តម្លៃអគ្គិសនី លុយក្រោមតុ និងពលករខ្វះជំនាញជាឧបសគ្គនៃការវិនិយោគនៅកម្ពុជា
ធនាគារអភិវឌ្ឍន៍អាស៊ីនិងធនាគារពិភពលោក ទើបតែបានចេញរបាយការណ៍រួមគ្នាមួយនៅថ្ងៃអង្គារនេះស្តីពីបរិយាកាសវិនិយោគនៅកម្ពុជាឆ្នាំ ២០១៤។ របាយការណ៍នេះបានរកឃើញថា តម្លៃអគ្គិសនីខ្ពស់ ការចាយលុយក្រៅផ្លូវការ និងកង្វះពលករជំនាញ គឺជាឧបសគ្គធំៗបីសម្រាប់ការវិនិយោគនៅកម្ពុជា។ ស្ថាប័នហិរញ្ញវត្ថុអន្តរជាតិទាំងពីរនេះបានស្នើឲ្យកម្ពុជាលើកចេញនូវឧបសគ្គទាំងបីដើម្បីបង្កើតបរិយាកាសថ្មីសម្រាប់ការវិនិយោគ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
តម្លៃអគ្គិសនីខ្ពស់ ការចាយវាយក្រៅផ្លូវការ និងពលករខ្វះជំនាញ បានបង្កឧបសគ្គធ្ងន់ធ្ងរដល់កិច្ចខិតខំប្រឹងប្រែងរបស់កម្ពុជាក្នុងការទាក់ទាញវិនិយោគទុន។ នេះគឺជាខ្លឹមសារនៃរបាយការណ៍វាយតម្លៃអំពីបរិយាកាសវិនិយោគឆ្នាំ ២០១៤ របស់ធនាគារពិភពលោក និងធនាគារអភិវឌ្ឍន៍អាស៊ីដែលចេញផ្សាយនៅថ្ងៃអង្គារទី ២៨តុលានេះ។
របាយការណ៍កត់សម្គាល់ថា អគ្គិសនីនៅកម្ពុជាមិនគ្រាន់តែមានតម្លៃខ្ពស់ជាងប្រទេសជិតខាងប៉ុណ្ណោះទេ ប៉ុន្តែ ថែមទាំងផ្គត់ផ្គង់មិនបានជាប់លាប់ទៀតផងជាពិសេសនៅក្នុងតំបន់សេដ្ឋកិច្ចពិសេស។ ចំណែកឯក្រុមហ៊ុនចុះបញ្ជីជាច្រើនបានអះអាងថាការបង់ប្រាក់ក្រៅផ្លូវការ និងកង្វះពលករជំនាញក៏ជាឧបសគ្គដ៏ធំចំពោះការធ្វើអាជីវកម្មនៅកម្ពុជាផងដែរ។
អ្នកសេដ្ឋកិច្ចជាន់ខ្ពស់របស់ធនាគារពិភពលោកបានកត់សម្គាល់ថា តម្លៃពលកម្មថោក ការអនុគ្រោះពន្ធនាំចូលទៅកាន់សហភាពអឺរ៉ុប និងកម្មវិធីបន្ធូរបន្ថយពន្ធរបស់រដ្ឋាភិបាលជាដើមគឺជាកត្តាទាក់ទាញអ្នកវិនិយោគទុនបរទេសឲ្យចូលមកកម្ពុជា។ ក៏ប៉ុន្តែ រដ្ឋាភិបាលចាំបាច់ត្រូវលើកចេញឧបសគ្គធំៗដែលរារាំងការវិនិយោគរបស់ពួកគេ។
ថ្លែងក្នុង ឱកាសបង្ហាញរបាយការណ៍នេះនៅឯសណ្ឋាគារ Sofitel Phnom Penh លោក អាឡាសាន សូ ប្រធានគ្រប់គ្រងធនាគារពិភពលោកប្រចាំកម្ពុជាបានអះអាងថា កម្ពុជាមានការរីកចម្រើនជឿនលឿនទៅមុខយ៉ាងខ្លាំងក្នុងការបង្កើតឲ្យមានភាពចម្រុះនៃផលិតផលថ្មី និងការទាក់ទាញវិនយោគទុនថ្មី។ លោកសង្ឃឹមថា របាយការណ៍នេះនឹងជួយជំរុញបរិយាកាសធុរកិច្ចមួយដែលមានលក្ខណៈល្អប្រសើរសម្រាប់ការអភិវឌ្ឍវិស័យឯកជននៅកម្ពុជា។
ស្ថាប័នហិរញ្ញវត្ថុអន្តរជាតិទាំងពីរនេះបានផ្តល់អនុសាសន៍ថា ដើម្បីឲ្យតម្លៃអគ្គិសនីថោក កម្ពុជាគួរសម្លឹងមើលការទាញយកថាមពលអគ្គិសនីពីប្រភពផ្សេង និងការធ្វើឲ្យប្រសើរឡើងនូវកិច្ចព្រមព្រៀងជាមួយប្រទេសជិតខាង។ ក្រៅពីនោះ ការកាត់បន្ថយជំនួបដោយផ្ទាល់រវាងវិនិយោគិនជាមួយមន្ត្រីរដ្ឋាភិបាលតាមរយៈការប្រើប្រព័ន្ធបច្ចេកវិជ្ជាអាំងទែណែត និងប្រព័ន្ធទិន្នន័យគយស្វ័យប្រវត្តិគឺជាមធ្យោបាយកាត់បន្ថយពេលវេលានិងការចំណាយរបស់វិនិយោគិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ