ហ៊ុន សែន៖ កម្ពុជាថៃកំពុងរួមគ្នាដោះស្រាយបញ្ហាពលករ
ក្នុងឱកាសទិវាអន្តរជាតិប្រយុទ្ធប្រឆាំងគ្រឿងញៀនដែលប្រារព្ធឡើងនៅថ្ងៃព្រហស្បតិ៍នេះនៅឯកោះពេជ្រ លោកនាយករដ្ឋមន្ត្រី ហ៊ុន សែន បានប្រាប់ឲ្យដឹងថា ទោះជាភាគីថៃចាប់បញ្ជូនពលករខ្មែរដោយមិនប្រាប់មុនក៏ដោយ ក៏កិច្ចសហការដោះស្រាយបញ្ហាពលករនៅតែបន្តធ្វើ ។ បើតាមលោកនាយករដ្ឋមន្ត្រី ភាគីទាំងពីរកំពុងខិតខំធ្វើយ៉ាងណាឲ្យពលករខ្មែរទាំងអស់ដែលឆ្លងដែនទៅធ្វើការក្នុងប្រទេសថៃជាពលករស្របច្បាប់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤១
ការចាប់បញ្ជូនពលករខ្មែរខុសច្បាប់នៅលើទឹកដីថៃឲ្យត្រឡប់មកប្រទេសវិញនៅតែជាបញ្ហាក្តៅគគុកនៅឡើយសម្រាប់ទំនាក់ទំនងទ្វេភាគីកម្ពុជាថៃ។ ថ្លែងជាសាធារណៈលើកដំបូងអំពីបញ្ហាពលករនៅថ្ងៃព្រហស្បតិ៍នេះ លោកនាយករដ្ឋមន្ត្រី ហ៊ុន សែន បានហៅការចាប់បញ្ជូនពលករខ្មែរដោយតក់ក្រហល់និងដោយមិនបានជូនដំណឹងជាមុនថាជាកត្តាចៃដន្យដ៏ធំធេងមួយដែលរដ្ឋាភិបាលកម្ពុជាត្រូវដោះស្រាយ។
លោកនាយករដ្ឋមន្ត្រីបានកោតសរសើរដល់អាជ្ញាធរទាំងអស់រួមទាំងសង្គមស៊ីវិលនិងសម្បុរសជននានារាប់ទាំងបក្សនយោបាយផងដែលបានរួមចំណែកដោះស្រាយកត្តាចៃដន្យដ៏ធំធេងនេះបានជោគជ័យ។ យ៉ាងណាក៏ដោយលោកអះអាងថា កិច្ចសហប្រតិបត្តិការរវាងប្រទេសទាំងពីរនៅតែបន្តធ្វើដើម្បីដោះស្រាយបញ្ហាពលករ។ កិច្ចសហប្រតិបត្តិការនេះមានន័យធ្វើយ៉ាងណាឲ្យពលករខ្មែរទាំងអស់ដែលឆ្លងដែនចូលទៅធ្វើការក្នុងទឹកដីថៃក្លាយជាពលករស្របច្បាប់។ ក្នុងន័យនេះ ភាគីថៃនឹងបិទមិនឲ្យមានក្រុមហ៊ុននាំពលករទៅធ្វើការដោយខុសច្បាប់ទៀតឡើយ។
ចំណែកភាគីកម្ពុជាវិញកំពុងជួយសម្រួលឲ្យពលកររបស់ខ្លួនបានទទួលឯកសារស្របច្បាប់ដោយងាយស្រួល ឆាប់រហ័សនិងក្នុងតម្លៃថោក។ ក្នុងន័យនេះ លោកនាយករដ្ឋមន្ត្រីបានបញ្ជាឲ្យក្រសួងមហាផ្ទៃពង្រាយការិយាល័យធ្វើលិខិតឆ្លងដែននៅក្នុងខេត្តសំខាន់ៗ និងឈានទៅបើកការិយាល័យធ្វើលិខិតឆ្លងដែនគ្រប់ខេត្តតែម្តងក្នុងពេលខាងមុខនេះ។ លិខិតឆ្លងដែនដែលមានតម្លៃត្រឹម៤ដុល្លាប៉ុណ្ណោះសម្រាប់ថ្លៃរូបថត។
យ៉ាងណាក៏ដោយ លោកនាយករដ្ឋមន្ត្រីបានអំពាវនាវឲ្យពលករទាំងអស់គួរតែស្វែងរកការងារក្នុងស្រុកប្រសើរជាងទៅក្រៅប្រទេស។ ឆ្លើយតបនឹងការរិះគន់អំពីបរាជ័យរបស់រដ្ឋាភិបាលក្នុងការផ្តល់ការងារជូនពលកររបស់ខ្លួន ប្រមុខរដ្ឋាភិបាលបក្សកាន់អំណាចបានពន្យល់ថាប្រទេសជាច្រើនក្នុងអាស៊ានក៏បានបញ្ជូនពលករទៅធ្វើការក្រៅប្រទេសដូជកម្ពុជាដែរ។
សូមបញ្ជាក់ថា រហូតមកដល់ពេលនេះមានពលករខ្មែរជាង ២៥ ម៉ឺននាក់ហើយដែលថៃចាប់បញ្ជូនឲ្យត្រឡប់មកវិញក្នុងនោះពលករមួយចំនួនគ្មានដីធ្វើស្រែនោះទេ។ ពលករ១០នាក់ត្រូវបានអាជ្ញាធរថៃចាប់ខ្លួនពីបទប្រើប្រាស់ត្រាក្លែងក្លាយ។ ប៉ុនៅចំពោះមុខមន្ត្រីស្ថានទូតថៃ លោកនាយករដ្ឋមន្ត្រី ហ៊ុន សែន បានអំពាវនាវឲ្យរដ្ឋាភិបាលយោធាថៃដោះលែងពួកគេត្រឡប់មកវិញពីព្រោះពលករទាំងនោះគ្រាន់តែចាញ់បោកគេតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ