លោក ហ៊ុន សែន បញ្ជាឲ្យអភិបាលក្រុងធ្វើឲ្យជោគជ័យនូវសេវារថយន្តក្រុងសាធារណៈ
ប្រមុខរដ្ឋាភិបាលកម្ពុជា លោកនាយករដ្ឋមន្ត្រីហ៊ុន សែន ក្នុងពិធីសម្ពោធស្ពានអាកាសស្ទឹងមានជ័យនៅព្រឹកថ្ងៃព្រហស្បតិ៍ ទី ៣១ កក្កដា នេះ បានដាក់ចេញនូវផែនការតឹងរ៉ឹងមួយដោយបញ្ជាឲ្យអភិបាលរាជធានីភ្នំពេញ លោក ប៉ា សុជាតិវង្ស ត្រូវធ្វើឲ្យបានសម្រេចនូវសេវារថយន្តក្រុងសាធារណៈរត់នៅក្នុងទីក្រុងភ្នំពេញ ។ នៅខែកញ្ញា ខាងមុខនេះ សាលារាជធានីភ្នំពេញគ្រោងដាក់ដំណើរការរថយន្តក្រុងសាធារណៈចំនួន ៤០ គ្រឿងបន្ថែមទៀត។
ចុះផ្សាយនៅថ្ងៃ៖
ស្តាប់ - ០២:២៧
ដោយមើលឃើញថា សេវារថយន្តក្រុងសាធារណៈមិនទាន់មានដំណើរការល្អដោយក្រុមហ៊ុនឯកជនលែងសហការជាមួយសាលារាជធានីភ្នំពេញនោះ លោកនាយករដ្ឋមន្ត្រី ហ៊ុន សែន បានប្រកាសឲ្យសាលារាជធានីភ្នំពេញវិនិយោគលើវិស័យនេះខ្លួនឯង។
ជាមួយគ្នានេះ លោកនាយករដ្ឋមន្ត្រីបានបញ្ជាផ្ទាល់ទៅកាន់លោក ប៉ា សុជាតិវង្ស អភិបាលរាជធានីភ្នំពេញ ត្រូវធ្វើឲ្យសេវារថយន្តក្រុងសាធារណៈទទួលបានជោគជ័យ ដោយបង្កើតរដ្ឋាករដឹកជញ្ជូនដោយរដ្ឋជាអ្នកទទួលបន្ទុករាល់ការចំណាយ។
លោក ហ៊ុន សែន បានលើកឡើងថា រដ្ឋាភិបាលគាំទ្រការនាំចូលរថយន្តដឹកជញ្ជូនទាំងនេះ ដោយរដ្ឋមិនយកពន្ធនាំចូលនោះទេ។ លោកនាយករដ្ឋមន្ត្រី ក៏បានប្រកាសផងដែរថា ការដឹកជញ្ជូនព្រះសង្ឃ ជនពិការ និងសិស្ស និស្សិត រថយន្តក្រុងមិនត្រូវយកលុយនោះឡើយ។លោកបញ្ជាក់ថា ការមិនយក លុយនេះ គឺដើម្បីជួយកាត់បន្ថយការធ្វើដំណើរតាមម៉ូតូរបស់អាណាព្យាបាល ដែលដឹកជញ្ជូនកូនៗទៅសាលា និង ធានាសុវត្ថិភាពដល់ពួកគេផងដែរ ។
សូមបញ្ជាក់ថា បើតាមគម្រោងសាលារាជធានីភ្នំពេញ នឹងដាក់ឲ្យដំណើរការរថយន្តក្រុងសាធារណៈចំនួន៤០ គ្រឿងបន្ថែមទៀត នៅក្នុងខែកញ្ញាខាងមុខនេះ។ នេះ បើតាមបញ្ជាក់ឲ្យដឹងរបស់ លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ។ រថយន្ត ក្រុង ៤០ គ្រឿងនេះ នឹងរត់លើផ្លូវ ៣ខ្សែក្នុងរាជធានីភ្នំពេញ ដោយខ្សែទី១ គឺចាប់ពីគីឡូម៉ែត្រលេខ៩ កាត់តាមរង្វង់មូលស្ពានជ្រោយចង្វា ចុះតាមផ្លូវមុនីវង្ស រហូតដល់ស្ពានអាកាសក្បាលថ្នល់ ឆ្លងទៅផ្សារច្បារអំពៅ ហើយបញ្ចប់ត្រឹមវត្តក្តីតាកុយ ។
ខ្សែទី២ ចេញពីផ្សាររាត្រី តាមផ្លូវស៊ីសុវត្ថិ ឆ្ពោះទៅកាន់រង្វង់មូលស្ពានជ្រោយចង្វា ហើយបន្តតាមផ្លូវទំនប់ទួលគោក ឬផ្លូវទំបន់៧០ ទៅដល់អង់តែនទួលគោក ហើយបត់តាមវិថីគីមអ៊ីលសុង ឆ្លងកាត់ស្តុបតិចណូ ចូលដល់ផ្លូវម៉ៅសេទុង រហូតដល់ស្តុបប៊ូកគោ និងស្តុបក្រសួងកសិកម្ម រួចបត់តាមផ្លូវនរោត្តម ឆ្លងកាត់ស្ពានអាកាសក្បាលថ្នល់ និងបន្តរហូតដល់តាខ្មៅ។
និងខ្សែទី៣ ចេញពីផ្សាររាត្រី កាត់តាមផ្សារចាស់ និងផ្លូវនរោត្តម រួចឆ្លងទៅផ្លូវកម្ពុជាក្រោម រហូតដល់ស្តុបសន្ធរមុខ បត់ឡើងទៅផ្លូវសហព័ន្ធរុស្ស៊ីវិញ រួចបន្តឆ្លងកាត់ស្ពានអាកាស ៧មករា រហូតដល់រង្វង់មូលចោមចៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ