដែលមានបំណងធ្វើការស្របច្បាប់នៅប្រទេសថៃដើមសប្តាហ៍ក្រោយ។ ទាក់ទងនឹងការផ្តល់លិខិតឆ្លងដែននេះ មន្ត្រីអង្គការលីដូប្រចាំខេត្តបន្ទាយមានជ័យ លោក ស៊ុំ ចាន់គា បានស្នើឱ្យរដ្ឋាភិបាលពិនិត្យការផ្តល់លិខិតឆ្លងដែនដល់ពលរដ្ឋគ្រប់គ្នាក្នុងតម្លៃ៤៩ដុល្លារដែលរដ្ឋាភិបាលបានកំណត់។ អ្នកចំណាក់ស្រុកមានបីប្រភេទ គឺតាមរយៈក្រុមហ៊ុន តាមរយៈមេខ្យល់ និងតាមរយៈខ្លួនឯងផ្ទាល់។
មន្ត្រីអង្គការលីកាដូប្រចាំខេត្តបន្ទាយមានជ័យរូបនេះបានវាយតម្លៃជាវិជ្ជមានចំពោះការផ្តល់សេវាជួយដល់ពលករដែលត្រឡប់មកពីប្រទេសថៃនេះ ព្រោះថាវាជាកាតព្វកិច្ចរបស់រដ្ឋចំពោះប្រជាជន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ